ԱԴԱԲՏԱՑՈՒԵԼ ՆՈՐԱՀԱՅԵՐԷՆԻ

0 0
Read Time:1 Minute, 30 Second

 

            Գարնան շունչը կայ: Պարտէզին մէջ ասդին անդին ինքնաբուս սպիտակ եւ դեղին հօրուտներ կան: Ֆրանսացին կ’ըսէ ժոնքիյ: Անկրկնելի Կեդրոնականցին Փարիզի հռչակաւոր Ֆօշոն ծաղարանէն կարկանդակ բերաւ, արեւի գոլով սուրճին ընկերացնելու:

            – Մակա՛ր, որոշեցի Հայաստան հաստատուիլ, լրագրութեամբ եւ քաղաքականութեամբ զբաղիլ:

            – Լաւ կ’ընես, բայց ինչպէ՞ս պիտի հասկնաս զիրենք եւ պիտի հասկցուիս:

            – Ճիշդ: Նորահայերէնով խօսելու եւ գրելու փորձ կ’ընեմ:

            – Հրաշալի՛: Ազգային միութեան մեսիա կ’ըլլաս, եթէ հետեւորդ գտնես:

            – Նորահայերէնով առաջին յօդուածէս պարբերութիւն մը կարդամ, պիտի տեսնես թէ ինչպէս կը հարթուի փոխհասկցողութեան ճանապարհը:

            Մակարուհին սուրճ բերաւ, Ֆօշոնի տուփը բացաւ, հրաշք կարկանդակները դրաւ ափսէի մէջ: Հոգեպէս եւ քիմքով պատրաստուեցանք լսելու Կեդրոնականցի կուրուի միտքը:

            Արմենակ հատիկ հատիկ կարդաց.

            – Հայերէնը աբորտ ընելու համար ապսուրդ ագրեսիայի թիմակիցներ եւ ադեպտներ աժիոտաժի ադմինիստրացիա ունեն, ալտերնատիվ ալյանս կազմած են Հայաստանի ավտոխտոնները, ակտիվ ակտուալացման պրոյեկտով: Այս ադեպտները մոդեռնացման ամբիցիա ունին քաղաքական ամպլիդուտի հասնելու համար, նոր տեմպերով պայքարելու համար անախրոնիզմներու եւ անեքսիաներու դէմ: Աուդո-վիզուալ տեխնոլոկիաներով պիտի դաստիարակեն մասսաները: Ավտոնոմ ըլլալու համար ավտորիցիա ստացած են: Այս ավանգարտիստ բազմաֆունկցիոնալ ավանդուրա է ռեկրեսի դէմ: Բալքիմ կը յաջողի պանդաներու եւ բանկիրներու դէմ, եւ զանոնք դուրս կը բերէ բարիկատներու ետին գտնուող իրենց բասդիոններէն: Յետոյ կը բարիշեն եւ կ’ունենանք բիլակով բենեֆիսային բիզնես պլան: Կը կասեցուի բլոկադան եւ կը հաստատուի պոնուսային մարկեդ: Եզրակացութիւնը կ’ըլլայ գեոպոլիտիկ, գեոստրադեգիական, գերդոզավորում, գերլեգիտիմ, գերնորմատիվային գիտ, գլամուրային գլոբալ գենդերային պրոբլեմները լուծելու համար:

            – Հրաշալի,- ըսի: Բայց սփիւռքահայ տգէտները հասկնա՞ն գրածդ:

            – Սփիւռքը դեբորտ եղածներու մասսա է: Էներգիա եւ էնտուզեազմ չունի: Էպոխան այս է, պէտք է ադաբատացուիլ, այլապէս կը կորսուինք:

            Մակարուհին լուռ հետեւած էր Արմենակի մոդեռնիզացման, բաժակները հաւաքեց, եւ խոհանոց երթալէ առաջ, ըսաւ.

            – Արմենա՛կ, չե՞ս մտածեր հոգեվերլուծողի, սայքօ-անալիսդի մը երթալ: Այս ալ նորոյթ է կուշտերու համար: Յետոյ կը հետեւիս մոդեռնիստական ամբիցիաներուդ:

            – Ճիշդ կ’ըսես: Հայաստան հաստատուելէ առաջ վստահ պէտք է ըլլալ, որ մարդիկ ոչ միայն կորոնավիրուսէն պէտք է բուժուած ըլլան, այլ նաեւ՝ մոդեռնիստական գլուխէ,- եզրակացուց Կեդրոնականցին:

 

Մակար ի Գաղիա, 3 մարտ 2021

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԼՈՅՍ ՏԵՍԱՒ․- ԲԱԳԻՆ 2020 ԹԻՒ 4
Next post …ԳՈՆԷ ԴԻՒԱՆԱԳԻՏՈՒԹԻՒՆԸ ՊԱՀԵՆՔ ԱՆՁԵՌՆՄԽԵԼԻ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles