ԱՏՐՊԷՅՃԱՆ ՊԱՐՏԵԱԼ՝ ԲՈԼՈՐ ՃԱԿԱՏՆԵՐՈՒՆ ՎՐԱՅ

0 0
Read Time:2 Minute, 23 Second

Ա.Ա.

Միացեալ Նահանգներու Քոնկրէսին Ներկայացուցիչներու Տունը քուէներու մեծամասնութեամբ վաւերացուց Նիւ Ճըրզիի դեմոկրատական հեղինակաւոր քոնկրէսական Ֆրանք Փալոնի հեղինակած օրէնսդրական նախաձեռնութիւնը, ըստ որուն լրացում կը կատարուի «Պաշտպանութեան Մասին» օրէնքին մէջ։
Փալոնի հեղինակած լրացման համաձայն, ամերիկեան երկու ամէնէն ազդեցիկ նախարարութիւնները՝ արտաքին գործոց եւ պաշտպանութեան, այսուհետեւ Քոնկրէսին պէտք է հաշուետուութիւն ներկայացնեն՝ ամերիկեան զինուորական օժանդակութիւն ստացած պետութիւններու բանակներուն եւ ապահովական ուժերուն ընդհանուր գործունէութեան մասին։ Զեկոյցներուն մէջ պէտք է յստակացուի, թէ արդեօք անոնք ամերիկեան օժանդակութիւնը ստանալէ ետք առնչուա՞ծ են միջազգային արժեչափերու խոտոր եւ կամ մարդու իրաւունքներու ոտնակոխման գործողութիւններու մէջ։ Եթէ նման խախտումներ նշուին, ապա զինուորական օժանդակութիւնը կը դադրի՝ օրէնսդրական օրէնքներու հիման վրայ։
Նիստին ընթացքին արտասանած իր խօսքին մէջ Փալոն շեշտեց, որ այս լրացման ընդունումը չափազանց կարեւոր է, մանաւանդ երբ ատրպէյճանական ուժերը Հայաստանի Տաւուշի մարզի ուղղութեամբ յարձակումներ կատարելով՝ հարուածներ կը հասցնեն Հայաստանի ապահովութեան եւ գերիշխանութեան։ Թարգմանը հանդիսանալով ամերիկեան բաւական հաստատուած եւ պատճառաբանուած քաղաքական մտածողութեան հետեւող հոսանքին տեսակէտին, Փալոն ըսաւ.«Որեւէ պարագայի, Միացեալ Նահանգներ պէտք չէ օժանդակութիւն ցուցաբերեն եւ գործակցին անխոհեմ քայլերու դիմող բռնատիրական պետութիւններու հետ, ուր մարդու իրաւունքներու պաշտպանութեան իրավիճակը պարզապէս սարսափելի է»։
Պէտք է նշել,որ Փալոնի այս նախաձեռնութեան միացան՝ Ատամ Շիֆ, Ճէքի Սփեյըր եւ Պրետ Շերմըն, որոնք դեմոկրատական ազդեցիկ քոնկրէսականներ են։ Շերմըն նախաձեռնութեան իր աջակցութիւնը յայտնեց լիագումար նիստին ընթացքին՝ յայտարարելով, որ անոր գլխաւոր հասցէատետրը մարդու իրաւունքներու մարզին մէջ վտանգաւոր խախտումներ կատարող Ատրպէյճանն է։
Այս նախաձեռնութեան իւրայատուկ կարեւորութիւնը այն է,որ եթէ անիկա գործադրուի, ապա կրնայ ուղղակի ազդել Ուաշինկթընի եւ Պաքուի միջեւ զինուորական բնոյթի համագործակցութեան կապուած զարգացումներուն վրայ։ Եւ պէտք է շեշտել, որ վերջին շրջանին այս համագործակցութիւնը զարգանալու յստակ միտումներ ունի։ Վերջին քանի մը տարիներուն ընթացքին Ատրպէյճան Միացեալ Նահանգներէն շուրջ հարիւր միլիոն տոլարի արժէքով զինուորական օժանդակութիւն ստացած է։
Ամերիկայի Հայ Դատի Ուաշինկթընի գրասենեակի գործադիր տնօրէն Արամ Համբարեան երախտագիտութիւն յայտնեց քոնկրէսականներ՝ Փալոնին, Շերմընին, Սփեյըրին եւ Շիֆին՝ նշելով, որ այս պահանջին իմաստը Ալիեւի վարչակազմը զինելու հարցին մէջ թափանցիկութիւն եւ հաշուետուութիւն ապահովելն է։
Տեղին է նշել,որ առաջարկուած էր չորս նախաձեռնութիւններ, որոնց միայն մէկը ընդունուեցաւ, իսկ միւս երեք նախաձեռնութիւնները, որոնք նաեւ կապ ունէին Ատրպէյճանի հետ, մերժուեցան։ Փոխարէնը՝ եւ ըստ երեւոյթին հաւասարակշռութեան պահպանման մօտեցումով մը, օրակարգին մէջ ընդգրկուեցաւ եւ հաստատուեցաւ Քոնկրէսի թրքական հարցերու յանձնախումբի համանախագահներ՝ Սթիւ Շեփըթի եւ Սթիվըն Քոհէնի հեղինակած լրացումը, որ արտաքին գործոց եւ պաշտպանութեան նախարարութիւններէն կը պահանջէ յատուկ զեկոյցով մը գնահատել ներքին գաղթականներու իրավիճակը՝ Ատրպէյճանի, Վրաստանի, Մոլտովայի եւ Ուքրայինայի մէջ։ Այս լրացման վերաբերեալ՝ Հայ Դատի Ուաշինկթընի գրասենեակը արդէն իսկ յայտարարած է, որ կտրականապէս դէմ է այս անոր, որովհետեւ Ատրպէյճանի յատկացուած հատուածին մէջ որեւէ յիշատակում չկայ Ատրպէյճանէն բռնագաղթուած հարիւր հազարաւոր հայերու, ինչպէս նաեւ Պաքուի եւ Սումկայիթի ցեղասպանական ջարդերուն մասին։
Քոնկրէսին կողմէ հաստատուած այս լրացումը, ինչպէս նաեւ Աշխարհի չորս ծագերուն ու մանաւանդ Ուաշինկթընի մէջ Հայ Դատի գրասենեակին կազմակերպուած բողոքի ցոյցերը, նաեւ՝ որոշումներու մայրաքաղաքներու եւ ընդհանրապէս քաղաքական ազդեցիկ շրջանակներու մէջ Ատրպէյճանի հակահայ քաղաքականութեան նկատմամբ ընդհանուր դիրքորոշումները Պաքուի դիւանագիտական պարտութիւնն են, որ սահմանային ճակատին վրայ արձանագրուած հայկական յաղթանակով առաւել կը բացայայտեն Ատրպէյճանի ապիկարութիւնը՝ թէ՛ դիւանագիտական, եւ թէ՛ զինուորական իմաստներով։ Իսկ պէտք է նաեւ կարեւորութեամբ շեշտել, որ Քոնկրէսին որոշումը նաեւ յաղթանակն է Ամերիկայի Հայ Դատի զինուորագրեալներուն։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post «Քարոզչական Պատերազմը Պիտի Չվերջանայ», Կը ՇեշտԷ Կիրօ Մանոյեան 
Next post Ջուր, Քարիւղ, Տագնապ… Պատերազմ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles