“ՍԵԼԵԿՏԻՎ ԱԲՈՐՏ”-ՆԵՐ ԵՒ ԿԵԴՐՈՆԱԿԱՆՑԻ ԱՐՄԵՆԱԿ

0 0
Read Time:2 Minute, 0 Second

 

                Վերջապէս ամառ է: Էլպիս եւ Արմենակ աւելի յաճախ կու գան եւ դարման կը բերեն ձանձրախտին: Կը բերեն նաեւ Ս. Լուդովիկոս կղզիի պաղպաղակը:

            Թզենիի խոշոր տերեւներու ստուերին, առանց դիմակի նստած, կը զրուցենք:

            Արմենակ զարմացած դիտեց լոլիկի տունկերուն դեղին ծաղիկները:

            Էլպիս եւ Մակարուհի պաղպաղակ եւ ընկոյզով ու միրգերով պատրաստուած կարկանդակ բերին, շարունակելով իրենց զրոյցը մօտալուտ զեղչ-վաճառքի օրերուն մասին: Ի վերջոյ կին են, եւ միշտ գնելիք կ’ունենան:

            Արմենակ գնահատեց Մակարուհիին կարկանդակը: Նկատելով որ զինք ընդմիջող չկար, շարունակեց.

            – Երջանիկ էք, Հայաստանի թերթերը չէք կարդար, չէք անհանգստանար հայրենիքի եւ մեր ժողովուրդի անկումային հարցերուն ի լուր եւ ի տես:

            Էլպիս միջամտեց.

            – Նորէն ի՞նչ գտած ես աշխարհը սեւ տեսնելու համար:

            – Եթէ դուք ալ թերթերը կարդաք, լսէք նախարարները, դուք ալ սեւ կը տեսնէք:

            Առաջքը առնելու համար Արմենակի անտարբերութեան դէմ ճառին, հարցուցի.

            – Արմենա՛կ, կրկին ի՞նչ պատահած է դրախտավայրին մէջ:

            – Որպէսզի  չխորհիք, թէ կը չափազանցեմ, լսեցէ՛ք Հայաստանի նախարարի խօսքը,- եւ կարդաց. «…Հայաստանում սելեկտիվ աբորտների պատճառով տարեկան չի ծնուում մօտ 1.300 աղջիկ, իսկ վերջին 25 տարիների ընթացքում չի ծնուել 40.000 աղջիկ։ Նախարարը նաեւ կոչ արեց տարբերություն չդնել տղաների և աղջիկների միջեւ եւ կարեւորել բոլոր երեխաներին»։

            Մակարուհին հարցուց.

            – Ի՞նչ է սելեկտիվ աբորտը:

– Հայաստանի մէջ գիտութիւնը յառաջդիմած է: Յղի հայ կիները եւ անոնց ամուսինները, երբ գիտնան թէ ծնելիք երեխան աղջիկ է, կը դիմեն վիժումի, յառաջադէմ  հայերէնով՝ ապորթի: Այս կ’ընեն այր մարդոց թիւը աւելցնելու համար:

            Մակարուհին ըսաւ.

            – Ուրեմն 40.000 ապագայ մայրերը չծնած մեռցուցեր են, խափանած են նաեւ ապագայ այրերու ծնունդը: Մեռցնելով ե՛ւ ապագայ հայրերը ե՛ւ ապագայ մայրերը: Այդպէս: Եթէ այդ ապագայ 40.000 մայրերը չորսական զաւակ ունենային, 160.000: Մեր թիւը այդքանով նուազեցուցած ենք: Ամօթ մեզի, ինքնացեղասպանութիւն կը գործենք, շարունակելով թուրքին գործը:

            Քչախօս Էլպիս լուռ կը լսէր: Երբ լռեցինք, ինք շարունակեց.

            – Մակա՛ր, դուն գրոց-բրոց ես: Նամակ գրէ՛ նախագահին, կաթողիկոսին, վարչապետին, լեզուի տեսչութեան, ակադեմիկոսներուն, որ ըստ Սահմանադրութեան  հայերէնը կենդանացնելու համար, լեզուի սելեկտիվ ապորթ ընեն, որպէսզի մեր ինքնութիւնը փրկենք: Սելեկտիվ աբորտը վիժեցնենք:

            Արմենակ շարունակեց.

            – Եթէ հայ աղջիկներ չըլլան, մանչուկները երբ մեծնան, կին պիտի փնտռեն, եւ օտար աղջիկները պիտի բերեն, եթէ մինչ այդ այր եւ կնոջ տարբերութիւնը ջնջուած չըլլայ, վասն արդիականութեան:

            Փողոցէն սուլելով եւ խլացնելով շտապ օգնութեան կառք մը անցաւ:

            Սելեկտիվ աբորտ ընելու համար շտապ օգնութեան կառքի պէտք չկայ: Ոտքով կ’երթան եւ կու գան:

            Արմենակ կարկանդակի վերջին պատառը կուլ տալէ ետք, հնդիկ կուրուի պէս խօսեցաւ.

            – Ազգի համրանքին ե լեզուին համար շտապ օգնութեան կարիք կայ: Ի՞նչ կը բանին ֆէյսպուքեան շատախօս բուժարարները:

             Եւ ոտքի ելաւ մեկնելու համար:

 

Մակար ի Գաղիա, 9 յուլիս 2020

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՄԱՀԱԶԴ
Next post Լոյս Տեսաւ .- «Վէմ»-ի Նոր Թիւը․․․ Նաեւ՝ Քրիստափոր Միքայէլեանի Անտիպ Նամակները

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles