Հայ Դատը Շնորհաւորեց Ծերակուտական Ռապըրթ Մենենտէսը

ՈՒԱՇԻՆԿԹԸՆ.- Հայ Դատի յանձնախումբը շնորհաւորեց ծերակուտական Ռապըրթ Մենենտէսը, որ նոր Ծերակոյտին մէջ պիտի վերստանձէ Ծերակոյտի Արտաքին յարաբերութիւններու յանձնախումբի ատենապետի պաշտօնը։ Ան այդ պաշտօնին վրայ եղած էր 2013-էն 2015-ի միջեւ։

Մենենտէս ոչ միայն Հայոց Ցեղասպանութեան ճանաչումը պահանջող 2019-ի բանաձեւին վաւերացումը իրականացուցած քոնկրէսականներէն մէկն էր, այլ վերջերս նաեւ նեցուկ կանգնած էր Ատրպէյճանը եւ Թուրքիան պատասխանատւութեան կանչելու եւ անոնց դէմ պատժամիջոցներ որդեգրելու քոնկրէսական ջանքերուն։Ան կը պաշտպանէ Արցախի ինքնորոշման իրաւունքը եւ ամէն առիթով կը ջանայ Հայաստան-Միացեալ Նահանգներ յարաբերութիւնները սերտացնել։

Հայ Դատի յանձնախումբի ատենապետ Րաֆֆի Համբարեան ողջունեց հայութեան եւ յատկապէս Ամերիկայի եւ Նիւ Ճըրզիի Հայ Դատի յանձնախումբներուն հետ սերտ կապեր ունեցող ծերակուտականին նշանակումը նման հեղինակաւոր պաշտօնի մը։

Նշանակումը ողջունեց նաեւ Նիւ Ճըրզիի Հայ Դատի վարչութեան անդամ Անի Չաղլասեան՝ յիշեցնելով, որ Մենենտէս տարբեր առիթներով աջակցած է հայութեան։

 

 

Be the first to comment

Leave a Reply

Your email address will not be published.


*