Վախճանեցաւ Հայագէտ Հայր Յարութիւն Վրդ. Պզտիկեան


Մխիթարեան միաբանութեան երիցագոյն անդամներէն` Հայր Յարութիւն Վրդ. Պզտիկեան վախճանեցաւ Կիրակի, Ապրիլ 11-ին, Փարիզի մէջ։
Հայր Յարութիւն Վրդ. Պզտիկեան Յուլիս 27, 1937 թուականին ծնած էր Պէյրութի մէջ։ Տեղւոյն Սուրբ Գրիգոր Լուսաւորիչ ճեմարանը աւարտելէ վերջ, 1950 թուականէն սկսեալ ուսում ստացած էր Մխիթարեան միաբանութեան Վենետիկի վանքի վարժարանին մէջ։ Հռոմի համալսարանէն ներս ուսանած էր փիլիսոփայութիւն, աստուածաբանութիւն եւ հոգեւոր երաժշտութիւն։ Հռոմի Գրիգորեան համալսարանէն ստացած էր փիլիսոփայութեան եւ աստուածաբանութեան տոքթորի կոչում։ Օգոստոս 12, 1962 թուականին ձեռնադրուած էր վարդապետ։ Երկու տարի ուսանած էր Վենետիկի Գեղարուեստի ակադեմիայի մէջ։
Կեանքի վերջին տարիներուն Հայր Յարութիւն Վրդ. Պզտիկեան կը պաշտօնավարէր՝ որպէս Սեւրի Սամուէլ-Մուրատեան երբեմնի վարժարանի տնօրէնը։ Թէեւ ան վաղուց դադրած է կրթական օճախ մը ըլլալէ, սակայն ընդարձակ համալիրը կ՚օգտագործուի զանազան ընկերամշակութային նպատակներով եւ Հայր Յարութիւն Վրդ. Պզտիկեան այդ տարածքի պահապանն ու վերահսկիչն էր երկար տարիներէ ի վեր։
84 տարեկան հասակին երկրաւոր կեանքէ հեռացած Հայր Յարութիւն Վրդ. Պզտիկեան ծաւալած էր բազմակողմանի գործունէութիւն։ Կրթական ոլորտէ ներս ունեցած մեծ ներդումին առընթեր ան ծանօթ էր՝ որպէս աստուածաբան, արուեստաբան, գեղանկարիչ, փիլիսոփայութեան ու արուեստի տոքթոր։
Հոգեւոր եւ ստեղծագործական աշխատանքներուն զուգահեռ՝ Հայր Յարութիւն Վրդ. Պզտիկեան կեանքի կոչած էր նաեւ խմբագրական աշխատանք։ Եղած էր Հալէպի Մխիթարեան վարժարանի տնօրէն, դասաւանդած էր հայկական զանազան կրթօճախներէ ներս։ Բազմաթիւ գիրքերու հեղինակ էր՝ հայերէնով եւ օտար լեզուներով։ Դասաւանդած էր նաեւ Փարիզի Սամուէլ-Մուրատեան վարժարանին մէջ, եղած էր Մխիթարեան միաբանութեան «Բազմավէպ» պաշտօնական պարբերաթերթի խմբագրապետը։ Գրականագիտական, հայագիտական, արուեստի եւ մանկավարժութեան վերաբերեալ հայերէնով եւ օտար լեզուներով զանազան աշխատութիւններ կատարած էր։ 2018 թուականին, Ֆրանսախօսութեան միջազգային կազմակերպութեան Երեւանի մէջ կազմակերպուած գագաթաժողովի շրջանակներէն ներս, «Նարեկացի» արուեստի միութեան յարկին ներքեւ հանդէս եկած էր դասախօսութիւնով մը, որ նուիրուած էր «Նափոլէոն Պոնափարթի կապը Մխիթարեան միաբանութեան հետ» նիւթին։
Հայր Յարութիւն Վրդ. Պզտիկեան իր մահկանացուն կնքեց Մխիթարեան միաբանութեան Սամուէլ-Մուրատեան վարժարանի յարկէն ներս, իր աշխատասենեակին մօտ։ Մինչեւ վերջին պահը վարդապետը աղօթած է, աշխատած եւ ստեղծագործած յանուն հայ ազգի, Հայաստանի եւ յանուն բարիի։

Be the first to comment

Leave a Reply

Your email address will not be published.


*