«Հայաստան» Դաշինքի Բազմամարդ Հանրահաւաքները

0 0
Read Time:3 Minute, 0 Second


Արտահերթ ընտրութեան քանի մը օր մնացած, ընտրարշաւը մեծ թափով շարունակուեցաւ Հայատանի բոլոր շրջաններէն ներս:
Շաբաթասկիզբին, «Հայաստան» դաշինքի առաջնորդները բազմամարդ հանրահաւաք կազմակերպեցին Երեւանի Շէնգաւիթ վարչական շրջանին մէջ: Ողջունելով հաւաքի մասնակիցները, «Հայաստան» դաշինքի առաջնորդ, Հայաստանի Հանրապետութեան երկրորդ նախագահ Ռոպերթ Քոչարեան նշեց, որ իրենք չափազանց մեծ պատասխանատուութեան տակ կը մտնեն:
« Սիրելի՛ ժողովուրդ, ես միշտ գործի մարդ եղած եմ, սակայն այնպիսի իրավիճակ ստեղծուած է, որ նաեւ խօսող մարդ պէտք է դառնալ, քանի որ ժամանակակից աշխարհին մէջ խօսքի ուժը հզօր է: Այդ խօսքը պէտք է հասցնենք իւրաքանչիւր քաղաքացիի: Ըսէ՛ք բոլորին, որ «Հայաստան» դաշինքը կու գայ ուժեղ Հայաստան կառուցելու:… Հայաստան ըսելով կը հասկնանք ամուր ոտքերու վրայ կանգնած, ժողովրդավարական, ուժեղ, մարտունակ բանակ, հզօր տնտեսութիւն ունեցող երկիր, որով կը հպարտանանք իւրաքանչիւրս», ըսաւ Ռոպերթ Քոչարեան:
Հ.Յ.Դ. Հայաստանի Գերագոյն մարմինի եւ «Հայաստան» դաշինքի ներկայացուցիչ Իշխան Սաղաթէլեան նշեց, որ Հայաստանին այսօր պէտք է իշխանութիւն, որ պիտի մտածէ իր հասարակութեան կրթութեան, առողջութեան մասին եւ երկրին մէջ հաստատէ ընկերային արդարութիւն:
«Բոլորդ քաջ կը գիտակցիք, որ մեր երկիրը ճգնաժամի մէջ է: Ի՞նչ անհրաժեշտ է այսօր Հայաստանին. ազգային իշխանութիւն, որ պէտք է ունենայ ազգային գաղափարախօսութիւն եւ հիմք դնէ ազգային պետութեան: Այսօր Հայաստանին անհրաժեշտ է իշխանութիւն, որ տէր կանգնի իր քաղաքացիին, գիւղացիին, երկրի սահմաններուն, համահայկական ժողովուրդին: Այսօր Հայաստանին պէտք է իշխանութիւն, որ ոչ թէ պիտի ընէ ամէն ինչ իր ժողովուրդին հաճելի երեւնալու, այլ` իր ժողովուրդին օգտակար ըլլալու համար», ըսաւ ան:
Սիւնիքի նախկին մարզպետ Վահէ Յակոբեան յայտնեց, թէ իշխող կուսակցութիւնը քաղաքական հոգեվարքի մէջ է: «Այնքան պառակտեցին ազգը, որ պառակտումը մտաւ իրենց խումբին մէջ ու հիմա իրենց խմբակիցներէն շատերը արդէն համակերպուած են պարտութեան հետ եւ չեն ուզեր կիսել իրենց առաջնորդին ո՛չ պատասխանատուութիւնը, ո՛չ ալ ճակատագիրը: Մենք կու գանք, որ միաւորենք ազգը, մենք յոգնած ենք թշնամանքէն, սուտէն, մենք պիտի բերենք հանգստութիւն մեր ազգին եւ իրարու հետ պիտի անցնինք շատ դժուար ճամբայ», շեշտեց ան:
Նոր Հաճընի ընտրողներուն հետ հանդիպումի մը ընթացքին Հ.Յ.Դ. Հայաստանի Գերագոյն մարմինի ներկայացուցիչ, «Հայաստան» դաշինքի անդամ Իշխան Սաղաթէլեան յայտարարեց. «Ապագայ կայ, բայց այդ ապագան առանց Նիկոլի եւ նիկոլականութեան է: Յունիս 20-ին Հայաստանի քաղաքացին պէտք է խաչ քաշէ անոնց վրայ, տուն ճամբէ, որպէսզի կարենանք կերտել նոր, հզօր եւ ուժեղ Հայաստան», ըսաւ Սաղաթէլեան:
Իսկ Աբովեանի ընտրողներուն հետ հանդիպումին ընթացքին Հ.Յ.Դ. Հայաստանի Գերագոյն մարմինի անդամ, «Հայաստան» դաշինքի անդամ Արծուիկ Մինասեան յայտնեց. «Կը հաստատենք, որ գործ ունինք Նիկոլի եւ նիկոլականութեան` իբրեւ հակաազգային, հակաքրիստոնէական, հակապետական եւ հակամարդկային աղանդի հետ: Որեւէ այլ հաստատում չի կրնար ըլլալ, երբ թուրքը նստած Հայաստանի սահմանին` կը մորթէ հայ մարդը, կ՛ոչնչացնէ հայոց պետականութիւնը, եւ տակաւին կը մնան մարդիկ, որոնք կը պաշտպանեն Նիկոլ Փաշինեանը: Ասիկա այլ բնորոշում, քան «աղանդ», չունի: Այս աղանդը հիմնուած է կոյր հաւատքի եւ սիրոյ վրայ», ըսաւ ան:
Լոռի մարզին մէջ ալ «Հայաստան» դաշինքի առաջնորդներն ու անդամները հանդիպումներ ու հանրահաւաքներ ունեցան Սպիտակի, Ստեփանաւանի, Տաշիրի, Վանաձորի եւ Ալաւերտիի մէջ: Ռոպերթ Քոչարեան վերյիշեցուց աղէտի գօտիին մէջ իր կատարած աշխատանքը` նշելով, որ 20 Յունիսէն ետք Հայաստանի մէջ պիտի ըլլայ այնպիսի կառավարութիւն, որուն համար պատուի հարց պիտի ըլլայ գերակատարել այդ արդիւնքները:
Հանդիպումներու ժամանակ դաշինքի առաջնորդները անդրադարձած են կրթութեան ոլորտին` նշելով, որ ազգային արժէքային համակարգի դէմ ուղղուած փոփոխութիւնները պիտի վերացուին:
Մինչ այդ, հանդիպումներու եւ քննարկումներու ծիրին մէջ Ուրբաթ, Յունիս 11-ին, Ռոպերթ Քոչարեան տեսակապով քննարկում ունեցաւ12 երկիրներէ (Միացեալ Նահանգներ, Գանատա, Ֆրանսա, Գերմանիա, Անգլիա, Իրան, Լիբանան, Ռուսիա, Քուէյթ, Արաբական Միացեալ Էմիրութիւններ եւ այլն) հայ հասարակական-քաղաքական գործիչներու, մտաւորականներու, գործարարներու հետ: Քննարկումին մասնակցեցան շուրջ 240 հայրենակիցներ, որոնց կարգին արեւելեան Ա.Մ.Ն.-ի Հ.Յ.Դ. Կեդրոնական Կոմիտէն եւ «Հայրենիք»-ի ներկայացուցիչները:
Քննարկումի հիմնական նիւթն էր արդէն երեք տարի դէպի Հայաստան ընդհատուած ներդրումային հոսքի վերականգնումը: Քննարկուեցան նաեւ Հայաստանի առջեւ կանգնած ներկայ հիմնախնդիրներու, լուծման ուղիներու, հայրենիք-սփիւռք յարաբերութիւնները որակապէս նոր մակարդակի բարձրացնելու, Հայաստանի վերականգնման գործին մէջ սփիւռքահայ մասնագէտներու ներուժի օգտագործման, համահայկական օրակարգեր ձեւաւորելու հարցերը:
Առցանց հանդիպումը կազմակերպած էր Հ.Յ.Դ. Բիւրոն:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post «Հայաստան Դաշինք»-ի Ընտրական Ծրագիրը Եւ Մենք
Next post ՍԼԱՔՆԵՐ.- ԱՏՐՊԷՅՃԱՆԷՆ ՆՈՐ «ԿԱՌՈՒՑՈՂԱԿԱՆ ՔԱՅԼԵՐ»…

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles