Հ.Հ. Նախագահ Արմէն Սարգսեանի Ուղերձը Սահմանադրութեան Օրուան Առիթով

0 0
Read Time:1 Minute, 42 Second

Յուլիս 5-ին,  Հայաստանի Հանրապետութեան Սահմանադրութեան օրուան առիթով Հայաստանի նախագահ Արմէն Սարգսեան յղեց հետեւեալ ուղերձը.

«Սիրելի՛ հայրենակիցներ,

Այսօր Սահմանադրութեան օրն է:

Իւրաքանչիւր ժողովուրդ իր կեանքը, պետականութիւնը կառուցում է իր սեփական արժեհամակարգի հիման վրայ: Հնուց ի վեր մեր ժողովուրդը դաւանել է երկու հիմնական կարեւոր արժէք` ազատութիւնը եւ արդարութիւնը: Դրանց վրայ են խարսխուած եղել տարբեր ժամանակներում ընդունուած մեր բոլոր սահմանադրութիւնները:

Այդ արժէքներն ուղղակիօրէն արտացոլուած են գործող Սահմանադրութեան անփոփոխելի յօդուածներում.

«Յօդուած 1. Հայաստանի Հանրապետութիւնն ինքնիշխան, ժողովրդավարական, ընկերային, իրաւական պետութիւն է…

Յօդուած 2. Հայաստանի Հանրապետութիւնում իշխանութիւնը պատկանում է ժողովրդին…

Յօդուած 3. Հայաստանի Հանրապետութիւնում մարդը բարձրագոյն արժէք է…»:

Վերոնշեալ սկզբունք-կարգաւորումներից բացի, Սահմանադրութիւնը ոչ թէ կայուն, այլ` ճկուն փաստաթուղթ է: Այն պէտք է համապատասխանի օրուայ մարտահրաւէրներին եւ ուղղուած լինի վերոնշեալ անփոփոխելի դրոյթներով ամրագրուած սկզբունքների իրագործմանը:

Իւրաքանչիւրիս պարտքն է յարգել Սահմանադրութիւնը` անհրաժեշտութեան դէպքում բարելաւելով եւ կատարելագործելով այն:

Մեր պետականութեան պատմութեան ընթացքում ընդունուած իւրաքանչիւր սահմանադրութիւն նշանաւորել է մի նոր էջ մեր պետութեան կեանքում:

Այսօր մենք ապրում ենք բարդ ժամանակներում: Սովորական լուծումներին զուգահեռ` անհրաժեշտութիւն կայ նաեւ ոչ սովորական քայլեր ձեռնարկել` յաղթահարելու առկայ բազմաշերտ եւ բազմաբաղադրիչ ճգնաժամը:

Այսօր կարիք ունենք նախապատրաստելու անհրաժեշտ հիմք մեր պետութեան կեանքում նոր էջ բացելու համար: Վերջին երեք տարիներն աւելի ակնյայտ դարձրեցին, որ գործող Սահմանադրութեան առանձին դրոյթներ չեն նախատեսում լաւագոյն լուծումները մեր երկրի ու հասարակութեան առաջ ծառացած բոլոր մարտահրաւէրներին եւ ճգնաժամերին արագ, լիարժէք ու հաւասարակշռուած արձագանգելու համար:

Հետեւաբար, գիտակցելով Սահմանադրութեան, որպէս ամբողջական փաստաթղթի կենսական կարեւորութիւնը իւրաքանչիւրիս եւ ողջ երկրի համար, անհրաժեշտութիւն կայ կատարելագործել այն, դարձնել երկրի ապագային միտուած, մեր պետական եւ ազգային շահերից բխող առաջնահերթութիւններին առաւել համահունչ` միաժամանակ, անվերապահօրէն հաւատարիմ մնալով Սահմանադրութեան անփոփոխելի յօդուածներով ամրագրուած սկզբունքներին:

Ի վերջոյ, Սահմանադրութիւնը պէտք է ո՛չ միայն հռչակի այդ հիմնարար սկզբունքները, այլեւ ունենայ դրանք պաշտպանելու եւ կեանքի կոչելու բաւարար գործուն կառուցակարգեր:

Աշխատանքը մեր պետականութեան ամրապնդման ուղղութեամբ պէտք է լինի շարունակական: Իսկ այսօր առաւել եւս պէտք է լինենք միասնական, կարգապահ ու աշխատասէր, զինուենք դժուարութիւնները յաղթահարելու յամառութեամբ, հայրենիքի հանդէպ սիրով ու լաւատեսութեամբ:

Պէտք է անենք առաւելագոյնը պետականութեան պահպանման, մեր ազգային ինքնութեան վերաիմաստաւորման, ազգային գաղափարախօսութեան սահմանման եւ յաջորդ սերունդներին արժանապատիւ ապագայ ապահովելու համար:

Մայր օրէնքի հանդէպ յարգանքը, դրանով մեր իրաւունքներին տէր լինելը եւ, միաժամանակ, մեր պարտականութիւնները կատարելն այդ գործընթացների անբաժանելի մասն են»:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Մղձաւանջ Եւ Ճգնաժամ
Next post ԲԱՑ ՆԱՄԱԿ՝ ՀԱՅԱՍՏԱՆԻ ԼՐԱԳՐՈՂԻՆ, ՄՏԱՒՈՐԱԿԱՆԻՆ, ՔԱՂԱՔԱԿԱՆ-ՂԵԿԱՎԱՐԱԿԱՆ ՇՐՋԱՆԱԿԻՆ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles