Մայրեր Յաղթական

 Պետրոս Քհնյ. Շիթիլեան

Մայրե՜ր, մայրե՜ր,

Մայրեր որդեկորոյս,

Մայրեր սրբացած:

 

Ձեզ հետ կը սգայ ազգն համայն,

Ձեզ հետ կու լայ վերինն աշխարհ,

Ձեզ հետ կ’ողբայ Որդին անգամ:

 

Մայրեր դուք սուրբ,

Տուիք անոնց հոգին հայկեան,

Տուիք անոնց հոգին հերոսական,

Տուիք անոնց հոգին զոհողութեան:

 

Մայրե՜ր, մայրե՜ր,

Մայրեր դուք սուրբ,

Ձեր արցունքով կը լեցուի տակարն մեր հոգւոյն,

Որմէ պիտ խմեն նոր մայրերն մեր,

Որոնք պիտ ծնին ժառանգներ արժան:

 

Լացէ՜ք մայրեր, մայրեր դուք սուրբ,

Ձեր արցունքով թող թրջուի մեր հողն սուրբ,

Ձեր արցունքով թող ծաղկի ուղին մեր փրկութեան:

 

Կ’ողբաք անոնց համար,

Որոնք կ’իյնան պատուի համար,

Անոնց համար,

Որոնք կ’իյնան լոյսին համար,

Անոնց համար,

Որոնք կ’իյնան խաչին համար:

 

Ու երկի՜նք երկի՜նք,

Լսէ ողբն անոնց,

Լսէ անոնց հառաչանքն սրբազան,

Տե՛ս, թէ ինչպէս առաջինն ազգն Միածինեան,

Կ’իյնայ խորանին վրայ Ճշմարտութեան:

 

Երկի՜նք, երկի՜նք,

Դռներդ բաց,

Կու գան լոյսի հերոսներն արդար,

Կու գան Տիրոջ զինուորներն անմահ:

 

 

Մայրե՜ր, մայրե՜ր,

Մայրեր դուք սուրբ.

«Ցնծածէ՛ք ու ուրախացէ՛ք, երկնքի մէջ մեծ է վարձքն անոնց»:

 

Մայրե՜ր, մայրե՜ր,

Ցնծացէ՛ք ու ուրախացէ՛ք, յաղթած էք դուք,

Ու ձեզմով պիտ յաղթէ ազգն թորգոմեան:

 

 

 

 

 

1 Comment

Leave a Reply

Your email address will not be published.


*