Ատրպէյճան Առաջին Անգամ Ուղղաթիռի Վրայ Ամրացուած Իսրայէլեան Հրթիռներ Գործածած Է


ԵՐԵՒԱՆ (Razm.info)․-  Հ.Հ. պաշտպանութեան նախարարութիւնը ցուցադրած է տաւուշեան մարտերէն ատրպէյճանական զինամթերքի մնացած բեկորներ, որոնք կը համապատասխանեն իսրայէլեան արտադրութեան Spike NLOS կառավարուող հրթիռներուն:

2018 թուականին հարցազրոյցի մը ժամանակ Ատրպէյճանի պաշտպանութեան նախարար Զաքիր Հասանով ըսած էր, որ դասեր քաղած են 2016-ի ապրիլեան մարտերու ժամանակ իրենց ուղղաթիռը կորսնցնելէն, աշխատանքներ տարած են, եւ հիմա ուղղաթիռները մարտ վարելու համար կարիք չունին հակառակորդի տարածք մտնելու եւ ատոր որպէս օրինակ յիշատակած էր Spike NLOS հրթիռը: Իսկ վերջերս ալ Ատրպէյճանի պաշտպանութեան նախարարութիւնը նաեւ հրապարակած էր լուսանկար, ուր Մի-17 ուղղաթիռի վրայ տեղադրուած էին Spike NLOS-ի համար նախատեսուած դիրքեր:

Յստակ թէ, թէ ի՞նչ հարթակէ արձակուած են հրթիռները, որոնք կրնան տեղադրուիլ եւ ցամաքային, եւ օդային հարթակներու վրայ, իսկ Ատրպէյճանի մէջ առաջին անգամ անոնք տեղադրած էին ռազմանաւերու վրայ:

Պաքու երբեք չէ ցուցադրած այդ հրթիռները` տեղադրուած ցամաքային հարթակներու վրայ, սակայն վստահաբար 2020-ի Յուլիսեան այս մարտերուն Ատրպէյճան առաջին անգամ ուղղաթիռներէ գործածած է Spike NLOS հրթիռները:

Միւս կողմէն, Հայաստանի պաշտպանութեան նախարարութեան «Մարշալ Արմենակ Խանփերեանց» անուան ռազմական օդանաւային համալսարանին մէջ ցուցադրուեցան Հայաստանի բանակին վար առած ատրպէյճանական անօդաչու թռչող սարքերը:

Գնդապետ Գարիկ Մովսէսեան լրագրողներու հետ ունեցած զրոյցին ընթացքին նշեց, որ զինուած ուժերու ծառայողները կարելիութիւն պիտի ունենան ուսումնասիրելու ատրպէյճանական անօդաչու թռչող սարքերը, որոնց մեծ մասը իսրայէլեան արտադրութիւն են:

 

Be the first to comment

Leave a Reply

Your email address will not be published.


*