ՍՏՐԿԱՑԱԾ Հ1,  ՊԱՐՏՈՒԹԻՒՆԸ ՀՊԱՐՏՈՒԹԻՒՆ Է ԵՒ «ԱԶԳԱԿՈՐԾԱՆ ՊԱՏՈՒՀԱՍ»-Ը

0 0
Read Time:1 Minute, 49 Second

 

            Մայիսի վերջին կիրակի: Ժպիտ կար: Վերջ մեկուսացման: Եւ Մայրերու Օր: Էլպիս եւ Արմենակ սպիտակ վարդերով եկան:

            Արմենակ ըսաւ, որ ճաշի հոգ չկայ: Իտալացիէն փիձձա ապսպրած է եւ քամած մածուն բերած՝ թանի համար:

            Թզենիի շուքին սեղան դրինք, երկու մեծկակ փիձձա բերաւ երիտասարդ մը: Թանն ալ եկաւ սառոյցով ճոխացած սափորով:

            Արմենակ երեքիս խօսեցաւ նախարարի պէս:

            – Լսեցէ՛ք: Հրաժարած վարչապետը ընտրապայքար կը մղէ պետական միջոցներով: Հեռատեսիլի լրագրողները կը հետեւին, կը խօսին հրաժարեալի տեղափոխութիւններուն մասին, կրկին կը սփռեն անոր ամբոխահաճական ճառերը: Կարծէք ուրիշ թեկնածու չկայ, ընդդիմութիւն չկայ: Թեկնածու է, բայց կը շրջի ոստիկանական ինքնաշարժներու շարասիւնով: Եթէ նախկինները այսպէս վարուէին, պիտի գոռար, որ կոռուպցիա է:

            Էլպիս յարեց.

            – Այդ ըսած շարասիւնիդ ոստիկանները քաղաքացի չե՞ն, յանցաւոր են, մեղսակից են:

            Մակարուհին աւելցուց.

            – Արմենա՛կ, աշխարհ տեսած մարդ ես, կրնա՞ս բացատրել պաշտօնակատարի այն միտքը, որ ինք պարտուած է բայց պարտութեամբ՝ հպարտ: Ի հարկէ, հպարտառիթ պարտութեան համար, իրեն պէտք է վստահիլ երկրի ղեկը:

            – Ոստիկանները, լաւ կը վարձատրուին, երկրին չեն ծառայեր: Մենատիրական երկիրներու մէջ կ’ըսեն՝ տիրոջ կը ծառայեն, կամազուրկ են:

            Իմ կարգիս ըսի.

            – Հրաժարողներ եղան: Անոնց դէմ քրէական հարց կը յարուցուի: Ոստիկան կամ քաղաքացի, միշտ կը խուսափին դատ-դատաստանէ:

            – Այդ ալ քաղքենիացման հետեւանք է: Իսկ ինչ կը վերաբերի պարտութեամբ հպարտանալու հերոսութեան, ի՞նչ կրնամ ըսել: Բառարաններու մէջ սրբագրութիւն պէտք է ընել: Պարտութիւնը կը յուզէ, կ’ընկճէ, հոգեկան քանդում կը բերէ: Պաշտօնակատարը իր յեղափոխական բառարանագէտի ապագան կը պատրաստէ: Պարտութեան դիմաց պիտի գրէ՝ առիթ եւ պատճառ հպարտութեան,- ըսաւ Արմենակ:

            – Գէշ գաղափար չէ, եթէ քիչ մըն ալ զբաղի պետական-քաղաքական առաջնորդներու արդիականացած-օտարացած-նեխած լեզուի հայացումով, Մատենադարանին առջեւ իր արձանն ալ կը դնեն,- ըսի:

            – Մակա՛ր, լսէ վերջին լուրը: Հայաստանի առաջին նախագահի գրասենեակէն պատասխանած են հողատու պաշտօնակատարի բանավէճի հրաւէրին, որ ան «ազգակործան պատուհասի հետ խօսելիք չունի»: Իսկ երկրորդ նախագահէն նոյն հրաւէրին համար ըսած են, որ «Հայաստանի Հանրապետութեան նախագահը, որը ազատագրել է հողեր, չպէտք է որեւէ իրավիճակում բանավիճի հողեր յանձնողի հետ»:

            Մակարուհին միջամտեց.

            -Կը խօսին: Բայց պարտութեամբ հպարտացող հրաժարեալ վարչապետը կ’ըսէ, որ իր ցանկը կը ստանայ ձայներու 60 տոկոսը:

            – Եթէ այդ ըլլայ ընտրութեան արդիւնքը, պէտք է քննադատել մամուլը, որ ճիշդ լուրը չի հասցներ քաղաքացիին:

            Էլպիս եզրակացուց.

            – Մի՛ յոգնիք: Հայաստանցին դուխով կը քուէարկէ: Դուխը կը կրակէ «նախկիններու» դէմ: Եւ վերջ:

            Այրած սրտերու դարման է սառնորակ թանը:

            Մակարուհին լեցուց բաժակները:

 

Մակար ի Գաղիա, 2 Յունիս 2021

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՏՈՄՍԵՐ.- ԳՐԱՒՈՐ՝ Ո՛Չ, ԲԵՐԱՆԱՑԻ՝ ՎՍՏԱ՛Հ
Next post Որո՞ւ Հաւատանք

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles