Հայկական Բանակ՝ Տօնդ Շնորհաւոր

0 0
Read Time:3 Minute, 54 Second

Գէորգ Պետիկեան

bedig43@aol.com

Յունուար 28 եւ հայկական բանակի ծննդեան տօն:

Իր անկախութենէն ի վեր, ամէն տարի այս թուականին, հայ ժողովուրդը կը նշէ եւ կը տօնախմբէ իր ազգային բանակին հիմնադրութեան օրը: Ու մենք, բոլորս ալ անխտիր, մեր զինեալ ուժերուն ծննդեան այս տարեդարձը, համազգային ուրախութեամբ կը դիմաւորենք: Որովհետեւ ազգովին հաւատացած ենք, որ մեր բանակին մէջ ամրօրէն խարսխուած է հայ ժողովուրդի յաւերժութեան հաւատամքը: Ան է, որ մեր պապենական հողին ապահովութիւնն ու ազատութիւնը կ՝երաշխաւորէ: Ո՛չ մէկ կասկած:

Հայկական բանակ:

Համայն հայութեամբ եւ նոյնքան ալ մեծ հպարտութեամբ կ’արտասանենք այս երկու բառերը, որովհետեւ անոնց մէջ միշտ ներկայ են հայու մարտունակ ոգին, պատրաստակամ զոհաբե-րութիւնն ու հայրենասիրութիւնը, հրաշալիօրէն եւ օրինակելի:

Այս համեստ տողերը, պարզ եւ սակայն յատուկ, մեծ պաշտամունքի մը ծնունդն են անկաս-կած: Բոլորս ալ կը հաւատանք, որ մեր բանակը մեր երկիրը դէպի լուսաւոր ճանապարհ առաջնորդողն ալ է:

Ահա թէ ինչո՞ւ այս առթիւ մեր յարգանքն ու սէրը եւ մեր զօրակցութիւնը կը հրապարակենք:

Գաղտնիք մը չէ, որ մեր ժողովուրդը միշտ բարձր գնահատած է իր բանակի անդամներուն հայրենասիրական ոգին: Տագնապած ու մտահոգուած է անոր ներքին ու արտաքին հարցերով, եւ սակայն երբեք չէ յուսահատած, այլ՝ ընդհակառակն, միշտ անոր կողքին կենալով, քաջալերուած ու խանդավառուած է անոր լաւ լուրերով եւ յաջողութիւններով:

Մէկ խօսքով, հայը միշտ «ապրած» է իր բանակին հետ եւ համար: Անտարբեր չէ եղած կամ՝ մնացած:

Ու դարերու պատմութիւնը վկայ, հայուն համար հայկական բանակ նաեւ կը նշանակէ հայու հպարտութիւն: Որովհետեւ, իր բանակը իր մէջ պահ ունի, իր կոչումին յատուկ գիտակից ու սրբազան հայակերտ առաքելութեան նշանակութիւնը:

Հողի եւ ազատութեան համար արիւն թափած ենք ու այս մէկը միշտ կրկնած: Մօր մը ջերմութեան նման, զայն մեր արեան մէջ պահած ենք: Անոր համար մեր ցաւն ու սէրը միահիւսուած են:

Ու նաեւ աւելցնեմ, որ Հայկ նահապետէն ի վեր ազատութիւնը կրած ենք մեր հոգիին մէջ: Միւս կողմէ ալ, մեր մօտ յոյսի եւ լոյսի խորհուրդը անբացատրելի է: Առանց ասոր, կարելի չէ ըմբռնել հայը: Միշտ տեսանելի է, մեր բանակի զինուորներուն էութեան մէջ ազատութեան վառ տենչը: Եւ այս մէկը մեր շուրջը տիրող իրավիճակին մէջ, ծնունդ է մեր կերտելու, ստեղծելու եւ ըլլալու կամքին համար, այս օրերուն հրամայական դարձած է:

Մեզի համար հայկական բանակը ուրիշ բան չէ, եթէ ոչ պապենական մեր հողերն ու անոնց սահմանները եւ իր արեան գնով պաշտպանելու նոյն այդ հողին վրայ հպարտօրէն ծածանող իր եռագոյն դրօշը:

Մէկ խօսքով, բանակը կարգապահ մարդոց տեղն է եւ որուն ծառայողը լաւատեղեակ է խաղաղութեան, անոր պաշտպանման արժէքին ու իմաստին: Ահա քաջութիւն եւ խիզախութիւն, որոնք իր ինքնութեան յստակ խորհրդանիշներն ալ են:

Ու տեսնուած է, որ ամէն պատերազմի, հայոց բանակին ծառայող զինուորը  իր հակառակոր-դին եւ իր թշնամիներուն ու նաեւ ամբողջ աշխարհին ցոյց տուած է, որ իրեն  համար ազատ հայրենիքը յոյս է: Լինելութեան նշան: Կեանքի կանչ եւ հզօրութիւն: Իր կարգին հայն ալ հաւատացած է, որ բանակին համար մեծագոյն արժէքը՝ զինուորին կամ զինծառայողին կեանքն է: Հայը, իր զինուորը նկատած է նաեւ իր ազգային պատիւն ու արժանապատու-ութիւնը եւ հաւատարմօրէն դարձուցած՝ իր մեծագոյն գուրգուրանքին եւ պաշտամունքի առարկան:

Արդ, ամէն տարի իր տարեդարձին՝ իբրեւ գիտակից անհատներ, մեր մաղթանքներուն, գնահատականներուն եւ աղօթքներուն կողքին, ըսած եւ ուխտած ենք, որ չենք կրնար անտարբեր ըլլալ եւ մնալ հանդէպ մեր ազգային բանակին:

Մեր բանակը մեր ազգային յաղթանակին տանող մեծագոյն շարժիչն է: Ուստի պարտաւոր ենք առաջին իսկ հերթին, մեր մեծ ուշադրութեան առարկան դարձնել անոր մարդուժի քանակին եւ անոր որակին, ու մասնակից դառնալ եւ զօրակցիլ՝ անոր արդիականացման ու հզօրացման ճիգերուն եւ աշխատանքներուն:

Հայկական բանակը մեր պատմութեան ընթացքին միշտ վստահութիւն եւ հաւատք ներշնչած է մեզի ու այս ձեւով ամրապնդած՝ մեր բոլոր յոյսերը: Ահա թէ ինչո՞ւ պարտաւոր ենք ամբողջ ազգով զայն հզօր պահել, գուրգուրալ: Վստահութիւն,  եւ հաւատք ներշնչել: Հմուտ ղեկավարներով առաջնորդել: Արդիականացնել՝ նոր զէնքերով եւ պատերազմական թէքնիքներով:

Մեր ժողովուրդը միշտ բարձր գնահատած է հայ բանակի անդամներուն հայրենասիրական ոգին: Տագնապած ու մտահոգուած է անոր ներքին ու արտաքին հարցերով եւ սակայն երբեք չէ յուսահատած, այլ՝ ընդհակառակն, միշտ խանդավառուած է անոր լաւ լուրերով եւ յաջողութիւններով:

Հաւատացած ենք, նաեւ որ մեր բանակը իր մէջ պահ ունի իր կոչումին յատուկ գիտակից ու սրբազան հայակերտ առաքելութեան նշանակութիւնը: Որովհետեւ հողը, հայուն համար ազգային արժէքն ալ է: Հողը, մեր ոգին է եւ ապրելու կամքը: Հողը, մեր պայքարի զէնքն է: Ահա մեր ազգային գաղտնիքներէն ամէնէն մեծագոյնը: Վստահելին եւ արժանավայելը:

Ուստի.-

Փառք ու պատիւ մեր մարտունակ բանակին, մեր յաղթանակ կերտող զինուորին եւ իր արիւնը հայրենիքի հողի պաշտպանութեան համար նահատակ եւ մարտիրոսացած հայուն:

Փառք եւ ու պատիւ մեր հայ զինուորի քաջարի ու սխրագործ ծառայութեան, եւ անոր օրինակելի գիտակցութեան:

Մեզի համար այս բոլոր յատկանիշները ոչ միայն հպարտալի են, այլ նաեւ ներշնչման աղբիւրներ:

Հայ ենք ու պատմութիւնը վկայ, իբրեւ բանակ համայն ժողովուրդով, մեր  մեծով ու պզտիկով միշտ կռուած ենք մահուան դէմ,  կեանքի եւ ազատութեան համար: Անոր համար՝ ի սրտէ բարի մաղթանքներ կը հասցէագրենք մեր բանակին ու անոր մեծ ու փոքր բոլոր զինեալ եւ հերոս նուիրեալներուն:

Մի մոռնաք, որ քաջութիւն, նուիրում եւ հերոսութիւն յատկապէս մեզի դարերէ ի վեր առաջնորդած են դէպի առաջ, խրոխտ յաղթանակներու եւ յաւերժական կեանքի ու յաւիտենականութեան:

Արդ, հայկական մարտունակ բանակ, ծննդեանդ տարեդարձը շնորհաւոր:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՀԵՌԱՁԱՅՆԱՅԻՆ ԶՐՈՅՑԷ ՄԸ…
Next post ՑԵՂԱՍՊԱՆՈՒԹԵԱՆ ՃԱՆԱՉՈՒՄՆԵՐԸ Ի՞ՆՉ ՇԱՀ ԲԵՐԻՆ ԿԱՄ ԿԸ ԲԵՐԵ՞Ն ՀԱՅ ԱԶԳԻՆ ԵՒ ՀԱՅԱՍՏԱՆԻ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles