Հ.Մ.Ը.Մ.-ի Արեւելեան Ա.Մ.Ն.-ի Առցանց Սեմինար

Հ.Մ.Ը.Մ.-ի Ա.Մ.Ն. արեւելեան շրջանի գայլիկ, արծուիկ, եւ մոկլի պատասխանատուներու վերապատրաստման առցանց սեմինարը տեղի ունեցաւ Յունիս 20-ին եւ 27 -ին, կազմակերպութեամբ Հ.Մ.Ը.Մ.-ի Արեւելեան Ա.Մ.Ն.-ի Շրջանային Սկաուտական Խորհուրդին եւ առաջնորդութեամբ քոյր Դալար Քէշիշեանին: Առցանց սեմինարը պատրաստուած էր բոլոր
մասնաճիւղերու խմբապետ-խմբապետուհիներուն եւ գայլիկ, արծուիկ, եւ մոկլի պատասխանատուներուն համար։ Սեմինարին մասնակցեցան 20 աստիճանաւոր պատասխանատուներ, Պոսթընի, Շիքակոյի, Տիթրոյթի, Նիւ Ճըրզիի եւ Ուաշինկթընի մասնաճիւղերէն։
Սեմինարի ընթացքին պատասխանատուները ձեռք բերին նոր գիտելիքներ ու հմտութիւններ։ Պատասխանատուները փոքր խումբերու բաժնուելով մշակեցին գրասենեակային և արտագրասենեակային գործունէութեան, ինչպէս նաեւ շրջանային և տեղական բանակումներու ծրագրեր, ապա ներկայացուցին ընդհանուր խումբին։ Փոխանակեցին կազմակերպչական ոլորտի իրենց փորձը, նախկին բանակումներու ձեռքբերումներու ու վրիպակներու հիման վրայ։ Քննարկեցին իրենց մասնաճիւղերու առանցքային խնդիրները եւ տարբերակներ առաջարկելով գտան անոնց յարմար լուծումներ։ Պատասխանատուները վերյիշեցին խոստման արարողութեան օրինաւոր ձեւը, խօսեցան, յօդուածներու, տարիքային խումբերու բաժանման, մեծ կանչի եւ թոթեմի, կարգերու եւ աստիճաններու մասին, գտան գայլիկներուն ու մոկլիներուն բացատրելու պարզեցուած ձեւեր։
Յայտագիրը կը նեռարէր նաեւ դասախօսութիւններ: Պոսթընէն՝ Քոյր Թալին Սարեան դասախօսեց «Վարքագծային խնդիրներ» թեմայով, իսկ Տիթրոյթէն՝ ընկհ. Հելէն Աթթարի դասախօսութեան թեման էր «Յարաբերութիւններ տարբեր տարիքային խումբերու եւ անոնց ծնողներուն հետ»։ Խումբը նաեւ քննարկեց «Երեխաներու ընկերային եւ զգացական
զարգացումն ու առանձնայատկութիւնը ըստ տարիքային խումբերու» հիմնահարցը։ Երկու յաջորդական Շաբաթ օրերու վեցժամեայ սեմինարը ունէր նաեւ ընդմիջումներ, որոնց ընթացքին պատասխանատուները խաղցան հաճելի մրցումներ և զրուցեցին տարբեր նիւթերու շուրջ։ Սեմինարը ունեցաւ բարեյաջող ընթացք եւ աւարտ։

Be the first to comment

Leave a Reply

Your email address will not be published.


*