Հ.Յ.Դ. Բիւրոյի Ներկայացուցիչ Յակոբ Տէր Խաչատուրեանի Ուղերձը

0 0
Read Time:3 Minute, 5 Second

Կիրակի, Հոկտեմբեր 4-ին, Հ.Յ.Դ. Բիւրոյի ներկայացուցիչ Յակոբ Տէր Խաչատուրեան հետեւեալ ուղերձը յղեց հայ ժողովուրդին.-

Սիրելի՛ հայ ժողովուրդ,

Անգամ մը եւս Ատրպէյճանը Թուրքիոյ գործուն մասնակցութեամբ գրոհեց մեր հայրենիքին վրայ: Արցախի սահմանի երկայնքով Ատրպէյճանի յարձակումները ո՛չ միայն թիրախաւորած են մեր բանակը, այլեւ սահմանային գօտին եւ նոյնիսկ Ստեփանակերտի ու յարակից շրջաններու անզէն քաղաքացիները: Ատրպէյճանը յանդգնած է յարձակիլ Հայաստանի բնակավայրերու վրայ:

Թէեւ Հայոց բանակը տուած է անհրաժեշտ հակահարուածը եւ վճռած, որ անպայման պիտի յաղթենք, մենք ունեցանք եւ տակաւին պիտի ունենանք զոհեր, որոնց կորուստը կը սգանք: Անոնց հարազատներուն կը փոխանցենք մեր խորին ցաւակցութիւնները, յարգանքն ու երախտագիտութիւնը:

Մեզի համար գօտեպնդող է, որ ամբողջ հայութիւնը ի հայրենիք եւ ի սփիւռս աշխարհի, բռունցք դարձաւ իբրեւ միասնական հարուածող ուժ` դիմակայելու համար հայրենիքին սպառնացող վտանգը: Մենք պիտի աշխատինք, որ ամէն գնով պահպանուի այդ միութիւնը եւ մեր թշնամիները տեսնեն, որ աշխարհասփիւռ հայութիւնը աներեր կանգնած է իր զոյգ պետութիւններուն ու բանակին կողքին:

Մենք այնպիսի պարտութեան պէտք է մատնենք մեր թշնամիները, որ Ազրպէյճանն ու Թուրքիան այլեւս երբեք չհամարձակին պատերազմի միջոցով փորձել բռնազաւթել Արցախը կամ յարձակիլ Հայաստանի Հանրապետութեան վրայ:

Սիրելի՛ հայրենակիցներ,

Այսօր թշնամին պատերազմ սանձազերծած է ամբողջ հայութեան դէմ: Այսօր մեզմէ իւրաքանչիւրը զինուորագրուած է այս պատերազմին, որպէսզի իր կարողութեան սահմաններուն մէջ սատարէ մեր յաղթանակին: Այսօր կեանքի-մահուան պայքար կը մղենք ո՛չ միայն Արցախի ճակատին վրայ: Այնտեղ հայ զինուորը «Մահ կամ ազատութիւն» նշանաբանով կը մաքառի թշնամիին դէմ ու ոգին ի բուռ կը պաշտպանէ հայրենիքը, իսկ ամբողջ հայութիւնը կը շարունակէ աշխարհով մէկ պայքարիլ քաղաքական ու քարոզչական դաշտերուն մէջ` զօրաշարժի ենթարկելով համաշխարհային հանրութիւնը, որ անիկա դիրքորոշուի ի նպաստ Հայաստանին ու Արցախին: Հայ յեղափոխական դաշնակցութիւնը այս յարձակումի առաջին իսկ վայրկեաններէն լարեց իր կազմակերպական մեքենան, կազմակերպեց ճակատ մեկնող կամաւորական պահեստազօր, ծրագրեց Հայ դատի գրասենեակներու եւ յանձնախումբերու ճամբով քարոզչական եւ լոպիինկի արշաւ եւ իր համակիրներուն ցանցը մղեց լծուելու բազմաշերտ համաշխարհային պայքարի` ի սպաս մեր հայրենիքին:

27 սեպտեմբերի առաւօտեան կանուխ ժամերէն չորս ուղղութեամբ սկսանք մեր գործը:

Առաջին. մարտական դաշտի վրայ` Հայաստանի ու Արցախի մէջ զօրաշարժի ենթարկեցինք մեր կամաւոր պահեստազօրը, որ մաս առ մաս մեկնեցաւ եւ կը շարունակէ մեկնիլ Արցախ, պաշտպանութեան բանակի հրամանատարութեան ներքեւ իր մասնակցութիւնը բերելու այս գոյամարտին: Խոր յարգանք իրենց ու բոլոր կամաւորներուն, որոնք ընդառաջեցին զօրահաւաքի կոչին ու այսօր կը մարտնչին հայ զինուորի կողքին:

Երկրորդ. միասնականութեան ստեղծման համար` մեծապէս ողջունելի է այն համահայկական միասնականութիւնը, որ գրաւականն է մեր յաջողութեան: Ամէն գնով պէտք է գուրգուրանք ու ամրապնդենք այդ միասնականութիւնը մեր հայրենիքին եւ սփիւռքի մէջ: Ասիկա լաւագոյն փաստն է, որ ճգնաժամի պահուն, ամէն տարակարծութիւն մէկ կողմ դրած, մենք պարտաւոր ենք բռունցք դառնալու եւ այդ ձեւով վարելու մեր հայրենիքին ու հայութեան սրբազան գործը:

Երրորդ. համաշխարհային գրոհի կազմակերպութեամբ` մեր պայքարը Արցախի սահմանագիծին վրայ չէ միայն: Այսօր մենք կը պայքարինք աշխարհով մէկ քաղաքական ու քարոզչական մակարդակներով, որպէսզի քողազերծուին թշնամիներու իսկական նկրտումները, յարձակողապաշտ նկարագիրը եւ հայատեաց քաղաքականութիւնը: Այսօր մեր դէմ մեծ պատերազմ ծաւալած են Թուրքիան եւ Ազրպէյճանը, որոնք միջազգային ահաբեկչական վարձկաններու ներգրաւումով կը փորձեն շրջել պատերազմի ալիքը: Աւելի քան երբեք անհրաժեշտ է հասցնել հատու հակահարուած համահայկական բոլոր կարելիութիւններով: Արդէն սկսած ենք քաղել մեր մարմիններու, Հայ դատի յանձնախումբերու եւ համակիրներու կողմէ տարուող քաղաքական ու քարոզչական գրոհի արդիւնքները: Պետութիւններ շարժած ենք միջազգային կազմակերպութիւններու դէմ, միջազգային կազմակերպութիւններու ազդեցիկ դէմքեր անցած են գործի: Արեւմտեան, արեւելեան, արաբական եւ նոյնիսկ իսլամական աշխարհի մամլոյ գործակալութիւնները կը տարածեն մեր ներկայացուցիչներու ելոյթները տարածաշրջանային ուժերու եւ Մինսքի խմբակի համանախագահող երկիրներուն մէջ, բազմապատկած ենք մեր երիտասարդներու ցոյցերն ու աշխատանքը ընկերային ցանցերուն վրայ:

Եւ չորրորդ. մեր բանակի ու պետութեան նիւթական կարիքներու ապահովման համար` արդէն ձեռնարկած ենք համահայկական հանգանակութիւն, որպէսզի մենք ալ մեր բաժինը բերենք մեր բանակի ու հայրենիքի անմիջական կարիքներուն, միաժամանակ աշխարհի տարբեր կողմերէն դեղորայք, սննդամթերք, հագուստեղէն եւ այլ անհրաժեշտ իրեր ու առարկաներ հասցնելու հայրենիք:

Սիրելի՛ հոգեհարազատներ,

Վտանգը տակաւին առկայ է, սակայն մեր վճռականութիւնն ալ անխախտ է: Մեր հայրենանպաստ գործը պէտք է շարունակենք վերանորոգ թափով, պէտք է կռուինք աննկուն կամքով ու ամբողջ ուժով: Անտարակոյս պիտի յաղթենք:

Կեցցէ՛ մեր քաջարի բանակը,

Կեցցէ՛ Արցախի Հանրապետութիւնը,

Կեցցէ՛ Հայաստանի Հանրապետութիւնը,

Կեցցէ՛ հայ ժողովուրդը:

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Հարցազրոյցը «Ալ Ճազիրա»-ի Հետ.- «Թուրքիան Պէտք Է Դուրս Բերուի Այս Հակամարտութիւնից, Նրանք Այս Խնդրի Մասը Պէտք Չէ Լինեն»․․․Կը Յայտնէ Հ․Հ․ Նախագահ Արմէն Սարգսեան
Next post Հ.Յ.Դ. Երիտասարդականի Մարտական Եւ Քաղաքական Խնդիրը

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles