Արեւմտեան Ա․Մ․Ն․-ի Համազգայինը Կը Շարունակէ Իրականացնել Իր Ծրագիրները 

 


Ընթացիկ տարուան մշակութային ձեռնարկները ընդհատուեցան աննախադէպ կերպով, սակայն համազգային մշակութային միութիւնը պատշաճելով համաճարակի պատճառով ստեղծուած պայմաններուն, աշխուժօրէն կը շարունակէ իրականացնել բազմաթիւ ծրագիրներ օգտուելով համացանցի դրութենէն։ Գրական միաւորն ալ իր կարգին կը շարունակէ իր ծրագիրները առցանց:
Գրական Միաւորի գրաբարի դասընթացքը, որ սկսած էր 2019- ի Սեպտեմբեր ամսուան մէջ, Լիլիթ Խաչատրեանի դասաւանդութեամբ շարունակեց իր ընթացքը։ Լիլիթ Խաչատրեան բանասիրական գիտութիւններու
թեկնածութիւնը ստացած է Խաչատուր Աբովեանի անուան Հայկական Պետական Մանկավարժական համալսարանէն եւ ներկայիս կը բնակի Լոս Անճելըս։ Գրաբարի դասընթացքը դադրեցաւ Մայիսին, նոյն թափով վերսկսելու Սեպտեմբերին։

Գրական միաւորը վճռած էր աշխոյժ մնալ եւ գրաբարի դասընթացքը ժամանակաւորապէս փոխարինեց Հայոց Պատմութեան ամառնային դասախօսութիւններով ( Հայոց Պատմութիւնը Լուսարձակի Տակ)։ Յունիս ամսուայ դասախօսն էր պատմաբան դոկտ․Կարօ Մոմճեան նիւթ ունենալով հայ ժողովուրդի ծագումն ու զարգացումը։ Հայոց պատմութեան օգտաշատ դասախօսական այս շարքին մասնակիցներուն թիւը հետզհետէ աճեցաւ, որոնք առցանց կը միանային աշխարհի տարբեր շրջաններէ։ Ներկայիս դասախօսն է պատմաբան Արտակ Մովսիսեանը, որ Յուլիս ամսուայ չորեքշաբթի օրերը, երեկոյեան ժամը 8:00 ին պիտի դասախօսէ “Հայաստանի հնագոյն պատմութեան նորայայտ էջերը” խորագրով։ Արտակ Մովսիսյանը Երեւանի Պետական Համալսարանի Հայոց Պատմութեան ամպիոնի վարիչն է։Այս դասախօսական շարքերու աւարտին մասնակցողները, մտերմիկ մթնոլորտի մէջ, դասախօսին հետ կ՛ունենան զրոյցի եւ հարց պատասխանի առիթ։
Յաւելեալ տեղեկութիւններու համար, այցելել hazkayinlectureseries2020@gmail.com ել․ հասցէին կամ դիմատետրի վրայ այցելելով Hamazkayin Western Region Literary Group էջը:

Be the first to comment

Leave a Reply

Your email address will not be published.


*