ՀԱՅՈՑ ԲԱՆԱԿԻՆ ՊԱՏԺԻՉ ԳՈՐԾՈՂՈՒԹԻՒՆՆԵՐԸ ՑՆՑԵՑԻՆ ՊԱՔՈՒԻ ԻՇԽԱՆՈՒԹԻՒՆՆԵՐԸ

0 0
Read Time:2 Minute, 27 Second

Ա.Ա.
Յուլիս 12-ին Հայաստանի Տաւուշի մարզի հիւսիս-արեւելեան հատուածին սահմանային կէտին վրայ ատրպէյճանական ուժերուն կողմէ զինուորական ՈւԱԶ տիպի մեքենայով թափանցման ձախող փորձին պատճառով արձանագրուած բախումները ծանրագոյնը եղան՝ ապրիլեան քառօրեայ պատերազմէն ի վեր, եւ որոնց ընթացքին հայկական բանակը տուաւ չորս նահատակներ՝ հազարապետ Կարուշ Համբարձումեան, հարիւրապետ Սօս Էլպաքեան եւ կրտսեր տասնապետեր՝ Սմբատ Գաբրիէլեան եւ Կրիշա Մաթէոսեան։
Շուրջ երկու օր տեւած բախումները թէ՛ զինուորական եւ թէ՛ քաղաքական- դիւանագիտական առումներով եկան ապացուցելու որոշ հանգամանքներ, որոնց հիմնականը այս պարագային եղաւ հայկական ուժերուն ազդու եւ հատու հակահարուածը, որ տրուեցաւ սահմանին վրայ զինադուլը խախտած ազրպէյճանական բանակային ուժերուն։ Առաւել, երբ բացայայտուեցաւ, որ հայկական օդուժը յաջողած է ճշգրիտ հարուածներով ջախջախել ատրպէյճանական առնուազն ինը տրոններ, ապա բախումներուն ընթացքին հայկական պատասխանին պատժիչ բնոյթին ամբողջ տարողութիւնը եւ թշնամիին նկրտումները կասեցնելու հայկական ուժերուն կարողութիւնը եղան առանցքային նշանակութիւն ունեցող հպարտալի իրողութիւններ։ Պէտք է նշել, որ ջախջախուած անօդաչու սարքերուն շարքին եղաւ կեդրոնական հրամանատարական տրոն մը, որ օդէն կը կառավարէր հայկական դիրքերը ռմբակոծող ատրպէյճանական տրոններուն թռիչքները եւ գործողութիւնները։
Հայաստանի սահմանին վրայ արձանագրուած այս բախումներուն միջազգային ընտանիքին եւ Թուրքիոյ իշխանութիւններուն հակազդեցութիւններն ալ եկան վերյիշեցնելու հին-նոր կեցուածքներ եւ դիրքորոշումներ, որոնք թէեւ հայութեան համար նորութիւն չեն, սակայն կարեւոր է անոնց բովանդակութեան ամբողջական ընկալումը, որպէսզի ճշգրտումներ կատարուին թէ հայկական դիւանագիտութեան եւ թէ հակաթուրք պայքարին մէջ ։
Նախ Թուրքիոյ արտաքին գործոց նախարար Մեւլութ Չաւուշօղլու, ապա պաշտպանութեան նախարար Հուլուսի Աքար եւ հուսկ նախագահ Էրտողան՝ ամբողջական զօրակցութիւն յայտնելով եղբայրական Ատրպէյճանին եւ անոր ժողովուրդին ու ղեկավարութեան, թրքական յանկերգը կրկնելով՝ յայտարարեցին Հարաւային Կովկասի մէջ Հայաստանի վարած ծաւալապաշտական քաղաքականութեան դէմ դնելու Անգարայի վճռակամութեան մասին, թէ Հայաստան՝ Ատրպէյճանի պատկանող Լեռնային Ղարաբաղը գրաւելէ ետք, այժմ կը ջանան պատերազմական նոր գօտիներու ստեղծմամբ արգելակել ու խոչընդոտել Լեռնային Ղարաբաղի բանակցային հոլովոյթը։ Մինչ Աքար կը յայտարարէր, որ թուրքիա ամբողջական զօրավիգ է Ատրպէյճանի՝ զինուորական իմաստով, Էրտողան առաւելաբար խօսեցաւ «ներքին խնդիրները լուծելու անկարող Երեւանի իշխանութիւններուն ձախողութեան մասին», թէ անոնք քաղաքական արկածախնդրութեան դիմած են՝ Սահմանագիծին վրայ կացութիւնը սրելով։
Միջազգային ընտանիքին հակազդեցութիւնն ալ արժանի է յատուկ ուշադրութեան։ Հայաստան միջազգային հանրութիւնը եւ որոշումի տէր մայրաքաղաքները տեղեակ պահեց բախումներուն տուն տուած պատճառներուն մասին եւ առանց իրականութիւնները ծածկելու փոխանցեց,թէ ատրպէյճանցի զինուորներ իրենց զինուորական մեքենան ձգած ու փախուստ տուած էին ու ապա ազրպէյճանական դիրքերէ սկսած էր կրակոցներն ու հրետանային ռմբակոծումները։ Ատրպէյճանի իշխանութիւնները՝ հաւատարիմ իրենց նենգափոխման քաղաքականութեան, յայտարարեցին, որ հայկական ուժերը առանց որեւէ պատճառի սկսած են ռմբակոծել ատրպէյճանական դիրքերը։Եւ պարզ տրամաբանութեամբ կարելի է հետեւութիւն կատարել։ Հայկական դիրքերուն մօտ լքուած ատրպէյճանական ՈւԱԶ տիպի զինուորական մեքենան եւ….. «առանց պատճառի հայկական դիրքերէ ատրպէյճանական դիրքերու ռմբակոծում»։
Իսկ ինչ կը վերաբերի միջազգային հակազդեցութեան, ապա հին խաղին կրկնութիւնը շարունակուեցաւ։ Ոչ մէկ կողմ, ըլլայ անիկա Միացեալ Նահանգներ, Ռուսիա, թէ Եւրոպական Միութիւն, չհաճեցան իրողութիւնները իրենց անունով կոչել, այլ յարձակողն ու պաշտպանուողը դրին նոյն նժարին մէջ՝ երկու կողմերուն ինքնազսպման եւ անյապաղ կրակը դադրեցնելու կոչեր ուղղելով։
Այս կացութեան մէջ յստակ եւ անառարկելի իրողութիւնը եղաւ այն, որ հայոց բանակը յաջողեցաւ հատու հարուածներով պատժել յարձակող եւ զինադուլը կոպտօրէն խախտող ատրպէյճանական ուժերը, անոնց շարքերուն մէջ զօրավար, հազարապետ եւ զինուորներ սպաննելով։ Ասիկա չափազանց կարեւոր հանգամանք է եւ կը վկայէ հայոց բանակին մարտունակութիւնը, սահմանն ու հայրենի հողը արեան գնով պաշտպանելու նուիրեալներու այն երդումը, որ մեր հայրենիքը պահած ու պահպանած է բոլոր տեսակի թշնամիներուն դէմ։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Ատրպէյճանական Ուժեր Կը Շարունակեն Խախտել․․․
Next post Բանաստեղծ Եւ Բանաստեղծութիւն

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles