Էրտողան Կը Փորձէ Ահաբեկել Հայ Դատի Գործիչները

ՊՐԻՒՔՍԷԼ.- Յունիս 18-ին, Եւրոպայի Հայ դատի յանձնախումբը հանդէս եկաւ յայտարարութեամբ` դիմելով եւրոպական կառոյցներուն, որոնց կարգին` Եւրոպական խորհրդարանին, Եւրոպական Միութեան խորհուրդին, Եւրոպական յանձնաժողովին, Եւրոպական խորհուրդին, եւ կոչ ուղղեց, քայլերու ձեռնարկելու թրքական իշխանութիւններուն կողմէ Հայ դատի գործիչներուն դէմ ուղղուած քաղաքականութեան նկատմամբ:

Նշենք թէ, քանի մը օր առաջ, Թուրքիոյ նախագահ Ռեճէպ Թայիպ Էրտողանը ղեկավարած էր իր աշխատակազմի խորհրդատուական մարմինի` մօտաւոր հինգ ժամ տեւողութիւն ունեցող հանդիպում մը, որուն ընթացքին քննարկուած էր Հայոց ցեղասպանութեան ճանաչման համար պայքարող քաղաքացիական գործիչներու դէմ ճնշումներ կազմակերպելու հարցը: Այսպիսով Էրտողան նախ եւ առաջ կը թիրախաւորէր եւ կը փորձէր ահաբեկել Հայ դատի յանձնախումբերը, որոնք ամբողջ աշխարհին մէջ տասնամեակներ շարունակ արդիւնաւէտ ձեւով կը պայքարին Հայոց ցեղասպանութեան ճանաչման համար:

Եւրոպայի Հայ դատի յանձնախումբի նախագահ Գասպար Կարապետեան տեղեկացուց, թէ. «Այս հանդիպումը, փաստօրէն, Էրտողանի` այս տարուան մայիս ամսուան կատարած յայտարարութեան տրամաբանական շարունակութիւնն է, երբ ան սպառնաց պայքարիլ հայկական լոպիին դէմ, որ անշուշտ, նախ եւ առաջ կ՛ընդգրկէ ամբողջ աշխարհին մէջ գործող Հայ դատի յանձնախումբերը: Ասիկա անգամ մը եւս կ՛ապացուցէ, որ, ցաւօք, Հայոց ցեղասպանութեան ժխտումը եւ հայերուն դէմ ատելութեան սերմանումը Թուրքիոյ պետական քաղաքականութիւնն են:

«Այժմ Էրտողանի կառավարութիւնը պաշտօնապէս եւ բացայայտօրէն որոշում տուած է ահաբեկման պետական քաղաքականութիւն վարել ամբողջ աշխարհին մէջ Հայոց ցեղասպանութեան ճանաչման համար պայքար մղողներուն դէմ: Սակայն, թրքական իշխանութիւնները պէտք է արդէն հասկցած ըլլային, որ Հայ դատի գործիչներուն դէմ ահաբեկումը` ինչպէս չէ գործած նախապէս, նաեւ պիտի չգործէ ապագային ալ: Ընդհակառակը, ասիկա նոյնիսկ ազդակ է` ալ աւելի աշխուժ գործունէութիւն ծաւալելու եւ յանուն արդարութեան հաստատման մեր ուժերը ալ աւելի միաւորելու: Այս հանդիպումը, սակայն, անգամ մը եւս ցոյց տուաւ Էրտողանի կառավարութեան իրական դէմքը, եւ թէ ի՛նչ քայլեր առնելու ընդունակ է անիկա:

«Հայոց ցեղասպանութեան ճանաչումը, դատապարտումը, ինչպէս նաեւ հատուցումները համընդհանուր արդարութեան հաստատման խնդիր են: Թուրքիան ստիպուած է իր անցեալին հետ հաշուի նստելու: Այս է, որ Թուրքիայէն կը պահանջեն աշխարհի տասնեակ երկիրներու խորհրդարաններ, այդ կարգին նաեւ` Եւրոպական խորհրդարանը»:

Be the first to comment

Leave a Reply

Your email address will not be published.


*