ՄԱՏՐԻՏԵԱՆ ՓԱԹԵԹԸ ՍԱՀՄԱՆԱՅԻՆ ՌԵԺԻՄ ՉԻ ՀԱՍՏԱՏԵՐ…

0 0
Read Time:3 Minute, 0 Second

Կարօ Արմենեան

Դեկտեմբեր 23, 2020

Բոլոր անոնք, որոնք կը փորձեն թշնամիին հողային զիջումներ ընելու Փաշինեանի արարքը արդարացնել ԵԱՀԿ-ի Մինսքի Խումբի

Համանախագահութեան ստեղծած Մատրիտեան Փաթեթի տուեալներով, չարաչար կը սխալին։ Այն իրողութիւնը, որ Հայաստանի Հանրապետութիւնը ՊԱՅՄԱՆԱԿԱՆՕՐԷՆ միայն ընդունած է 5+2 ազատագրուած շրջաններու վերադարձը ատրպէյճանական իրաւասութեան, չի կրնար իրաւական հիմ հայթայթել ներկայի սահմանագծման խօսակցութիւններուն։ Կը կրկնեմ. չի կրնար ՝առնուազն հետեւեալ երեք հանգամանքներու հիման վրայ.

(ա) Մատրիտեան Փաթեթը ԵԱՀԿ-ի Մինսքի Խումբի Համանախագահութեան բանակցային գործընթացի բոլոր տուեալներով ՓԱԹԵԹԱՅԻՆ բնոյթ ունեցող փաստաթուղթ մըն է եւ անոր մէջ ընդգրկուած բոլոր կէտերը մինչեւ վերջին վայրկեանը կը մնան վիճելի եւ բանակցութեան ենթակայ, որքան ատեն որ վերջնական համաձայնագրով — եւ կողմերու խորհրդարանական վաւերացումներով — ան չէ պաշտօնականացած։ Բանակցային փաթեթը, ինքն ըստ ինքեան, համաձայնագիր չէ։ Ան ոչ իսկ ունի դիտաւորութեան հանգամանք։ Ասիկա բանակցային տարրական սկզբունք է եւ ենթակայ չէ այլընտրանքային մեկնաբանութիւններու։

(բ) Փաթեթը ՊԱՅՄԱՆԱԿԱՆՕՐԷ՛Ն միայն կը խօսի «շրջան»-ներու մասին։ Եւ յամենայն դէպս ան չի խօսիր «սահման»-ներու մասին։ Միջազգային սահմանավէճերու բանակցային գործընթացները տեղի կ՚ունենան հանգրուանային մեթոտաբանութեամբ։ Նախ կը լուծուին տարածքային պատկանելիութեան հարցերը։ Յետո՛յ միայն — եւ բոլորովին այլ աշխատակարգով — տեղի կ՚ունենան սահմանագծման եւ սահմանային ռեժիմի ճշտման հետ կապուած խօսակցութիւնները։ Եւ մինչեւ որ այս երկրորդ հանգրուանը չհանգուցալուծուի, առաջինի համաձայնութիւնը վերջնականացման չ՚ենթարկուիր։

(գ) Այն, որ Նոյեմբեր 9-ի Եռակողմանի Յայտարարութեամբ ձեւաւորուած բանակցային գործընթացին համար հիմ ընտրած են հին խորհրդային սահմանագծերը, բացարձակապէս կամայական որոշում է — ինչպէս Յայտարարութիւնը՝ ի՛նք — եւ անշուշտ ՝ զուրկ որեւէ տրամաբանական հիմնաւորումէ։ Խորհրդային ներքին սահմանագծերը ծնունդ էին բոլշեւիկեան համակարգի ներքին կամայականութիւններուն։ Յատկապէս կարեւոր է ընդգծել, որ Անդրկովկասի ներքին միջ-հանրապետական սահմաններու հաստատման մէջ անձամբ դերակատար էր Ստալինը՝ ի՛նք։ Այս բոլորը ընդունուած իրողութիւններ են։ Թէ ինչպէ՞ս Հայաստանի կազմէն դուրս մնացին Կարսը, Արտահանը, Սուրմալուն, Նախիջեւանը, Արցախը եւ ուրիշ շրջաններ լայնօրէն վաւերագրուած փաստեր են եւ չեն կարօտիր յաւելեալ քննարկումներու։ Խորհրդային Հայաստանի սահմանները կեղծ էին, մեզի պարտադրուած եւ զուրկ՝ օրինական հիմնաւորումէ։ Այս իսկ տրամաբանութեամբ, այսօրուան գործընթացը կ՚ենթադրէր սահամագծման մանրակրկիտ բանակցութիւններ եւ պահանջատիրական քաղաքականութիւն…Անգրագէտ մեքենականութեամբ կարելի չէ վերաբերուիլ սահմաններ ճշտելու պատասխանատու գործին հետ եւ թշնամին բերել մեր տան շեմէն ներս։

Այն ինչ, որ տեղի կ՚ունենայ այսօր իշխանութեան եւ Եռակողմանի Յայտարարութեան միւս կողմերուն միջեւ, ըստ էութեան, քրէական է եւ բացարձակապէս անընդունելի։ Ան մահացու հարուած է հայ անկախ պետականութեան լինելիութեան սկզբունքին։ Ընդունիլ Փաշինեանի սահմանները կը նշանակէ ընդունիլ Հայաստանի եւ Արցախի շրջափակումը թուրք-ատրպէյճանական թշնամիին կողմէ։ Ընդունիլ այդ սահմանները կը նշանակէ մեր իսկ ձեռքերով ստորագրել հայ անկախ պետականութեան մահավճիռը։

Անշուշտ մեզի պիտի ըսուի, թէ այս դաժան հաւասարութեան մէջ այնուամենայնիւ գոյութիւն ունին ռուս խաղաղապահ ուժերը, որոնք պիտի երաշխաւորեն սահմաններու խաղաղութիւնն ու անձեռնմխելիութիւնը…Իսկապէ՞ս։ Լո՞ւրջ էք։ Հարցո՛ւմ. իշխանութիւնը ա՞յս միայն ունի տալիք մեր ժողովուրդին որպէս ապահովութեան հաւաստիք։ Այսինքն Նախ. Փութինի հաւաստիքնե՞րը…Ա՞յն Նախ. Փութինին, որ իր պետութեան շահերէն ելլելով որոշեց հեռուէն միայն դիտել պատահածը, երբ տեղի կ՚ունենար թշնամիի նախայարձակումն ու անխնայ հրետանակոծութիւնը Ստեփանակերտի վրայ ազերիներու ապօրինի զէնքերով…

Առ ի գիտութիւն, ըստ վերջին լուրերուն, այսօր իսկ տեղի ունեցաւ անխուսափելին…Թշնամի ուժերը բացարձակապէս մերժեցին Բերձորի (Լաչինի) վրայով անցք հայթայթել Արցախէն Սիւնիք դիմող Հայկական Բանակի միաւորներուն։ Եւ ասիկա միայն սկիզբն է երկանց։

Յստակ է, որ մեր երկիրը կը դիմագրաւէ անվտանգութեան մեծ ճգնաժամ մը այսօր եւ Պր. Փաշինեանի գլխաւորած իշխանութիւնը — որ ընդունած է մաս կազմել մեր հայրենական հողերը թշնամիին յանձնելու յանցաւոր գործողութեան — ի վիճակի չէ արժանապատիւ լուծում բերելու այս հրամայական հարցերուն։ Այս է հանրագումարը այսօրուան իրականութեան։ Եւ հետեւաբար արդար չէ, որ իշխանութիւնը իր ձեռնթափութիւնները չքմեղելու սիրոյն պաշտպանութիւն փնտռէ Մատրիտեան Փաթեթի մարտավարական նրբութիւններուն ետին ամէն օր աւելի ապակողմնորոշելով բազմաչարչար մեր ժողովուրդը եւ հանրութիւնը տանելով ապիկար բեւեռացումներու։ Մեր երկիրը պերճանքը չունի ժամանակ վատնելու։ Վճռական գործի օրերն են։ Պր. Փաշինեան պէտք է հրաժարի։ Երկիրը պէտք ունի նոր եւ խոհեմ եւ միաժամանակ համարձակ ղեկավարութեան որ կաշկանդուած չըլլայ պարտութեան դեւերով։ Մենք այսօրուընէ սկսեալ պէտք է լծուինք մեր վաղուան յաղթանակը կերտելու դժուարին գործին։

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post «Այս Իշխանութեան Մնալը Ազգային Աղէտ Է…» Կը Հաստատէ Յակոբ Տէր Խաչատուրեան
Next post ՍԱՀՄԱՆԱԳԾՄԱՆ ՆԱԽԿԻՆ ԽՈՐՀՐԴԱՅԻՆ ԺԱՌԱՆԳԷՆ ԱՆԴԻՆ…

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles