Հ.Յ.Դ. Նշեց Փետրուարեան Ապստամբութեան Հարիւրամեակը

ԵՐԵՒԱՆ.- Հ.Յ.Դաշնակցութիւնը պատշաճօրէն նշեց Փետրուար 18-ի ապստամբութեան հարիւրամեակը: Հայաստանի Գերագոյն մարմինի անդամները, Հ.Յ.Դ. Երեւանի Քաղաքային կոմիտէութեան ներկայացուցիչները այցելեցին անգլիական այգիին մէջ գտնուող յուշակոթողը` նուիրուած կացինահար եղածներու յիշատակին:

Այս առիթով, խօսք առաւ  Հ.Յ.Դ. Հայաստանի Գերագոյն մարմինի անդամ Արծուիկ Մինասեան յայտնելով, թէ  հարիւր տարի առաջ մենք կը գտնուէինք նոյն վիճակին մէջ, եւ օրին յայտնուեցան հայրենասէրներ, որոնք կրցան Փետրուարեան ապստամբութեամբ Հայաստանին վերադարձնել ազգային եւ պետական քաղաքականութիւնը:

Զուգահեռներ գծելով ներկայի եւ հարիւր տարի առաջուան իրադարձութիւններուն միջեւ՝ Մինասեան հաստատեց. «Հայաստանի ներկայիս իշխանութիւնը եւ նրան շրջապատողները պէտք է հասկանան, որ չի կարելի նոյնատիպ պայմանների մէջ դնել ազգապաշտ ուժերին, որոնք ստիպուած են լինելու գնալ ապստամբութեան:
Ապստամբութիւնը իւրաքանչիւր ազգի բնական իրաւունքն է` հարկադրելու համար ցանկացած իշխանութեանը` վերադառնալու իրական ազգային քաղաքականութեան»:

Հ.Յ.Դ.-ի անդամ Բագրատ Եսայեան իր կարգին յայտնեց, որ շատ արդիական է Փետրուարեան ապստամբութեան թեման` նաեւ այսօրուան տեսանկիւնէն: «Ի հարկէ, իշխանութեան եկած ապազգային ուժերն ամէն ինչ անելու են` վարկաբեկելու համար ամէն ազգային բան: Բայց, եթէ մենք փորձենք վերլուծել, թէ ինչ եղաւ Փետրուար 18, 1921-ին, կը տեսնենք, որ հայ ժողովուրդը ոտքի կանգնեց այդպիսի նմանատիպ մի վարչակարգի դէմ, ինչ որ այն ժամանակ հաստատուել էր Հայաստանում», ըսաւ ան

Գառնիի մէջ կատարուած հաւաքին, Հ.Յ.Դ.-ի անդամ, լեզուաբան, Երեւանի պետական համալսարանի ընդհանուր լեզուաբանութեան ամպիոնի վարիչ Վարդան Պետրոսեան յայտնեց, թէ 1921-ի Փետրուարեան համաժողովրդական ապստամբութեան յաջորդած հարիւր տարիներուն, մասնաւորապէս մինչեւ նախորդ դարու կէսերը, երբ տակաւին ողջ էին ապստամբութեան առաջնորդներէն ոմանք  եւ 1990-էն ետք, երբ հայ ժողովուրդը վերանուաճեց իր անկախութիւնը, այդ իսկապէս նշանաւոր, պատմական իրադարձութեան մասին յաճախ գրուած է, սակայն, սխալած չենք ըլլար եթէ ըսենք, որ մինչեւ օրս ալ անիկա կը մնայ ըստ արժանուոյն չգնահատուած։

 

Be the first to comment

Leave a Reply

Your email address will not be published.


*