Յայտարարութիւն` «Բարգաւաճ Հայաստան» – Հ.Յ.Դ. -«Հայրենիք»

ԵՐԵՒԱՆ․- «Բարգաւաճ Հայաստան» – Հ.Յ.Դ. -«Հայրենիք» կուսակցութիւններու ներկայացուցիչները, Հայաստանի ընդհանուր դատախազութեան առձեռն յանձնեցին երեք կուսակցութիւններու միացեալ հաղորդումը` յանցագործութեան մասին:

Միւս կողմէն, Հ․Յ․Դ․ Հայաստանի Գերագոյն մարմինի ներկայացուցիչ Իշխան Սաղաթէլեանը` «Ազատութիւն» ձայնասփիւռի կայանի դիմատետրեան ասուլիսի ժամանակ պատասխանելով այն հարցումին, թէ ո՞ւր պիտի տանի ընդդիմադիրներու ճամբու քարտէսը, յայտնեց, թէ «Ստեղծուած իրավիճակէն ելքը կը նկատենք արտահերթ խորհրդարանական ընտրութիւնները»։

Անդրադառնալով այն դիտարկումին, թէ ինչո՞ւ հիմա կը պահանջեն արտահերթ ընտրութիւններ, եթէ 2018-ին անհրաժեշտ սահմանը չանցան, Իշխան Սաղաթէլեան պատասխանեց. «Այստեղ յաջողիլ-չյաջողելու հարցը չէ, մարդիկ կ՛ուզէին ապրիլ արժանապատիւ, անցած է երկու տարի եւ գործող իշխանութիւնը այս պահանջներէն շեղած է, երկրին մէջ կայ քաղաքական եւ կառավարման ճգնաժամ, եւ մենք կը կարծենք, որ այս պահանջները իրականութիւն դարձնելու համար անհրաժեշտ է նոր որակի իշխանութիւն, որ ժողովուրդը կրնայ ձեւաւորել ընտրութիւններու միջոցով»:

Ան նշեց, որ իշխանութիւնը երկու տարի է, որ հիմնական թեզ մը ունի` «թալանած են», «գողցած են», մինչդեռ այս տարիներուն, երբ իրենք իշխանութիւն ունէին, որեւէ բան չէ վերադարձած:

«Համագործակցութիւնը որեւէ քաղաքական ուժի հետ չի նշանակեր միաձուլուիլ եւ հրաժարիլ սեփական արժէքներէն, ծրագիրներէն, տեսակէտէն կամ ինքնուրոյն օրակարգէն: Մենք տարբեր ժամանակաշրջաններու մէջ տարբեր քաղաքական ուժերու հետ տարբեր օրակարգերով համագործակցած ենք, բայց միշտ պահած ենք մեր ինքնուրոյնութիւնը։․․․Դաշնակցութիւնը ունի իր սեփական դիմագիծը, եւ մենք երբեք չենք կրնար նոյնանալ ոեւէ մէկուն հետ», եզրակացուց ըսաւ Սաղաթէլեան։

 

Be the first to comment

Leave a Reply

Your email address will not be published.


*