Ա․Մ․Ն․ Արեւելեան Թեմի Բարեջան Առաջնորդ Անուշաւան Արքեպիսկոպոս Դանիէլեանի Անցեալ Շաբաթավերջի Այցերը

0 0
Read Time:2 Minute, 13 Second

Ուրբաթ, Սեպտեմբեր 3-ին, Ա․Մ․Ն․ արեւելեան Թեմի բարեջան Առաջնորդ Անուշաւան Արքեպիսկոպոս Դանիէլեան, վերադառնալով Լիբանան կատարած իր եռօրեայ ճամբորդութենէն, յաջորդ օրն իսկ մեկնեցաւ Փրովիտընս, ներկայ գտնուելու Հ.Ե.Դ.-ի ողիմպիականին։ Առիթէն օգտուելով, Հ․Յ․Դ․ Արեւելեան Ա․Մ․Ն․-ի Կեդրոնական Կոմիտէի ներկայութեամբ, Սրբազան հայրը հանդիպում ունեցաւ Հայ Երիտասարդաց Դաշնակցութեան Արեւելեան Ա․Մ․Ն․-ի Կեդրոնական  Վարչութեան հետ։ Սրբազանն ու վարչութեան անդամները միասնաբար արծարծեցին երիտասարդութիւնը յուզող այժմէական հարցեր։ Առաջնորդ Սրբազան Հայրը, անձնապէս ծանօթանալով անոնց նուիրումին ու յանձնառութեան, բարձրօրէն գնահատեց կազմակերպութեան տարած աշխատանքը անցնող ութը տասնամեակներուն, հայ երիտասարդներուն մէջ վառ պահելով ազգային նկարագիրը եւ պահանջատիրութեան ոգին։ Ան նաեւ շեշտեց ֆիզիքական զարգացման ու, գաղափարաբանութեան ծանօթացման կողքին, հայ հաւատքի իւրացման կարեւորութիւնը, որպէս մեր ինքնութեան եռեակ կռուանները։

Ձախէն աջ՝ Արեւելեան Թեմի Ազգային Վարչութեան Քաղաքական Ժողովի ատենապետ՝ Յակոբ Խաչատուրեան, Արժ. Տ. Գաբրիէլ Քհն. Նազարեան, Անուշաւան Արքեպիսկոպոս Դանիէլեան, Ռոտ Այլընտի նահանգապետ Տան ՄաքՔին եւ Քաթըրին Ղազարեան՝ նահանգի Ներկայացուցիչներու Տան անդամ եւ Տան մեծամասնութեան ղեկավար

Կիրակի, Սեպտեմբեր 5-ին, Սրբազան Հայրը  ներկայ եղաւ Սուրբ Պատարագի մատուցման Փրովիտընսի Սրբոց Վարդանանց եկեղեցւոյ մէջ։ Պատարագեց ու քարոզեց հոգեւոր հովիւ՝ Տ. Գաբրիէլ Քհն․ Նազարեանը։

Յաւարտ եկեղեցական արարողութեանց, Սրբազան Հայրը, ընկերակցութեամբ Տ. Գաբրիէլ Քհն. Նազարեանի եւ Թեմիս Ազգային Վարչութեան Քաղաքական Ժողովի ատենապետ՝ տիար Յակոբ Խաչատուրեանի, ներկայ եղաւ  Հայ Երիտասարդաց Դաշնակցութեան Ողիմպիական խաղերու պաշտօնական բացումին, որուն ներկայ եղաւ նաեւ Ռոտ Այլընտ նահանգի կառավարիչ Տան ՄաքՔինը։ Սրբազան Հայրը՝ յանուն Ազգային Առաջնորդարանի մեծ ընտանիքին, ողջունեց Հայ Երիտասարդաց Դաշնակցութեան ընտանիքի բոլոր անդամները։ Խօսքը ուղղելով Ողիմպիական խաղերու մասնակցողներուն, ըսաւ․ «Ճիշդ է, որ այս մրցաշարքին միայն կարգ մը անհատներ կամ խմբակներ մետալներ եւ բաժակներ պիտի ստանան, միաժամանակ չմոռնանք այն իրականութիւնը, որ Արարիչն Աստուած կեանքի գերագոյն մրցումը պատրաստած է այնպիսի ձեւով, որ բոլոր անոնք, որոնք զայն կ՚ապրին համաձայն Երկնաւորի պատուէրներուն, անխտիր մրցանակակիր կը հանդիսանան եւ կ՚արժանանան յաւերժական պսակներու։ Ուստի, այս ակնկալութեամբ հաւատանք ու գործենք կեանքի այս մրցումին մէջ»։

Ձախէն աջ՝ Արժպ. Տ. Շնորհք Քհն. Սուին, հոգեւոր հովիւ՝ Սրբոց Սահակ եւ Մեսրոպ եկեղեցւոյ (Փրովիտընս), Արժ. Տ. Գաբրիէլ Քհն. Նազարեան, հոգեւոր հովիւ՝ Սրբոց Վարդանանց եկեղեցւոյ (Փրովիտընս) եւ Գերշ. Առաջնորդ Տ. Անուշաւան Արքեպիսկոպոս Դանիէլեան

Սրբազան Հայրը անձամբ  յատուկ շնորհակալութիւն յայտնեց կառավարիչ ՄաքՔինին հայ համայնքին հանդէպ տածած հոգատարարութեան, Հայոց Ցեղասպանութեան ճանաչման, բայց մանաւանդ բոլոր դպրոցներու մէջ Ցեղասպանութեան պարտադիր դասաւանդման նահանգային պաշտօնական տնօրինման համար։

Այնուհետեւ, Սրբազան հայրը մեկնեցաւ Ուստըրի Սուրբ Երրորդութիւն եկեղեցին եւ հոգելոյս Տ. Վազգէն Ա. Քհն. Պէքիարեանի ընտանիքին հետ ուղղուեցան գերեզմանատուն, ուր Տէր Հօր շիրիմին առջեւ կատարուեցաւ քառասնօրեայ կարգի յատուկ արարողութիւնը։

Սրբազան Հայրը անգամ մը եւս վեր առաւ իննսունամեայ Տէր Հօր բացառիկ ծառայութիւնը Ազգային Առաջնորդարանի բազմաթիւ  ծուխերէն ներս, նաեւ շեշտեց, որ հանգուցեալը ո՛չ միայն որպէս անձ, այլ նաեւ համայն ընտանիքով օրհնութիւն դարձաւ գաղութին՝ օրինակելի գործօն մասնակցութեամբ։

 

 

 

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՀԱՅԱՍՏԱՆԻ ԳՐԱՒՈՒՄԸ ՌՈՒՍԵՐՈՒ ԿՈՂՄԷ (ԱՐԱՐԱՏԵԱՆ ԴԱՇՏ ՄՈՒՏՔԷՆ ՄԻՆՉԵՒ Ա. ՀԱՄԱՇԽԱՐՀԱՅԻՆ ՊԱՏԵՐԱԶՄ)
Next post ՀԱՅԱՍՏԱՆԵԱՆ ՇՈՒԱՐՈՒՄԻ ԽՐՁԻԿԻ ԱՆՅՈՒՍՈՒԹԵԱՆ ԱՊԱՍՏԱՆԸ «ՇԱՈՒ»-Ն Է

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles