«Ա՛Լ ԲԱՆ ՉԵՄ ՀԱՍԿՆԱՐ» ՊՈՌԱՑ ԴՐԱՆ ԱՌՋԵՒ ԿԱՆԳՆԱԾ ԿԵԴՐՈՆԱԿԱՆՑԻՆ

0 0
Read Time:1 Minute, 55 Second

 

Մակար ի Գաղիա

25 Յունիս 2021

            Դիմաւորեցի եւ ներս հրաւիրեցի յուսահատի շեշտով բացագանչող Արմենակը:

            Պահուած հին «Նոյակ» կոնեակի շիշը դրի սեղանին վրայ:

            – Հանդարտի՛ր, Արմենակ, ի՞նչ պատահած է, որ այդպէս տակնուվրայ եղած ես:

            Տպիչէն ելած էջ մը դրաւ առջեւս: Ըսաւ՝

            – Կարդա՛ բարձրաձայն: Եթէ հասկնաս, բացատրէ՛:

            Գրուած էր. «Այսօրուայ ԿԸՀ վերահաշուարկի արդիւնքում «Հայաստան» դաշինքի ձայներն աւելացել են 744-ով, ՔՊ-ի ձայները՝ 659-ով»: Կային ճշդումներ՝ բոլորին համար: Օրինակ, «Ազգային ժողովրդավարական բեւեռ՝ –60, Ինքնիշխան Հայաստան՝ +52…»

            – Մակա՛ր, ինչ որ կարդացիր նմուշ մըն է: Քուէ հաշուողները համրել չե՞ն գիտեր: Երբ սխալները մէկէ աւելի են, անոնք ակամայ չեն, տխմարը չի տեսներ, որ արդիւնքները խարդախուած են: Սխալները մէկ կամ տասը չեն:

            – Արմենա՛կ, կը զարմանա՞ս, ընտրութիւն խարդախել քաղաքական բարքերու մաս կը կազմէ: Հայաստան ինչո՞ւ ուրիշ երկիրներու աչքաբացներէն ետ պիտի մնայ:

            – Բանկալի իմաստունի պէս մի՛ ըսեր, որ երեւոյթը ընթացիկ է, որ նոր ցնցումներ պէտք չէ ստեղծել, եւ թոյլ տալ որ իշխանութիւնը լուրջ բաներով զբաղի: Ինչո՞ւ նկատի չես ունենար նաեւ պարտութեան եւ խարդախուած ընտրութեան հետեւանքները: Ամէն մարդ չի մնար եւ չի պայքարիր, ճամպրուկը կ’առնէ եւ կ’երթայ:

            – Միշտ գացողներ եղած են: Այդպէս է որ Ռուսիա միլիոնով հայկական համայնք ունի, դասական սփիւռքը միլիոն արտագաղթածներով աճած է:

            – Մակա՛ր, քանի մը դժգոհի կամ աշխատանք փնտռողի հարց չէ: Թիւերը ապագայի հանդէպ յոռետես կը դարձնեն: Մամուլը կը մենախօսէ,  կ’ահազանգէ:

            Արմենակ տպիչէն ելած էջ մըն ալ դրաւ առջեւս: Կարդա՛ բարձրաձայն:

            Կարդացի. «Ժողովուրդ» օրաթերթը Քաղաքացիական աւիացիայի կոմիտէից տեղեկացաւ, որ «Զուարթնոց» օդանաւակայանից յունուարմայիս ամիսներին մեկնել է 293 հազար 754, իսկ ժամանել 232 հազար 518 ուղեւոր:«Շիրակ» օդանաւակայանից այս տարուայ հինգ ամիսներին մեկնել է 30 հազար 975, վերադարձել`14 հազար 209 ուղեւոր»: Արմենակ կասեցուց զիս.

            – Հիմա հանում-գումարում ըրէ, 70, 80 կամ 90 հազար չվերադարձող: Գիտես, Մակա՛ր, անոնց տեղ նորեր պիտի գան, ոչ սփիւռքի եւ արտագաղթածներու միլիոնները: Եթէ վաղը հաշտութիւնը գոյանայ, զիջումով կամ առանց զիջումի, հեռուի եւ մօտի դրացիներ պիտի գան, կու գան արդէն, փոխարինելու մեկնողները, եւ տուն-տեղ պիտի ըլլան: Եւ անցեալի հպարտութեամբ յայտարարուած «համաշխարհային ազգ»ի հայրենիքը պիտի փոխուի, թերեւս որպէս յիշատակ կը մնայ անունը:

            – Յոռետես ես, Արմենա՛կ:

            – Լաւատե՞ս ըլլամ աղանդներու ներխուժումով եւ սեռային այլասերումներու լապորաթորիա ըլլալու նորարարութեամբ:

            Բաժակի կոնեակը թարմացուցի: Արմենակը հանդարտեցնելու համար ըսի.

            – Ամառ չկայ: Յունիսի վերջն ենք եւ անձրեւ, կարկուտ, փոթորիկ, հեղեղ:

            Տխրած Կեդրոնականցին լուռ մնաց: Կուլ տուաւ կոնեակը: Եւ գնաց:

            Տպիչէն ելած ցաւ պատճառող էջերը մնացին սեղանին վրայ:

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Սեդա Պարսումեան-Տատոյեանի «Իսլամը Հայ Գրական Մշակոյթին Մէջ. Բնագիրներ, Հիմնավայրեր, Ուժընթացք» Նոր Հատորը (Islam In Armenian Literary Culture. Texts, Contexts, Dynamics)
Next post ԸՆՏՐՈՒԹԻՒՆՆԵՐ ԵՒ ՀՈՐԻԶՈՆՆԵՐ – Ա. ԻՆՉՊԷ՞Ս ՀՈՍ ՀԱՍԱՆՔ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles