GALLUP ՀԱՐՑԱԽՈՅԶԻ ԿԱԶՄԱԿԵՐՊՈՒԹԵԱՆ ՀԱՅԱՍՏԱՆԻ ՆԵՐԿԱՅԱՑՈՒՑՉՈՒԹԵԱՆ ԹԻՒԵՐՈՒ ՀԵՏՔՈՎ

Յ. Պ. 

Վէճերը այդքան երկար պիտի չտեւէին  եթէ յանցանքը մէկ կողմի ըլլար:

Ֆրանսուա տը լա Ռոշըֆուքօ, ԺԷ դարու ֆրանսացի գրող*

 

            Թիւերու լեզուն, եթէ կեղծուած չէ, վիճելի չ’ըլլար: GALLUP հարցախոյզի միջազգային կազմակերպութեան Հայաստանի ներկայացուցչութեան հրապարակած թիւերը հայաստանեան ներկայի անհաճոյակատար պատկերը կը ներկայացնեն (radioscopie):

            15-էն 17 փետրուար կատարուած հարցախոյզը կու տայ Հայաստանի հանրային կարծիքի շողանկարը: Ի հարկէ, հանրային կարծիքը միշտ փոփոխական է, եւ փետրուարէն ապրիլ կարծիքները կը փոխուին:

            Բայց տրուած թիւերը, ներսի եւ դուրսի մտահոգ եւ հետաքրքրուող հայը պէտք է մղեն մտածելու ընելիքի մասին:

            Առաջին տպաւորութիւն. ոչ մէկ «ղեկավար» միջինէն վեր, կէսէն աւելիի, դրական գնահատանք չունի: Նիշ տրուած է 10-ի վրայ.

Նիկոլ Փաշինեան՝ 2,8 կէտ

Նախագահ Արմէն Սարգսեան՝  2,3 կէտ

Առաջին նախագահ Լեւոն Տէր Պետրոսեան՝ 1,7 կէտ

Երկրորդ նախագահ Ռոբերտ Քոչարեան 2 կէտ

Երրորդ նախագահ Սերժ Սարգսեան՝ 1,7 կէտ

ԲԱՐԳԱՒԱՃ ՀԱՅԱՍՏԱՆ Կուսակ. նախ. Գագիկ Ծառուկեան՝  2,2 կէտ

ԼՈՒՍԱՒՈՐ ՀԱՅԱՍՏԱՆ Կուսակ. ղեկավար Էտ. Մարուքեան՝1,8 կէտ

Մայր Հայրենիք կուսակ. պետ Արթուր Վանեցեան՝ 1,5 կէտ

Հայաստանի Փրկութեան Շարժման առաջնորդ Վազգէն Մանուկեան՝ 1,6 կէտ

Հ.Յ.Դ.-ի ներկայացուցիչ Իշխան Սաղաթէլեան՝ 1,6 կէտ

            Ըստ արդիւնքին, 58%-ին համար արտահերթ ընտրութիւնները անհրաժեշտ են:

            Այն հարցումին, որ ընտրութիւնները եթէ կայանան յառաջիկայ կիրակի, ո՞ր կուսակցութեան կը քուարկեն.

ԻՄ ՔԱՅԼԸ՝ 33,1%,

ԲԱՐԳԱՒԱՃ ՀԱՅԱՍՏԱՆ՝ 4,4 %,

ԼՈՒՍԱՒՈՐ ՀԱՅԱՍՏԱՆ՝ 2,6 %,

ՀԱՆՐԱՊԵՏԱԿԱՆ՝ 2,2 %,

Հ.Յ.Դ.՝ 2,2%,

ՄԱՅՐ ՀԱՅՐԵՆԻՔ՝ 0,9%,

ՀԱՆՐԱՊԵՏՈՒԹԻՒՆ՝ 0,7%,

ՍԱՍՆԱՅ ԾՌԵՐ՝ 0,4 %,

ՔԱՂԱՔԱՑԻԱԿԱՆ ՈՐՈՇՈՒՄ՝ 0,2 %

Այլ անհատական պատասխաններ.

Ռոբերտ Քոչարեան՝ 5,6 %

Վազգէն Մանուկեան՝ 0,9 %

Ոչ ոքի՝ 27,2 %

Շուրջ 40%-ը կը տատամսին, չեն տեսներ կուսակցութիւն մը, որուն ուզեն քուէարկել

38,8% կը խորհին որ Նիկոլ Փաշինեան պէտք է շարունակէ վարչապետի պաշտօնը

43,6% կը խորհին որ Նիկոլ Փաշինեան պէտք է հրաժարի

17,6%  կը դժուարանան պատասխանել

35% էին ըստ 13 Նոյեմբերի հարցախոյզի մը, որ կըսէր, թէ Փաշինեան պէտք է հրաժարէր

            Ինքզինքս կը գտնեմ ողջախոհական խնդրի մը առջեւ: Հայաստան արձանագրուած են 91 եւ աւելի կուսակցութիւններ, որոնց 80-ի հետքն անգամ չկայ GALLUP-ի հարցախոյզի արդիւնքին մէջ: Ո՞ւր են այդ կուսակցութիւնները, ի՞նչ բանի կը ծառայեն կամ կրնան ծառայել: Ինչո՞ւ ստեղծուած են: Տարօրինակը այն է, որ անոնք կը խօսին, կը գրեն, տեղ ունին լրատուամիջոցներուն մէջ, կարծէք նոյնիսկ կը քաջալերուին: Ամէն անգամ որ անձ մը «դժգոհութիւն» ունենայ կամ «լուսաւոր գաղափար մը» յղանայ, եթէ ինքզինք առաքեալ, մեսիա համարէ եւ կուսակցութիւն հիմնէ, քաղաքական կեանքի խառնակութիւնը եւ խառնաշփոթը կը շեշտուի: Բնական հետեւութիւնը կ’ըլլայ այն՝ որ անկարելի կ’ըլլայ երկիրը կառավարել:

            Այս ընթացքով անկարելի կ’ըլլայ ճշմարիտ քաղաքական վիճարկումը, կը խոչնդոտուին վերականգնումի նախաձեռնութիւնները: Իւրաքանչիւրը իր ծրագրով իր շուրջ համախոհներ պիտի խմբէ, այդ ընելու ու արեւուն տակ տեղ ունենալու համար պիտի քննադատէ միւսները, մրցակցութիւն՝ որ բնական է ժողովրդավարութեան մէջ: Անբնական է չափազանցութիւնը: Կրնա՞ք երեւակայել կացութիւնը, երբ այդ 80 կուսակցութիւններն ալ հարցախոյզին մէջ տեսնուին, եթէ նիշ տալու եղանակը 10էն վերածուի… 1000ի, եւ ըսուի, որ այս կամ այն կուսակցութիւնը կը յաւակնի ունենալ ձայներու 1000էն կամ 2ը, 3ը, 4ը…

            Այս կացութիւնը ինծի կը յիշեցնէ Անգլիոյ մէջ միութեան մը պարագան, որ կը կոչուէր Պեխը Ածիլածներու Միութիւն

            Եթէ նպատակ է հանրային ծառայութիւնը, այսօր՝ Հայաստանի վերականգնումը, տարտղնումով ինչպէ՞ս հզօրութիւն կը ստեղծուի: Կուսակցութիւն մը եսերու բաւարարութիւն տալու կոչուած կրպակ չէ: Հարիւրեակ մը կուսակցութիւններէն իւրաքանչիւրը խղճով ինքնիրեն հարց պէտք է տայ, թէ ի՞նչ է իր տարբերութիւնը միւս 99էն, ո՞ր մէկուն հետ տարակարծիք ըլլալու պատճառներ չկան 

            Եթէ երկրին առաջեւ ծառացած հիմնահարցերու լուծման համար հինգ ճանապարհներ կան, թերեւս երկու, կամ մէկ, ըստ այնմ պէտք է խմբուիլ:

            Կուսակցութիւնները կառավարման եւ խնդիրներու լուծման պէտք է ծառայեն, ոչ եսի, ինչ որ տուեալ կուսակցութիւնը վաղ թէ ուշ կը տանի վարկաբեկման:

            Հարիւրեակ մը կուսակցութիւններով կարծէք հազար տարի ետ գացած ենք եւ կը ձգտինք վերակենդանացնել աւատապետական դրութիւնը:

            Կրկին կարդալ պատմահայր Խորենացիի ՈՂԲԸ.

            «Ողբամ զքեզ, Հայոց աշխարհ, ողբամ զքեզ, հանուրց հիւսիսականաց վեհագոյն. զի բարձաւ թագաւոր եւ քահանայ, խորհրդական եւ ուսուցող. վրդովեցաւ խաղաղութիւն, արմատացաւ անկարգութիւն. դրդուեցաւ ուղղափառութիւն, կայկայեցաւ տգիտութեամբ չարափառութիւն»:

            Այս երէ՞կ էր…

            Խորենացին մեր ժամանակակի՞ցն է…

 

 

 

Be the first to comment

Leave a Reply

Your email address will not be published.


*