ԿԵԴՐՈՆԱԿԱՆՑԻՆ ԾԻՐԱՆԻ ՄԻՋՈՒԿԻ ԵՒ ՃԵՆԹԸԼՄԷՆՆԵՐՈՒ ՄԱՍԻՆ

0 0
Read Time:2 Minute, 18 Second

 

 

            Օգոստոսի կէսն ենք եւ կարծէք աշուն է. ամպ, անձրեւ: Տիւ ու գիշեր հոլովուող լուրեր թագաժահրի հիւանդներու, մեռեալներու, պատուաստուողներու եւ պատուաստը մերժողներու մասին: Այլ բաներ չենք լսեր:

            Երկիրը դարձած է տարբեր մոլորակ, եւ յայտնի չէ թէ արեւը որ կողմէն կը ծագի: Բարեբախտաբար կայ Կեդրոնականցի Արմենակը, յիշեցնելու, որ այսօր ալ կան երէկուան մարդիկը եւ անոնց հարցերը, կայ նաեւ Հայաստանը, իր տաք ու պաղով:

            Արմենակ Հայաստանի կեանքի մանրամասնութիւններուն կը հետեւի, կ’ուրախանայ, կը զարմանայ, կը զայրանայ: Եկաւ սակառ մը հայաստանեան ծիրանով, որ Հայաստան զգայ: Ըսաւ, որ կորիզի միջուկը դեղամիջոց է եւ պէտք է ուտել:

            Սուրճի արարողութենէն ետք Մակարուհին գնաց տան գործերով զբաղելու եւ Արմենակ առանց ներածականի սկսաւ Հայաստանի մասին խօսիլ:

            – Գիտես, Մակա՛ր, նորընտիր խորհրդարանի մէջ ելոյթ ունեցողները կարծես որդեգրած են անգլիացի ճենթըլմէնի կեցուածք եւ ոճ, թաքնուելով դիմակներու ետին, մին հինցած բարքերու ոճով կը խօսի «առաջնորդ»ի մասին, ինչպէս «հայր Ստալին»-ի, միւսը կ’ըսէ, թէ եկած են «զիրենք հեռացնելու»: Ոչինչ փոխուած է: Պոռչտուք չկայ, բայց մին կ’ըսէ թէ յանուն ժողովուրդին մենք մեր ուզածը պիտի ընենք, միւսը կ’ըսէ, թէ թոյլ պիտի չտանք, որ ձեր ուզածը ընէք: Եւ կը սարքեն փոխադարձ մեղադրանքներու թատրոն, աւելի ճիշդ, ընդհանրացած եւ անվերջանալի  «սերիալ»: Քառակուսի անիւ:

            – Արմենակ, ի՞նչ կը մտածէ ժողովուրդը, ի՞նչ կ’ուզէ, իսկ իշխանութեան մաս կազմող, մաս չկազմող, լուսանցքի վրայ մնացած ղեկավարներ, ո՞ւր կ’ուզեն տանիլ ալիքներու վրայ տատանող կրկին թուրքի լախտէն ցնցուած ազգի նաւը:

            – «Ո՞ւր»-դ յոգնակի է: Մին առագաստները բացած է Մոսկուայի հովերուն, միւսը՝ Եւրոպայի, երրորդ մը՝ Ընքըլ Սէմի, չորրորդ մը՝ թուրք ղարտաշարխատաշի: Իրենք կը խօսին, ժողովուրդը պատերազմ չ’ուզեր եւ կ’ուզէ լաւ ապրիլ, իսկ լաւ ապրելու ցանկութիւնը կը սնուցեն քէնով, քինախնդրութեամբ, հաշուեյարդարներով, երեք տարիէ ի վեր շարունակուող եւ չաւարտող հին ու նոր դատ-դատաստաններով, որոնց համար վատնուած միտքը եւ ուժը եթէ բանակին յատկացուէին չէինք պարտուեր:

            – Արմենա՛կ, քու ըսած ժողովուրդդ կը լսէ՞ զինք ասդին կամ անդին տանելու քաղաքական կարգախօսներով աղմկողները, թէ՞ ինք իր ուղղութիւնը ունի:

            – Եթէ լսէր, իր խօսքը կ’ըսէր, երկիրը ղեկավարութիւն կ’ունենար: Ժողովուրդը կը մտածէ ի՛ր վաղուան մասին, զաւակներու ապագայի մասին, եւ վաղը ու ապագան կը տեսնէ երկրէն դուրս, Ռուսիա, Ամերիկա, Ափրիկէ, Աւստրալիա…

            – Արմենա՛կ, չկա՞յ մէկը, որ պատմութիւն գիտնայ, ըսէ թէ ի՞նչ պէտք չէ ընել եւ «ի՞նչ պէտք չէ ընել»-ու շուրջ հաւաքէ ժողովուրդը:

            – Չկայ: Ամէնքն ալ կ’ըսեն, թէ ի՛նչ պէտք է ընել, եւ  ինչը «ինչեր» է: Ինչ պէտք չէ ընելու մասին ո՛չ ոք կը խօսի: Բազմապատիկ: Ճանապարհներու խաչմերուկին կանգնած, ամէն մէկը կը վազէ իր ընտրած ուղղութեամբ, կամ շուարած կը դիտէ:

            -Ուրեմն:

            – Պարզ. երկիրը եւ ազգը կը տարտղնուին: Այսքա՛ն եւ այսպէ՛ս: Եւ ժողովուրդը, յառաջադիմածներու հայերէնով, «ապաթիա»ի մատնուած, կը դիտէ, կը լսէ, բայց անկարող դարձած է դատելու եւ հակազդելու:

            Կեդրոնականցին Մակարուհիին երկրորդ սուրճը կուլ տուաւ, դրան առջեւ ըսաւ, որ վաղը Սեւրի դաշնագրի ստորագրութեան տարեդարձն է, եւ գնաց:

 

Մակար ի Գաղիա, 9 Օգոստոս 2021

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՍՓԻՒՌՔԻ ՀԱՅՐԵՆԱՍԻՐՈՒԹԻՒՆԸ ՅԱՃԱԽ ԿԸ ԴՐՍԵՒՈՐՈՒԻ ՈՐՊԷՍ «ԻՇԽԱՆԱՒՈՐԱՍԻՐՈՒԹԻՒՆ»
Next post «Բարով Եկաք Մոնթէաբերդ»

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles