ԽԱՂԱՂՈՒԹԵԱՆ ՄԱՍԻՆ ԱՐՑԱԽԻ ԺՈՂՈՎՈՒՐԴԻՆ ՊԱՏԿԵՐԱՑՈՒՄԸ ԱՐԴԱՐ ԼՈՒԾՄԱՆ ԵՐԱՇԽԻՔ Է

0 0
Read Time:2 Minute, 40 Second

Ա.Ա.
ԵԱՀԿ Մինսքի խումբի համանախագահները Հայաստանի եւ Ատրպէյճանի արտաքին գործոց նախարարներ՝ Զոհրապ Մնացականեանի եւ էլմար Մամետիարովի հետ, նախ առանձին, ապա միատեղ տեսակապէն ետք յայտարարեցին, որ քննարկած են Հարաւային Կովկասի առողջապահական ընդհանուր իրավիճակը, նաեւ՝ Լեռնային Ղարաբաղի տագնապին ներկայ կացութիւնը եւ խաղաղութեան հոլովոյթին յաջորդ քայլերը։
Համանախագահները իրենց յայտարարութեան մէջ շեշտեցին բովանդակային բանակցութիւններուն եւ խաղաղութեան հոլովոյթին նպաստող մթնոլորտի խթանման եւ պահպանման կարեւորութիւնը։Անոնք դրական գնահատեցին սահմանային գիծին վրայ համեմատական կայունութիւնը եւ գոհունակութիւն յայտնեցին, որ կողմերը կը շարունակեն կիրառկել ուղիղ հաղորդակցութեան ուղիները՝ լարուածութենէն խուսափելու համար։Համանախագահները սակայն մտահոգութիւն յայտնեցին, որ գրգռիչ վերջին յայտարարութիւնները եւ հռետորաբանութիւնը կրնան խարխլել լուծման հոլովոյթը։ Շեշտելով, որ Լեռնային Ղարաբաղի տագնապը զինուորական լուծում չունի, համանախագահները կողմերուն կոչ ուղղեցին լրացուցիչ քայլերու դիմելու՝ զինադուլը ամրապնդելու եւ բնակչութիւնները խաղաղութեան նախապատրաստելու համար։
Տեղին է նշել,որ երէկուան տեսակապին ընթացքին որոշուեցաւ յուլիսին եւս նման ձեւի խորհրդակցութիւններ կայացնել։
Մինսքի խումբին համանախագահներուն յայտարարութեան մէջ նշուած երկու գաղափարներ՝ «կողմերուն միջեւ ուղիղ հաղորդակցութեան ուղիներու գործածութեան եւ բնակչութիւնները խաղաղութեան նախապատրաստելու աշխատանքներու մասին», ուշադրութեան արժանի են, որովհետեւ կը բովանդակեն եթէ ոչ ամբողջական մերձեցման, գէթ որոշ չափով կապի եւ հաղորդակցութեան ու լուծման պատկերացման մը տակաւին շատ հեռու նշոյլներու տարրեր։
Հայաստանի եւ Ատրպէյճանի ղեկավարներուն՝ վարչապետ Նիկոլ Փաշինեանի եւ նախագահ Իլհամ Ալիեւի միջեւ գաղտնիք մը չէ, որ հաստատուած է թէժ գիծ՝ ի հարկին ուղղակի կապուելու եւ յատկապէս լարուածութեան մեղմացման նպատակով միտքեր եւ գաղափարներ, նաեւ՝ ըսելիք փոխանցելու համար։Նման քայլ Մինսքի համանախագահներուն կարծիքով կը համարուի բաւական կարեւոր յառաջընթաց, որովհետեւ նախապէս ուղղակի հաղորդակցութեան ուղիներ չկային եւ ամէն ինչ կը կատարուէր կամ Մինսքի համանախագահներուն, կամ ալ ԵԱՀԿ գործող նախագահի անձնական ներկայացուցիչին գրասենեակին միջոցով։Տակաւին, իբրեւ կապ երկու կողմերուն միջեւ, կը գործէ Միջազգային Կարմիր Խաչը, որուն երեւանեան եւ պաքուի գրասենեակներուն ներկայացուցիչները գործի կը լծուին գերիներու կամ սահմանագիծին վրայ սպաննուած զինուորներու դիակներու փոխանակման պարագային։
Ուշադրութեան արժանի երկրորդ տարրը վերջին շրջանին Փաշինեանի կողմէ շրջանառութեան դրուած՝ լուծում մը Հայաստանի, Ատրպէյճանի եւ Արցախի ժողովուրդներուն կողմէ ընդունելի ըլլալու պատկերացման մթնոլորտը ունեցող, Ժողովուրդները խաղաղութեան պատրաստելու մասին կատարուած նշումն է, որ Մինսքի համանախագահներուն կողմէ յաճախ կը գործածուի։ Բայց միշտ պակասաւոր բանաձեւմամբ։
Հայաստանի, Ատրպէյճանի եւ Արցախի ժողովուրդներուն ունեցած՝ խաղաղութեան մասին պատկերացումները եւ ակնկալութիւնները իրարու նման չեն։Ատրպէյճանի ժողովուրդը խաղաղութիւնը կը տեսնէ միայն Լեռնային Ղարաբաղի Ատրպէյճանի կազմին վերադարձով։Նաեւ՝ շրջան ատրպէյճանցիներու վերադարձէն ետք։Նախապայմաններ, որոնց գործադրութենէն ետք միայն, կարելի է խօսիլ եւ համադրել Լեռնային Ղարաբաղի կարգավիճակը, որ առաւելագոյնը կրնայ լայ ինքնավարութիւն՝ Ատրպէյճանի ենթակայութեան տակ։Ասկէ այլ լուծում խաղաղութիւն չի բերեր եւ տագնապին ալ վերջ չի դներ։Այսինքն՝ Ատրպէյճան իշխանութեան եւ ժողովրդային մակարդակներու վրայ բնաւ չ՛ընդունիր Արցախի անկախութիւնը եւ գերիշխանութիւնը։
Արցախի ժողովուրդին խաղաղութեան պատկերացումը կը բխի մէկ եւ ամբողջական իրաւունքէ, որ իր հայրենի հողերուն վրայ ազատ ու ինքնիշխան ապրելու անսակարկելի բնական իրաւունքն է։Առանց ազատ հայրենիքի, ինքնիշխան եւ գերիշխան պետութեան, Արցախի ժողովուրդը խաղաղութեան պատկերացում չունի եւ ոչ ալ նախապայմաններ ընդունելու հարկադրանքին տակ կը գտնուի։Նախապայման, թէ Ատրպէյճանի ենթակայութեան անցնելէ ետք միայն կարելի է խօսիլ լայն ինքնավարութեան մասին, ի սկզբանէ մերժուած է՝ արցախցիներու անկախութեան հռչակագրով եւ ապա հանրաքուէով, որոնք ամրագրած են Արցախի անկախութեան, պետութեան գերիշխանութեան եւ ժողովուրդին ալ ազատ ապրելու իրաւունքները։ Այլ բովանդակութեան մէջ խաղաղութեան տարրեր չկան արցախցիներուն համար եւ ասիկա շատ յստակ է ու հաստատուած արցախեան գոյամարտով, բիւրաւոր նահատակներու արեամբ կնքուած յաղթանակով։
Եւ յստակ է, որ «ժողովուրդները խաղաղութեան նախապատրաստելու մասին» Մինսքի խումբին համանախագահներուն յաճախակի ակնարկութիւնները խնդրին էութեան կապուած կեցուածքներու եւ դիրքորոշումներու միջեւ առկայ խոր տարբերութիւններուն ենթահողին վրայ, միայն ու միայն խօսքի սահմաններուն մէջ կը մնան՝ ընկալումներու էական տարբերութիւններու պատճառով։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Լոյս Տեսաւ․- Հ․Յ․Դ․ Պաշտօնաթերթ «Դրօշակ»-ի Է․ Համարը
Next post Ճշմարտութիւնը Եւ Իրականութիւնը Տեսանելի Չեն 

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles