Հայրենադարձներու Յանձնախումբի Մամլոյ Ասուլիս

ԵՐԵՒԱՆ.- Յուլիս 8 -ին, Հ.Յ.Դ. «Սիմոն Վրացեան» կեդրոնին մէջ տեղի ունեցաւ Գերագոյն մարմինի Հայրենադարձներու յանձնախումբի մամլոյ ասուլիսը:

Յանձնախումբի համակարգողներ Սիմոն Գաֆալեան եւ Ժիրայր Պէօճէքեան ներկայացուցին ստեղծուած իրավիճակին լոյսին տակ Հայաստանի մէջ ապրող հայրենադարձներու հարցերը, Հայ Յեղափոխական Դաշնակցութեան կողմէ իրականացուող ծրագիրները։ Անոնք անդրադարձան նաեւ Սփիւռքի գործերու ընդհանուր յանձնակատարի գրասենեակին կողմէ իրականացուող ծրագիրներուն։

«Կազմակերպած ենք հայրենադարձ ընտանիքներու հետ հինգ հանդիպում, կեդրոնացած ենք առողջապահական, կրթական, դրամատնային խնդիրներու վրայ: Հանդիպում կազմակերպած ենք IT ոլորտի մեր հայրենակիցներուն հետ, փորձած ենք հայրենադարձ այդ մասնագէտները մասնակից դարձնել մեր աշխատանքներուն: Ամէնէն աւելի այդ ոլորտի աշխատանքներու յայտարարութիւններն են, որոնք կը տեղադրենք մեր դիմատետրի էջին վրայ: Մեր ստացած բոլոր նուիրատուութիւնները ամբողջութեամբ փոխանցած ենք զինուորներու վերականգնողական կեդրոնին», ըսաւ Ժիրայր Պէօճէքեան՝ աւելցնելով, որ իրենք առաւելապէս խորհրդատուական, այլ ոչ թէ հայրենադարձութիւն կազմակերպող մարմին են:

Անդրադառնալով «Քորոնա» ժահրի հարցերուն՝ Ժիրայր Պէօճէքեան նշեց, որ այս ընթացքին Հ.Յ.Դ. Գերագոյն մարմինի Հայրենադարձներու յանձնախումբը սննդամթերք տրամադրած է 220 ընտանիքներու, որոնց կարգին՝ ոչ միայն հայրնեադարձներու, այլ Հայաստանի քաղաքացիներու եւ Հայաստան գտնուող օտար ուսանողներու:

Ան նաեւ տեղեկացուց, թէ կայ բարերար մը, որ պատրաստակամութիւն յայտնած է վճարել Շուշիի մէջ բնակութիւն հաստատող հինգ հայրենադարձ ընտանիքներու հինգ տարուան բնակարանային վարձքը: Առայժմ ընտանիք մը փափաք յայտնած է բնակիլ Արցախի մէջ:

Սիմոն Գաֆալեանյայտնեցւ, որ հայրենադարձ ընտանիքները բազմաթիւ շնորհակալական խօսքեր կ՛ուղղեն յանձնախումբին, որովհետեւ Հայաստանի մէջ հարազատ չունենալով՝ անոնք միշտ իրենց կը դիմեն։ Ան յայտնեց, որ այդ մարդոցմէ շատեր յաճախ հազիւ ի վիճակի կ՛ըլլան հանապազօրեայ հաց վաստկելու եւ փոքրիկ գործարարութիւն մը հիմնելու, բայց այդ ճամբուն վրայ բազմաթիւ դիւանակալական դժուարութիւններու կը հանդիպին:

«Պէտք է պայմաններ ստեղծուին, որ իւրաքանչիւր անձ ցանկայ գալ Հայաստան», ըսաւ Գաֆալեան եւ շեշտեց, որ Հայաստանի մէջ հայրենադարձութեան օրէնքը յստակ չէ:

 

 

Be the first to comment

Leave a Reply

Your email address will not be published.


*