Նախագահ Պայտընին Կոչ` Ճանչնալու Հայոց Ցեղասպանութիւնը

ՈՒԱՇԻՆԿԹԸՆ․- Հայ Դատի յանձնախումբը կը տեղեկացնէ, թէ Միացեալ Նահանգներու 38 ծերակուտականներ (առ այժմ) միացած են Միացեալ Նահանգներու Ծերակոյտի արտաքին յարաբերութիւններու յանձնախումբի նախագահ Ռոպըրթ Մենենտէսի նամակին` նախագահ Ճօ Պայտընին կոչ ուղղելով հետեւելու Քոնկրէսի օրինակին եւ ամբողջութեամբ ու պաշտօնապէս ճանչնալու Հայոց ցեղասպանութիւնը:

Մենենտէս նամակին մէջ Պայտընին յիշեցուցած է, որ նախապէս, այդ թուականին եւ 2020 թուականի նախընտրական քարոզարշաւի ծիրին մէջ ան ճանչցած է Հայոց ցեղասպանութիւնը:

Ծերակուտականը յիշեցուցած է, որ Դեկտեմբեր 2019-ին Միացեալ Նահանգներու Ծերակոյտը, իսկ Ապրիլ 2020-ին նաեւ Ներկայացուցիչներու տունը որդեգրած էին համապատասխան բանաձեւեր, որոնցմով 1915 թուականին կատարուածը կը ճանչնային իբրեւ Հայոց ցեղասպանութիւն: Ան ընդգծած է, որ ժամանակն է, թէ գործադիր մարմինը եւս ճանչնայ պատմական իրողութիւնը:

«Մենք կը յորդորենք` նոյնը ընել արդէն նախագահի պաշտօնին վրայ` յստակացնելով, որ Միացեալ Նահանգներու կառավարութիւնը կը ճանչնայ այս սարսափելի ճշմարտութիւնը։ Դուք ճշմարիտ կերպով յայտարարած էք, որ ամերիկեան դիւանագիտութեան եւ արտաքին քաղաքականութեան հիմը պէտք է ըլլան մեր արժէքները, ներառեալ յարգանքը համաշխարհային իրաւունքներու նկատմամբ: Այդ արժէքները կը պահանջեն, որ մենք ճանչնանք ճշմարտութիւնն ու կարելի ամէն բան ընենք կանխարգիլելու ապագայ ցեղասպանութիւններն ու մարդկութեան դէմ միւս յանցագործութիւնները: Ինչպէս նշած էիք նախորդ ապրիլին Հայոց ցեղասպանութեան յիշատակի օրուան ընթացքին կատարուած ձեր յայտարարութեան մէջ` «յատկապէս կարեւոր է խօսիլ այս մասին ու ոգեկոչել այս պատմութիւնը այնպիսի պահու մը, երբ մենք ամէն օր աւելի կը գիտակցինք ճշմարտութեան ուժին եւ մեր հաւաքական պատասխանատուութեան` կանգնելու ընդդէմ ատելութիւնը, որովհետեւ լռութիւնը մեղսակցութիւն է»: Երկու կուսակցութիւններու վարչակազմերը լուռ եղած են Հայոց ցեղասպանութեան ճշմարտութեան հարցին մէջ: Մենք ձեզի կոչ կ՛ուղղենք կոտրելու մեղսակցութեան այս օրինաչափութիւնը եւ պաշտօնապէս ճանչնալու, որ Հայոց ցեղասպանութիւնը ցեղասպանութիւն էր», կը նշուի նամակին մէջ։

Միւս կողմէ, յունական ազդեցիկ «Քաթիմերինի» թերթի հարցումին պատասխանելով՝ Սպիտակ Տունը կը յայտնէ, թէ Միացեալ Նահանգներու նախագահ Ճօ Պայտըն մտադիր է ճանչնալ Հայոց Ցեղասպանութիւնը եւ վստահեցնել, որ նման վայրագութիւններ երբեք պիտի չկրկնուին։ 38 ամերիկացի ծերակուտականներու՝ Ճօ Պայտընին ուղղուած նամակին առիթով, որով կը պահանջուի Հայոց ցեղասպանութեան ճանաչումը, «Քաթիմերինի»-ի ծմբագրութիւնը հարցում ուղղեց Սպիտակ Տան ներկայացուցիչին, որ պատասխանեց, թէ այս կառավարութիւնը յանձնառու է ստանձնել մարդու իրաւունքներու պաշտպանութիւնը եւ երաշխաւորել, որ այդպիսի վայրագութիւններ պիտի չկրկնուին։ Այս գործընթացի կարեւոր բաժինը կը հանդիսանայ Պատմութեան ճանաչումը։

Յունական թերթին ղրկած իր պատասխանին մէջ, Սպիտակ Տունը կը նշէ թէ նախագահ  Պայտըն անդրադարձաւ 1,5 միլիոն հայ տղամարդոց, կիներուն եւ փոքրիկներուն, որոնք իրենց կեանքը զոհեցին Օսմանեան կայսրութեան վերջին օրերուն։ Ան կը յայտնէ թէ․- «Չենք կրնար մոռնալ, ոչ ալ լուռ մնալ այս ահաւոր եղեռնագործութեան դէմ։ Մենք միշտ պիտի յարգենք հայ ժողովուրդի դիմացկուն ըլլալու իրողութիւնը այսպիսի ողբերգութեան մը դիմաց։ Այս կառավարութիւնը յանձնառու է յառաջ մղելու մարդու իրաւունքներու պաշտպանութիւնը եւ ապահովելու որ նման վայրագութիւններ երբեք պիտի չրկրնուին։ Այս գործընթացի կարեւոր բաժինը կը հանդիսանայ Պատմութեան ճանաչումը»։

 

Be the first to comment

Leave a Reply

Your email address will not be published.


*