Եւրոպայի Հայ Դատի Յանձնախումբերը Վճռականութեամբ Կը Շարունակեն Իրենց Աշխատանքները


Եւրոպայի Հայ Դատի գրասենեակին նախաձեռնութեամբ, 21 յուլիս 2020-ին տեղի ունեցաւ Եւրոպայի տարածքին գործող Հայ Դատի յանձնախումբերու առցանց արտակարգ հանդիպում մը: 13 տարբեր եւրոպական երկիրներէ Հայ Դատի 30 ներկայացուցիչներ մասնակցեցան հանդիպումին: Ներկաները քննարկեցին Հայաստանի Տաւուշի մարզին ուղղութեամբ ազրպէյճանական ռազմական յարձակումին վերջին իրադարձութիւնները, ինչպէս նաեւ այս ընթացքին քաղաքական եւ դիւանագիտական գետնի վրայ  Եւրոպայի Հայ Դատի յանձնախումբերուն տարած եւ տանելիք աշխատանքները:

Հայ Դատի յանձնախումբերու ներկայացուցիչները վերահաստատեցին իրենց անվերապահ զօրակցութիւնը Հայաստանի եւ Արցախի ժողովուրդներուն, ինչպէս նաեւ հայկական բանակին` խստօրէն դատապարտելով ազրպէյճանական սադրանքներն ու Հայաստանի սահմանամերձ բնակավայրերուն վրայ եւ խաղաղ բնակչութեան դէմ անընդունելի ուժի կիրառումը:

Հայաստանի Հանրապետութեան տարածքային ամբողջականութեան դէմ ռազմական այս գործողութիւնները եւ ազրպէյճանական բարձրագոյն պետական պաշտօնեաներու կողմէ հնչած պատերազմական եւ ահաբեկչական կոչերը` մանաւանդ Մեծամօրի կորիզային ելեկտրակայանը հարուածելու սպառնալիքները անգամ մը եւս կու գան ապացուցելու Ալիեւի վարչակարգին` ոչ միայն տագնապը զինուորական միջոցներով լուծելու նպատակը, այլ նաեւ տարածաշրջանային մարդկային անվերաշրջելի աղէտ պատճառելու ծրագիրը:

Հայ Դատի յանձնախումբերու ներկայացուցիչները գնահատեցին Եւրոպական Միութեան անդամ այն բազմաթիւ պետութիւնները, Եւրոպական խորհրդարանի պատգամաւորները եւ Եւրոպական Միութեան անդամ պետութիւններու խորհրդարանի անդամները, որոնք, ընդառաջելով Հայ Դատի յանձնախումբերու կոչին, դատապարտեցին Ատրպէյճանի սադրանքները` վերջինէն պահանջելով անյապաղ դադրեցնել ռազմական գործողութիւնները, յարգել զինադադարի համաձայնագիրը, վերադառնալ բանակցութեան սեղան եւ պայքարիլ բացառապէս համաճարակին դէմ:

Հայաստան-Ատրպէյճան հիւսիսարեւելեան սահմանին տեղի ունեցած բախումները, Պաքուի մէջ ծնունդ տուին հակահայկական բողոքի ցոյցերու, որոնք աշխարհին բացայայտեցին ազրպէյճանական կառավարութեան հայատեաց պետական դատապարտելի քաղաքականութիւնը, որ հետզհետէ կը տարածուի հանրութեան մէջ եւ կը վնասէ խաղաղութեան տեսլական ստեղծելու միջազգային հանրութեան ջանքերուն:

Խիստ մտահոգիչ են նաեւ Ատրպէյճանի յարձակումին սատարող Թուրքիոյ կառավարութեան բացայայտ յայտարարութիւնները: Տասնամեակներէ ի վեր Թուրքիան, համագործակցաբար Ատրպէյճանի հետ, Հայաստանի ու Արցախի դէմ աշխարհաքաղաքական եւ տնտեսական մեկուսացման քաղաքականութիւն կը վարէ: Թուրքիոյ ռազմական հրահրումը կամ Արցախ-Ատրպէյճան հակամարտութեան մէջ ներգրաւուածութիւնը լուրջ վտանգ կրնայ ստեղծել ոչ միայն Հայաստանի եւ Արցախի ժողովուրդին ֆիզիքական անվտանգութեան, այլ նաեւ Եւրոպական Միութեան շահերուն եւ տարածաշրջանային խաղաղութեան ու կայունութեան:

Եւրոպայի տարածքին գործող Հայ դատի յանձնախումբերը վերահաստատեցին ամենայն վճռականութեամբ շարունակել իրենց աշխատանքը` ի նպաստ Հայաստանի Հանրապետութեան պետական շահերուն եւ հայ ժողովուրդի ամբողջական իրաւունքներու պաշտպանութեան` եւրոպական քաղաքական եւ լրատուական շրջանակներու մէջ իրազեկելով թուրք եւ ատրպէյճանական պետութիւններուն հակամարդկային, ահաբեկչական եւ կործանարար քայլերուն մասին:

ԵՒՐՈՊԱՅԻ ՀԱՅ ԴԱՏԻ ԳՐԱՍԵՆԵԱԿ

Be the first to comment

Leave a Reply

Your email address will not be published.


*