ՅԱՐՁԱԿԱՊԱՇՏ ԱՏՐՊԷՅՃԱՆ ՄԻՋԱԶԳԱՅԻՆ ԵՒ ՄԱՐԴԿԱՅԻՆ ԲԱՐՈՅԱԿԱՆ ՉԻ ՃԱՆՉՆԱՐ

0 0
Read Time:3 Minute, 43 Second

Մարք Յարութիւնեան

            Անոնք որոնք կը հետեւին միջազգային կեանքին եւ զայն յուզող հակամարտութիւններուն, հայեր թէ օտարներ, նկատած պիտի ըլլան, որ պսակաձեւ ժահրը՝ Covid 19ը, յաջողած է ընել այն ինչ, որ մեծ ժողովները չէին կրցած ընել, դադար տուած է միջազգային կարգ մը տագնապներու, մեծ եւ պզտիկ: Փնտռեցէ՛ք տեղեկութիւններ, գիտնալու համար, թէ ո՞ւր հասած են Միացեալ Նահանգներու եւ Իրանի առճակատման խնդիրները Պարսկական Ծոցին մէջ. տագնապը սառած է: Մամուլը լուռ է, տեղեկութիւն չի հաղորդեր Եմէնի առճակատումներուն մասին, ուր պատերազմով իրարու կը հակադրուէին Սէուտական Արաբիան եւ Իրանի Իսլամական Հանրապետութիւնը. կացութիւնը սառած է: Ոչ ոք կը խօսի Միացեալ Նահանգներու եւ Իսրայէլի միջեւ կայացած համաձայնութիւններու մասին, որոնք կը վերաբերին պաղեստինեան հողերուն եւ Երուսաղէմի:

            Երբ կը թուի թէ աշխարհ համավարակի դէմ մարդկութիւնը պաշտպանելու համար դադար տուած է իր հակամարտութիւններուն, Ատրպէյճան եւ անոր ետին կանգնած Թուրքիան, կը շարունակեն անձնատուր ըլլալ իրենց հակահայ մոլուցքին եւ յարձակապաշտութեան: Ինչ որ Մինսքի համանախագահները կոչուած են դիւանագիտութեամբ եւ բանակցութիւններու ճամբով լուծելու, Ատրպէյճան կ’անգիտանայ եւ կը դիմէ զէնքի ուժին: Այդ կ’ընէ մեծ յանդգնութեամբ, քանի որ Թուրքիա ամէն առիթով կը յայտարարէ, որ Ատրպէյճանի կողքին է՝ իր զինուորական ուժով: Թուրքիոյ պաշտպանութեան նախարարը անվարան կը յայտարարէ, որ Թուրքիա պիտի շարունակէ աջակցիլ Ատրպէյճանի, զայն պաշտպանելու համար Հայաստանի նախայարձակումներուն դէմ: Ան իսկապէս կը հաւատա՞յ, որ Հայաստան նախայարձակ է, իր խօսքին հաւատացող պարկեշտ քաղաղագէտ մը, կամ Մինսքի խմբակի համանախագահ մը կրնա՞յ գտնել:

            Քաղաքական վերլուծաբաններ կրնան ըսել եւ կրկնել, որ Կովկասի մէջ կը մղուի խուլ կամ ազդեցութեան տարածման բացորոշ պայքար Եւրոպայի, Մոսկուայի, Անգարայի եւ Թեհրանի միջեւ: Այս քաղաքական տեսութիւն է, որ Կովկասի մէջ պատերազմ է, հրասայլերով, հրթիռներով, խաղաղ ազգաբնակչութեան դէմ գործուած պատերազմական ոճիրներով, որոնց սուղ գինը կը վճարէ կրկին անգամ հայ ժողովուրդը: Այս խայտառակ կացութիւնը հետեւանք է Առաջին Աշխարհամարտի աւարտին աւստրօ-հունգարական եւ օսմանեան կայսրութիւններու պարտութեան եւ փլուզման, նոր սահմաններու գծման, անգիտանալով ժողովուրդներու պատմութիւնը, մշակոյթը եւ իրաւունքը, հապճեպ եւ շահախնդրուած մեղսակցութեամբ,  յաղթական դաշնակիցներուն եւ նորաստեղծ խորհրդային կայսրութեան: Այն ատեն է, որ փոխզիջումներու որպէս առեւտուր, ռուսական կայսրութեան նոր տէրը, Լենին, սիրաշահելու համար Թուրքիոյ նոր տէր Մուսթաֆա Քեմալը, հայկական դարաւոր բնավայր Արցախը կը զիջի Ատրպէյճանի:

            Երբ  ներկայի Թուրքիոյ եւ Ատրպէյճանի բնակիչներու նախնիները դեռ չէին ներխուժած Կովկաս, Անատոլու, Բիւզանդիոն եւ Միջին Արեւելք, պատմութիւնը կ’արձանագրէ, որ Արցախը եղած է Մեծ Հայքի 10րդ նահանգը, 15.500 քառակուսի քիլոմեթր տարածութեամբ, ունեցած է 12 գաւառներ, իր իշխաններով, եկեղեցիներով, վանքերով եւ կաթողիկոսութեամբ: Այսինքն Ատրպէյճանցիները եկուոր են, օտար են այդ աշխարհին, գրաւող են: Ապահովաբար այսքանը գիտեն Մինսքի խմբակի համանախագահները եւ իրենք զիրենք իրաւարարութեան կոչած պետութիւնները: Գիտեն նաեւ Թուրքիան եւ Ատրպէյճանը, բայց կռթնելով բիրտ ուժի տրամաբանութեան վրայ, կ’ուզեն բռնագրաւել եւ իւրացնել հայկական հողը, առանց արդարութեան եւ բարոյականութեան տուրք տալու:

            Այսօր, եթէ քաղաքականութեան մէջ կայ տարրական սկզբունքայնութիւն եւ բարոյական, միջազգային համայնքը չգոհանալով ճապկումներով, պէտք է ընդունի եւ յայտարարէ, որ սխալած է եւ շիլ հաշիւներով  Հայաստանի տարածք Արցախը դրած է Ատրպէյճանի կազմի մէջ: Նոյնիսկ Խորհրդային Միութիւնը, որպէս մեղմացուցիչ դէպք յանցանաց, Արցախը հռչակած էր Ինքնավար Մարզ: Հարց պէտք է տալ, թէ՝ ինչո՞ւ:

            Թուրք-ազերիական ծաւալապաշտ եւ մոլեռանդ ազգայնականութիւնը կը յատկանշուի անհանդուրժողկանութեամբ, որուն կը սպասարկեն անսանձ եւ բազմաձեւ սպառնալիքները, անտեսելով միջազգային օրէնքը, մարդկութեան դէմ ոճիր գործելու եւ ցեղասպանական անթաքոյց միտումներ:

               Ատրպէյճանի բանակի պատասխանատուներու արտայայտութիւնները յանցագործութիւն են, արժանի բողոքի, եւ պէտք է անոնք տարուին դատարան (International Penal Court): Երբ Ատրպէյճանի պաշտպանութեան նախարարութեան մամուլի բանբերը կը խօսի Մեծամօրը հիւլէակայանի ռմբակոծելու մասին (երեւակայել նման չարագործութեան մը ոճրային հետեւանքները), արդէն կը գտնուի ցեղասպանական ոճիր գործելու նախաշեմին:  Միջազգային համայնքը, այս գիտնալով, ինքնիրեն կրնա՞յ թոյլ տալ, որ աղէտը պատահի եւ յետոյ հակադարձէ, խօսի, դատէ:

            Ոճրածին գաղափարը պէտք է խեղդել երբ դեռ ոճիրը չէ գործուած:

            Ոչ ոք իրաւունք ունի ըսելու որ տեղեակ չէ: Յոռեգոյնը երբ պատահի, իր կրաւորականութեամբ իսկ յանցաւոր պիտի ըլլայ միջազգային համայնքը:

            Այսօ՛ր աւելի քան երբեք, միջազգային համայնքը ճշմարիտ խաղաղութիւն հաստատելու համար յոգնած եւ չարաշահուած մոլորակին վրայ, ժողովուրդներուն պէտք է վերադարձնէ իրենց ինքնութիւնը-յիշողութիւնը եւ գոյութիւնը պահելու եւ զարգացնելու իրաւունք-հնարը:

            Հայաստան ինչո՞ւ լուսաբանական օր մը չի կազմակերպեր, հրաւիրելով աշխարհի պատասխանատուները, Ախուրեանի ափ, Անի մայրաքաղաքին դիմաց, եւ հարց տալ անոնց, թէ բոլոր կրօններու եւ փիլիսափաներու ո՞ր տրամաբանութեամբ, ո՞ր պատմութեան վկայութեամբ եւ արդարացումով, ՀԱՅՈՑ ՊԱՏՄԱԿԱՆ ՄԱՅՐԱՔԱՂԱՔ ԱՆԻՆ ԿԸ ԳՏՆՈՒԻ ՇԱՀԱԴԻՏՈՒԹԵԱՄԲ ԳԾՈՒԱԾ ՉԱՐԱԿԱՄՈՒԹԻՒՆ ՎԿԱՅՈՂ ՍԱՀՄԱՆԻՆ ՄԻՒՍ ԿՈՂՄԸ:

            Ճշմարտութիւն՝ որ ո՛չ օրէնքի եւ ո՛չ ալ կարեւոր անձերը եւ ժողովները զբաղեցնող թուղթերու պէտք ունի: Օր ցերեկով աչքով տեսանելի:

            Վաղուան իրաւ խաղաղութեան համար, մեծերու եւ նուազ մեծերու ճապկումներու դիմակները վար պէտք է առնել՝ յանուն մարդկութեան բարիքին:

            Որպէսզի ոչ ոք մտածէ հիւլէակայան ռմբակոծել:

            Եւ չվարանիլ կանխարգիլման միջոցներու դիմել:

            Բանակցային անդադրում անպտուղ երթեւեկը քաղաքական գիջութիւն է:

            Բանակցողները ըլլան մեծ թէ պզտիկ, կամ բազմաթիւ եւ մեծանուն:

            Անարդար սահմանները սառած չեն կրնար մնալ, եթէ արդարութիւն եւ իրաւունք առաջնորդող արժէք են համաշխարհային խաղաղութեան համար:

 

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԵՐԻՏԱՍԱՐԴԱԿԱՆ ԱՆԿԻՒՆ․- ՆԱՄԱԿ ՀԱՅ ԶԻՆՈՒՈՐԻՆ
Next post Եւրոպայի Հայ Դատի Յանձնախումբերը Վճռականութեամբ Կը Շարունակեն Իրենց Աշխատանքները

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles