Հայրենիքի Փրկութեան Շարժումի Լայնածաւալ Հանրահաւաքը


ԵՐԵՒԱՆ․- Շաբաթ,  Փետրուար 20-ին, Ազատութեան հրապարակին վրայ սկիզբ առաւ Հայրենիքի փրկութեան շարժումի հսկայածաւալ հանրահաւաքը:

Հայրենիքի փրկութեան շարժումի վարչապետի թեկնածու Վազգէն Մանուկեան հանրահաւաքին սկիզբը ընդգծեց, որ յուզիչ օր է, քանի որ 33 տարի առաջ նոյնպիսի եղանակի պայմաններու մէջ տեղի ունեցաւ առաջին հանրահաւաքը, որով սկսած է արցախեան շարժումը:

Վազգէն Մանուկեան ընդգծեց, որ այս վիճակէն կրնանք դուրս գալ, բայց կայ նախապայման` այս վարչակազմը պէտք է «դուրս շպրտուի», որմէ ետք միայն կը սկսին իրական քայլերը:

Օրը պատահական չէր ընտրուած` 1988-ին, նոյն օրը սկիզբ առաւ արցախեան շարժումը:

Հանրահաւաքին եկած քաղաքացիները կը պահանջէին Նիկոլ Փաշինեանի հրաժարականը:

Հ․Յ․Դ․ Հայաստանի Գերագոյն մարմինի ներկայացուցիչ, Հայրենիքի փրկութեան շարժումի համակարգող Իշխան Սաղաթէլեան նշեց, որ բոլորը պէտք է հասկնան, թէ ինչ ճամբով պէտք է հեռացնենք այս իշխանութիւնները: «Մենք ծանօթ ենք ձեր տրամադրութիւններուն, տեսած ենք ձեր վճռականութիւնը, գիտենք նաեւ ձեր դժգոհութիւնը, սակայն ունինք պատասխանատուութիւն ձեր նկատմամբ եւ երբեք չենք տանիր արկածախնդրութեան, միասին, յամառ, հետեւողական պայքարի արդիւնքով պիտի հեռացնենք այս չարիքի կառավարութիւնը եւ կառուցենք երազանքներու հայրենիքը», ըսաւ ան եւ կոչ ուղղեց տունը գտնուող քաղաքացիներուն միանալու իրենց:

Ան կարեւոր նկատեց, որ այս համաժողովրդական պահանջը դառնայ համաժողովրդական պայքար: «Յառաջիկային պիտի գումարենք համահայկական ներկայացուցչական մեծ ֆորում, այս պահէն սկսեալ այդ ֆորումի նախապատրաստական աշխատանքներու մեկնարկը տրուած է եւ սկիզբ պիտի դրուի Հայաստանի վերելքի ծրագիրին», շեշտեց Սաղաթէլեան։

Հանրահաւաքին ելոյթներով խօսք առին Հայաստանի նախկին վարչապետ, «Ազատութիւն» կուսակցութեան նախագահ Հրանդ Բագրատեան, Հ․Յ․Դ․-ի անդամ, «Երկիր մետիա» պատկերասփիւռի կայանի լրատուական-վերլուծական բաժինի տնօրէն Գեղամ Մանուկեան, Հայրենիքի փրկութեան շարժումի խորհուրդի անդամ Արփինէ Յովհաննիսեան, Հայաստանի պաշտպանութեան նախկին նախարար Սէյրան Օհանեան, Բարգաւաճ Հայաստան կուսակցութեան նախագահ Գագիկ Ծառուկեան, քաղաքագէտ Գեղամ Նազարեան:

Հայրենիքի փրկութեան շարժումի հանրահաւաքին յաջորդեց երթը Երեւանի Կեդրոնի տարբեր փողոցներով: Երթի մասնակիցները փակեցին կեդրոնական փողոցները:

 

Be the first to comment

Leave a Reply

Your email address will not be published.


*