Ատրպէյճան Ոչնչացուցած Է Մեխակաւանի Սուրբ Աստուածածին Եկեղեցին


«Պի.Պի.Սի.» լրատուական ծառայութեան կողմէ շրջանառութեան մէջ դրուած են տեսանիւթեր, որոնց մէջ փաստացի տուեալներով կը ներկայացուի Մեխակաւանի Զօրաւոր Սուրբ Աստուածածին եկեղեցւոյ հիմնայատակ աւերումը, որ կատարուած էր շրջանին՝ Ատրպէյճանի վերահսկողութեան տակ անցնելէն ետք: Նոյն եկեղեցին Արցախի վրայ ատրպէյճանական վերջին յարձակումին ընթացքին արդէն իսկ ենթարկուած էր սրբապղծման:

Հայաստանի արտաքին գործոց նախարարութեան մամլոյ քարտուղար Աննա Նաղտալեան յայտնեց, որ Ատրպէյճան առ այսօր ամրագրած է իր դիրքը՝ իբրեւ քրիստոնէական ժառանգութեան ոչնչացման յառաջամարտիկ:

Հայաստանի մարդու իրաւունքներու պաշտպան Արման Թաթոյեան դիտել տուաւ, որ Մեխակաւանի Զօրաւոր Սուրբ Աստուածածին հայկական եկեղեցւոյ աւերումը յաւելեալ ապացոյց է, որ Արցախի մէջ հայերուն նկատմամբ գործադրուած է ցեղային զտումներու ու ցեղասպանութեան քաղաքականութիւն։ «Դեռ պատերազմի ժամանակ էին ադրբեջանական զինուորականները հրապարակել տեսանիւթ, թէ ինչպէս են նրանք ցինիզմով անարգանքի, վանդալիզմի ենթարկում հայկական եկեղեցին։ Հայաստանի մարդու իրաւունքների պաշտպանի աշխատակազմը թարգմանել ու վերլուծել է տեսանիւթը, որը բացայայտ վկայում է կրօնական ատելութեան եւ հայկական եկեղեցին քանդելու մտադրութեան մասին», կը նշուի յայտարարութեան մէջ։

Արման Թաթոյեան ցցուն նկատեց այն փաստը, որ եկեղեցին աւերուած է ոչ թէ ռազմական գործողութիւններուն ընթացքին, այլ անոնց դադրելէն ետք:

«Տեղի ունեցածը Ադրբեջանում հայատեացութեան եւ կրօնական հիմքով ատելութեան քաղաքականութեան հերթական արդիւնքն է, միջազգայնօրէն երաշխաւորուած կրօնական ազատութեան կոպիտ ոտնահարում», շեշտեց Հայաստանի մարդու իրաւուքններու պաշտպանը: «Միջազգային հանրութիւնը պէտք է օր առաջ միջոցներ ձեռնարկի Ադրբեջանի կողմից նախորդ տարուայ Սեպտեմբերի 27-ից սկսուած եւ մինչ օրս շարունակվող յանցագործութիւնների, այդ թւում՝ մշակութային ցեղասպանութեան դադարեցման եւ դատապարտման ուղղութեամբ», յայտնեց Աննա Նաղտալեան։

Արցախի հոգեւոր-մշակութային ժառանգութեան պահպանման յանձնախումբ դիտել տուաւ, որ Ատրպէյճանի իշխանութիւնները եւ մասնաւորաբար նախագահ Իլհամ Ալիեւ, անտեսելով միջազգային մարդասիրական ու մշակութապահպան կազմակերպութիւններու, պատմաբաններու, հնագէտներու, պետական այրերու կոչերն ու յորդորները՝ կը շարունակէ կեղծիքի տարածման իրենց քաղաքականութիւնը՝ Արցախի դարաւոր հայկական սրբավայրերը ներկայացնելով իբռեւ «հին ուդիական կրօնական ժառանգութիւն», ինչպէս նաեւ պղծելով եւ աւերելով հայկական եկեղեցիները։

 

Be the first to comment

Leave a Reply

Your email address will not be published.


*