Հ.Հ. Նախագահ Արմէն Սարգսեան Եռաբլուր Զինուորական Պանթէոնին Մէջ Յարգանքի Տուրք Մատուցեց

ԵՐԵՒԱՆ.- Կիրակի, Դեկտեմբեր 20-ին, Հայաստանի Հանրապետութեան նախագահ Արմէն Սարգսեան այցելեց Եռաբլուր զինուորական պանթէոն:

Հանրապետութեան նախագահը եւ նախագահի աշխատակազմը յարգանքի տուրք մատուցեցին արցախեան ազատամարտին իրենց կեանքը հայրենիքի պաշտպանութեան համար զոհաբերած հերոսներու յիշատակին, ծաղիկներ զետեղեցին անոնց գերեզմաններուն:

«Շատ դժուար օրեր են: Յոյս ունիմ, որ 2020-ի աւարտին հետ մենք պիտի փակենք ողբերգական ու դժբախտ էջը եւ պիտի կարենանք ոտքի կանգնիլ, նոր էջ բանալ: Միակ բանը, որ պիտի յիշենք 2020-էն, սուրբ յիշատակն է այն մարդոց, որոնք իրենց կեանքը տուին հայրենիքը պաշտպանելու համար: Բոլոր դժբախտութիւնները պէտք է դասեր ըլլան, այլ ոչ թէ ցաւոտ յիշողութիւններ: Պէտք է նորէն սկսինք մեր կեանքը: Անհամբեր կը սպասեմ այս տարուան աւարտին», ըսաւ Նախագահ Սարգսեան:

Ամենայն հայոց Գարեգին Բ. կաթողիկոսն ալ այցելեց Եռաբլուր զինուորական պանթեոն:

 

 

Be the first to comment

Leave a Reply

Your email address will not be published.


*