ԲՈՂՈՔԻ ՑՈՅՑԵՐ՝ ՆԻՒ ԵՈՐՔԻ ԵՒ ՊՈՍԹԸՆԻ ՄԷՋ

Խաղաղ ցոյց՝ Ատրպէյճանի դեսպանատան մուտքին

ՆԻՒ ԵՈՐՔ, ՊՈՍԹԸՆ.- Բեղուն շաբաթավերջ մը բոլորեց հայորդին եւ յատկապէս երիտասարդութիւնը, որ բազմիցս ցոյցեր կազմակերպեց, Յուլիս 12 -էն ի վեր, Հայաստանի հիւսիս-արեւելեան սահմանագիծի (յատկապէս Տաւուշ)  հայկական դիրքերուն եւ բնակավայրերուն վրայ  Ատրպէյճանի կատարած յարձակումներուն դէմ բողոքելով:

Նիւ Եորքի մէջ, Ուրբաթ, Յուլիս 24-ին ատրպէյճանցի եւ թուրք ցուցարարներ անակնկալ հաւաք մը կազմակերպած էին, Մ.Ա.Կ.-ի մօտ Հայաստանի դեսպանատան մուտքին: Անոնց դէմ յանդիման եկաւ Նիւ Եորքահայութիւնը, պաշտպանելով կառոյցը եւ ետ մղելով խուժան ցուցարարները: Ոստիկանութիւնն ալ վրայ հասնելով, կրցաւ տէր դառնալ կացութեան:
Փոխադարձ, Կիրակի, Յուլիս 26-ին, Նիւ Եորք – Նիւ Ճըրզիի հայութիւնը, իր կարգին խաղաղ ցոյց մը կազմակերպեց Մ.Ա.Կ.-ի մօտ Ատրպէյճանի դեսպանատան մուտքին:  Մօտաւորապէս երկու ժամ տեւողութիւն ունեցող, այս հաւաքին ներկայ եղան շուրջ 250 ցուցարարներ: Ներկայ էին պատանիներ, երիտասարդներ եւ նոյնիսկ տարեցներ: Նաեւ, յոյներ ներկայ էին իրենց զօրակցութիւնը բերելու այս խաղաղ ցոյցին:

Նիւ Եորքի Հայաստանի դեսպանատան մուտքին

Լաւապէս կազմակերպուած այս հաւաքին, խօսք առին Հ.Ե.Մ.-ի անդամներ, որոնք բռնօրէն քննադատեցին ազերի բանակին սադրանքն ու կոյր ռմբակոծումները: Ներկայ էր Ա․Մ․Ն․ արեւելեան թեմի բարեջան առաջնորդ՝ Գերշ. Տ. Անուշաւան արք. Դանիէլեանը, ընկերակցութեամբ Նիւ Եորքի  Սուրբ Լուսաւորիչ Մայր Եկեղեցւոյ հոգեւոր հովիւ՝ Տ. Մեսրոպ քհն. Լագիսեանի եւ Նիւ Ճըրզիի հովիւ՝ գերպ. Տ. Սահակ Ծ. վրդ. Եմիշեանի:

Աւարտին, «Կիլիկիա» խմբերգով, ցուցարարները հեռացան Ատրպէյճանի դեսպանատունէն:

Միւս կողմէն, Պոսթընի «Հարվըրտ» (Քէյմպրիճ, Մասաչուսէց) համալսարանի մուտքին, Չորեքշաբթի Յուլիս 22-ին Հ.Ե.Մ.-ի շրջանի  «Նժդեհ» մասնաճիւղի անդամներ խաղաղ ցոյց մը կազմակերպեցին, իրենց անվերապահ աջակցութիւնը յայտնելով հայոց բանակին, հայ զինուորին եւ շրջանի անմեղ բնակչութեան։ Իսկ Շաբաթ, Յուլիս 25-ին, խանասորի արշաւանքին հետքերով, միեւնոյն շրջանէն ներս, այս երիտասարդականները, իրենց կողքին ունենալով նաեւ, շրջանի Հ.Մ.Ը.Մ.-ականներ, կազմակերպեցին հաւաք մը, կատարելով շուրջպար  եւ ազգային հայրենասիրական երգեր: Անոնք իրենց բողոքի ձայնը բարձրացուցին ատրպէյճանական բանակի հետզհետէ կրկնուող սադրանքին դէմ: Նաեւ ցուցարարները տեղւոյն հանրութեան ուշադրութեան յանձնեցին Հայաստանի եւ Արցախի հանրապետութիւններուն դէմ, Ատրպէյճանի եւ անոր զինակից Թուրքիոյ նենգամիտ, սին եւ ռազմատենչ քաղաքականութեան խորամանկ ծալքերն ու իրականութիւնը:

Այս երկու հաւաքներուն ալ ներկայ էին ազերի ցուցարարներ, որոնք փորձեցին աղաւաղել եւ ձախողութեան մատնել այս հաւաքները, սակայն ձախողեցան:

Be the first to comment

Leave a Reply

Your email address will not be published.


*