ՄԵՆՔ

Հրանդ Մարգարեան
Հոկտեմբեր 6, 2020
Մենք
    Հայաստա՛նն ենք պատմութեան խորքով եւ
    Արցախն ենք մենք լեռներու շունչով եւ Սփիւռք ենք մենք արեան թէժ կապով
    Յաղթանակ ենք մենք միացեալ կամքով։
 
Մենք
    Հայաստանցի,
    Արցախցի խրոխտ եւ աշխարհացի Սփիւռք մշտարթուն
    Յանուն մեր արդար դատի գոյութեան պահանջատէր ենք։
 
Մենք
    Հաստատակամ
    Աննկուն կամք ենք`
    Յարատեւութեան դարերու երթով։
 
Մենք
    Հերոսներու շառաւիղներ ենք,
    Ազատամարտի՛կ՝ հրեղէ՛ն ոգուով,
    Յաւերժի ճամբորդ յստա՛կ հասցէով։
 
Մենք
    Հաւա՛տք ենք կուռ,
    Անձնազոհութեան խորան խնկաբոյր,
    Յանձնառարութեան կերոն լուսաթոյր։
 
Մենք
    Հայրենաշունչ
    Աննկուն ոգի Հայոց պատմութեան
    Յոյսի ջահեր ենք մեր վեհ գոյութեան։
 
Մենք
    Հրաշակե՛րտ եւ
    Արարչակե՛րտ եւ
    Յաւերժակերտ ազգ ենք անձնուրաց:
 
Մենք`
    Հայկ նահապետի անվրէպ նետն ենք եւ
    Արտաշէսի լեզուի պաշտամունք
    Յանուն Մեսրոպի մշակոյթ ենք մենք յանձնուած դարերու անսահման երթին։
Մենք
    Հայութիւն ենք եւ վեհ
    Ազգութիւն,
    Յարատեւութիւն առա՛նց հարցումի։
 
Մենք
    Հա՛յ ենք, այո՛։ Պարուրուած ենք մենք Կարմրաթոյր արիւնով մեր վեհ պապերուն,
    Անկաշկանդ թռիչքով Կապոյտ երկնքին՝
    Յանուն հասկերու գոյնով Նարինջի։
 
Մենք
    Հայու ոգի ենք անդրդուելի եւ
    Անպարտուե՛լի՝
    Յաղթանակներու դափնիներ հագած։
    Հայրենիքի Սուրբ Պարտքն է մեր ուղին,
    Աստծոյ միւռոն է մեր ճակտին քսուած կ՛օծէ դարաւոր մեր վեհանձ հոգին
    Յոյզը վառ յոյսով պսակող ջահն է եւ լուսաւորող երթն մեր դարաւոր։
 
Մենք
    ՀԱ՛Յ ենք, այո՛։ Երեք տառ միայն միսթիք խորհուրդով անհասկնալի։
    Անցեալով հպարտ, ներկայով թրծուած,
    Յոյժ յաւերժին ենք հասցէագրուած։
 
ՄԵՆՔ․․․
    ՀՈ՛, Ա՛ՅԲ եւ ՅԻ՛ի ամբողջութիւնն ենք՝
    ՀԱՒԱՏՔ ԱՆՆԿՈՒՆ եւ ՅԱՒԵՐԺԱԿԱՆ։

Be the first to comment

Leave a Reply

Your email address will not be published.


*