Փաշինեանի Հրաժարականը Պահանջող Հաւաքներն Ու Ցոյցերը Կը Շարունակուին


ԵՐԵՒԱՆ.- Գրեթէ օրական դրութեամբ կը շարունակուին հաւաքներ եւ ցոյցեր կատարուիլ, պահանջելով Հ․Հ․ վարչապետ Նիքոլ Փաշինեանի հրաժարականը։
Նոյեմբեր 23-էն սկսեալ, Հ․Յ․Դ․-ի անդամներ Գարիկ Աւետիսեան եւ Գեղամ Մանուկեան Հայաստանի Ա. Հանրապետութեան հիմնադիր Արամ Մանուկեանի արձանին մօտ անժամկէտ հացադուլի սկսան` պահանջելով Փաշինեանի հրաժարականը:
Գեղամ Մանուկեան, որ յատկապէս վերջերս բազմիցս բերման ենթարկուած էր եւ ապա ազատ արձակուած, հացադուլի սկսելու իր որոշումին մասին տեղեկացուց, թէ , « Հայաստանը կ՛ապրի ազգային ողբերգութիւն` Հայաստանի իշխանութիւններուն եւ յատկապէս վարչապետ Փաշինեանին վարած ապաշնորհ ու քայքայիչ գործունէութեան հետեւանքով մեր հայրենիքին կարեւոր մէկ հատուածի կորստեան պատճառով»։
Մանուկեան յայտնեց, որ ինք հացադուլի որոշում տուած է իբրեւ դաշնակցական, ոչ թէ որոշումը տուած է Հ․Յ․Դաշնակցութիւնը, այսինքն` ասիկա չի փոխարիներ հանրահաւաքային պայքարը, այլ կ՛ամբողջացնէ զայն, հանրահաւաքները պիտի շարունակուին:
Գարիկ Աւետիսեան, որ պատերազմի առաջին 10 օրը կը գտնուէր Մատաղիսի ճակատ, յայտնեց վտանգը լուրջ է, բայց այլ ելք այս պահուն չկայ, քանի տակաւին Փաշինեանը հրաժարական չէ տուած։ Աւետիսեանի համաձայն, թէ՛ հանրահաւաքները, թէ՛ բողոքի միւս գործողութիւնները արդիւնաւէտ կրնան ըլլալ միայն համախմբուած ըլլալու պարագային, եթէ մարդիկ օգնեն իրարու:
Նոյեմբեր 24-ին, Հ․Յ․Դ․-էն անդամներ, իշխող` «Քաղաքացիական Պայմանագիր» կուսակցութեան նիստի ժամանակ, կոչ ոեղղեցին միանալ Արցախը յանձնելու դաւադիր պայմանագրի դէմ բողոքող քաղաքացիներուն, յայտնելով․«Կոչ ենք անում անել ձեր քայլը եւ գալ, միանալ բողոքօղ ժողովրդին: Կա՛մ կանգնում էք պետականութեան կողքին, կա՛մ դաւաճան Նիկոլ Փաշինեանի կողքին: Արդէն փաստ է, որ Նիկոլ Փաշինեանը այդ խայտառակ պայմանագրով դաւաճանեց ամբողջ ժողովրդին: Դուք դեռ ժամանակ ունէք, արե՛ք ձեր քայլը` միացէք ժողովրդին: Դուք դեռ ժամանակ ունէք ձեր վրայից հանելու դաւաճանի խարանը»։
Ներքին ապահովութեան ուժերը ժամանած էին կեդրոն, կանխելու համար որեւէ միջադէպ։
Միւս կողմէ, օրական դրութեամբ կը շարունակուին ցոյցերն ու քայլարծաւները։
Նոյեմբեր 21-ի,ն Ազատութեան հրապարակին վրայ տեղի ունեցած հանրահաւաքին, մասնակցեցան նաեւ Երեւանի մէջ ապաստան գտած արցախցիները, պատերազմին ընթացքին հարազատներ ու ընկերներ կորսնցուցած քաղաքացիներ եւ Արցախի ճակատագիրով մտահոգները:
Հ․Յ․Դ․ Գերագոյն մարմինի անդամ Արծուիկ Մինասեան ըսաւ, որ վարչապետին եւ կառավարութեան հրաժարականը հիմնական հարց է, որպէսզի նոր որակի իշխանութիւնը վերականգնէ Հայաստանի արժանապատուութիւնը, վարէ այնպիսի արտաքին քաղաքականութիւն, որ պիտի բացառէ պատերազմը։

Հ․Յ․Դ․ Գերագոյն մարմինի անդամ, բժիշկ, ազատամարտիկ Տարօն Տօնոյեան ըսաւ․ «Մենք յաղթող ժողովուրդ ենք, պարտուողը Նիկոլ Փաշինեանն է՝ իր մանկապարտէզի խումբով: Ո՞վ բացեց Հատրութի թիկունքը, ով է դրա պատասխանը տալու, որտեղից սողոսկեցին թշնամի խմբերը»։ Ան եզրակացուց, որ արձանագրուած մեծ պարտութենէն բացի, իշխանութիւնները մեզ կը պատրաստեն հետագայ պարտութիւններու:
Նոյեմբեր 20-ին, Հ․Յ․Դ․ Հայաստանի երիտասարդական միութեան տասնեակ մը անդամներ տարբեր ժամերու Երեւանի տարբեր հատուածներ ձերբակալուած էին ոստիկանութեան կողմէ:
Հ․Յ․Դ․ Հայաստանի Գերագոյն մարմինի ներկայացուցիչ Իշխան Սաղաթէլեան շեշտեց, թէ երիտասարդականներ ձերբակալուած էին, որովհետեւ․ «Ցանկանում էին Հանրապետութեան հրապարակում բարձրացնել, ծածանել Հայաստանի Հանրապետութեան Եռագոյնը: Նիկո՛լ, մեր երիտասարդները մի՛շտ բարձր են պահել եւ բարձր են պահելու Հայոց Եռագոյնը: Իսկ դու այն կրկին անգամ նետեցիր գետնին: Պատասխան ես տալու. Հեռացի՛ր անցնցում»։

Be the first to comment

Leave a Reply

Your email address will not be published.


*