Վերջին Հրաժեշտ՝ Գեղամ Մուշեղեանին

ԵՐԵՒԱՆ․- Երեքշաբթի, Հոկտեմբեր 6-ին, «Եռաբլուր» զինուորական պանթէոնին մէջ կատարուեցաւ թաղումը Գեղամ Մուշեղեանի, որ հերոսաբար սպաննուած էր մարտերուն։
Հ․Յ․Դ․ Հայաստանի Գերագոյն մարմինի ներկայացուցիչ Իշխան Սաղաթէլեան խօսք առնելով, ըսաւ․- «Ընկեր Գեղամը զոհուեցաւ յանուն հայրենիքի, ասիկա գիտակցուած անձնազոհութիւն էր` յանուն Արցախի, յանուն հայ ժողովուրդի, յանուն Հայաստանի Հանրապետութեան: Ընկեր Գեղամը իր ամբողջ կեանքին ընթացքին առաջնորդուած է նշանաբանով` յանուն հայրենիքի: Արցախեան վերջին 3 պատերազմներուն ալ ունեցաւ իր մասնակցութիւնը: 1991-94 թուականներուն մասնակցեցաւ արցախեան ազատամարտին, մասնակցութիւն ունեցաւ Մարտակերտի ազատագրման: 2016-ի Ապրիլին հայրենիքը կրկին վտանգի մէջ էր, իսկ ընկեր Գեղամը Դաշնակցութեան գումարտակի հետ սահմանին էր։ Սեպտեմբեր 27-ի առաւօտեան թշնամին դարձեալ կ՛ուզէր նուաճել մեր հայրենիքը: Պատերազմի լուրը առնելէ վայրկեաններ անց ընկեր Գեղամը գրասենեակն էր, կը զանգէր իր ջոկատի ընկերներուն` պէտք է մեկնէին սահման: Ժամեր անց ընկեր Գեղամը սահմանին էր` իր երիտասարդ ու աւագ ընկերներուն հետ, հայ զինուորի կողքին` յանուն հայրենիքի, յանուն Արցախի, յանուն հայ ժողովուրդի ապրելու իրաւունքին: Ընկեր Գեղամը կռուեցաւ մինչեւ վերջին շունչը` կուրծքով պաշտպանելով ընկերներն ու հայրենիքը», նշեց Իշխան Սաղաթէլեանն ու բոլորին անունով յայտարարեց. «Քու գործդ պիտի շարունակենք: Արիւնով նուաճած, արիւնով ձեռք բերուած հայրենիք չունինք զիջելու: Քու եւ մեր միւս ընկերներուն արեան գնով նուաճուած հայրենիքը սակարկումի ենթակայ չէ: Ատիկա թող իմանան բոլորը»:
Հ․Յ․Դ․ Հայաստանի Գերագոյն մարմինի ազատամարտիկներու յանձնախումբի ներկայացուցիչ Իկոր Սարգսեան Եռաբլուրի մէջ ազատամարտիկին վերջին հրաժեշտը տալէ առաջ իր խօսքին մէջ նշեց. «Չենք ողբար, կսկիծը մեր սրտերուն ու գիտակցութեան մէջ յաղթական յառաջ պիտի երթանք: «Անտրտունջ Գեղամը ինքզինք զոհաբերեց։ Ամէն անգամ պատերազմի դաշտ մեկնեցաւ` պատրաստ զոհաբերուելու` յանուն կեանքի, յանուն ապագայի, յանուն իր սերունդներուն, եւ այսօր ան ֆիզիքապէս մեզմէ կը հեռանայ: Դեռ քառասուն օր պիտի մարտնչի ընկերներուն հետ, այնուհետեւ պիտի երթայ երկինքի արքայութիւն` միանալու մեր բոլոր նուիրեալներուն, որոնք ազգի պահպանութեան, պետականութեան, ապագայի համար մարտնչած ու զոհաբերուած են: Պիտի երթայ նուիրեալներուն մօտ` ըսելու, որ դաշնակցական մարտիկները կանգնած են ժողովուրդի կողքին, եւ պիտի երթայ զինուորին առջեւէն` իբրեւ հրամանատար, իբրեւ դաշնակցական մարտիկ: Փա՛ռք մեր բոլոր ննջեցեալներուն»:

Be the first to comment

Leave a Reply

Your email address will not be published.


*