Բողոքի Ցոյցերը Կը Շարունակուին

ԵՐԵՒԱՆ.- Շաբաթավերջին եւ Երկուշաբթի Դեկտեմբեր 28-ին, վարչապետ Փաշինեանի հրաժարականը պահանջող բողոքի ցոյցերը շարունակուեցան:

Քաղաքացիներէն մաս մը հաւաքուեցաւ Դեմիրճեան փողոցի երթեւեկելի հատուածին վրայ, միւս մասը՝ Ազգային ժողովի Բաղրամեան փողոցի մուտքին մօտ:

Ազգային ժողովի մուտքերը շրջափակած՝ անհնազանդութեան ցոյցեր կատարող քաղաքացիները Բաղրամեան պողոտայէն երթով ուղղուեցան դէպի Հանրապետութեան հրապարակը: Անոնք Ազգային ժողովի «Իմ Քայլը» խմբակցութեան պատգամաւորներէն պահանջեցին դուրս գալ խմբակցութենէն, երկրին մէջ վերացնել ռազմական դրութիւնը եւ պահանջել Նիկոլ Փաշինեանի հրաժարականը:

Ազգային ժողովի մօտակայքէն ձերբակալուեցան տասնեակ քաղաքացիներ, որոնց կարգին՝ Հ.Յ.Դ. Գերագոյն մարմինի նախագահ Սիմոն Սիմոնեան, Հ.Յ.Դ. Գերագոյն մարմինի անդամներ Արծուիկ Մինասեան, Յակոբ Մաթիլեան եւ Աշոտ Սիմոնեան, նաեւ՝ դաշնակցական երիտասարդներ։

Հ.Յ.Դ. Հայաստանի Երիտասարդական Միութիւնը  բողոքի ցոյցերուն վերաբերեալ յայտարարութիւն մը հրապարակեց՝ նշելով, որ  մասնակցողները ձերբակալելէն անցած են ժամեր, սակայն ոստիկանութիւնը կը մերժէ ազատ արձակել վերջինները, այդպիսով կոպտօրէն ոտնահարելով քաղաքացիի իրաւունքները եւ ազատութիւնները:

Be the first to comment

Leave a Reply

Your email address will not be published.


*