ՀԱՅԱՍՏԱՆԵԱՆ ՆԵՐՔԱՂԱՔԱԿԱՆ ԿԵԱՆՔԸ ԱՌՈՂՋ ՉԷ

0 0
Read Time:1 Minute, 48 Second

Ա.Ա.

“Բարգաւաճ Հայաստան” կուսակցութեան ղեկավար Գագիկ Ծառուկեանը խորհրդարանական անձեռնմխելիութենէն զրկելու Ազգային Ժողովին որոշումը, ապա Ազգային Անվտանգութեան Ծառայութեան կողմէ՝ Երեւանի ընդհանուր իրաւասութեան դատարանին կատարուած միջնորդութիւնը, Ծառուկեանը կալանաւորելու վերաբերեալ, հայաստանեան ներքաղաքական բաւական մտահոգիչ եւ վտանգաւոր զարգացումներն, որոնք արձանագրուեցան վերջին քառասուն ութ ժամերուն։
Ծառուկեանի դէմ առաջադրուած է մեղադրանք՝ կաշառք տալու եւ պետութեան մեծ գումարներու վնաս պատճառելու յանցանքներով։ Սկզբունքով եւ տեսականօրէն ան որ նման յանցանքներ գործած է պէտք է դատուի եւ արդար պատիժը ստանայ։Այս իրականութիւնը ոչ սակարկելի, ոչ ալ քաղաքական շահարկումներու նիւթ է։
Բայց։ Հայկական հասարակական կարծիքը այնքան ալ միամիտ չէ, որ հաւատայ, օրինակի համար, Հայաստանի ընդհանուր դատախազ Արթիւր Դաւթեանի այն յայտարարութեան, թէ Ծառուկեանի դէմ առաջադրուած մեղադրանքներուն քննական գործերը փետրուարին վերջ գտած են եւ վերջին շաբաթներուն միայն ամբողջացած է դատական թղթածրարը։ Հետեւաբար խորհրդարանական անձեռնմխելիութենէ զրկելու նիստին կայացումը քաղաքական պատուէր չէ։
Անշուշտ այս իմաստով կան որոշակի հարցադրումներ։
Զուգադիպութիւ՞ն է, որ Ծառուկեանը խորհրդարանական անձեռնմխելիութենէ զրկելու Ազգային Ժողովի որոշումը կը տրուի՝ վարչապետ Նիկոլ Փաշինեանի կառավարութիւնը հարիւր առ հարիւր ձախողած համարելու Ծառուկեանի յայտարարութենէն ետք։ Եւ որքան ալ ճիգեր թափուին՝ “Բարգաւաճ Հայաստան” կուսակցութեան ղեկավարին դէմ շղթայազերծուած արշաւի մը գոյութիւնը ուրանալու եւ այս քայլերը զուտ դատաիրաւական ծիրի մէջ տեսնելու իմաստով, իրականութիւնը իր ամբողջութեան մէջ տեսնելու կարողութիւնը տակաւին բարեբախտար գոյութիւն ունի։
Նախ ընտրական կաշառք վճարելու խնդրին մասին։ Գաղտնիք մը չէ, որ Հայաստանի խորհրդարանական ընտրութիւններուն ընթացքին ընտրական կաշառք վճարուած է։ Եւ այս իմաստով Ծառուկեանի դէմ առաջադրուած մեղադրանքը քաղաքական վրէժխնդրութիւն մը ըլլալու կասկածներ չէին ըլլար, եթէ ընտրական կաշառքի խնդրով այլ հանրայայտ պարագաներ ալ դատարան յանձնուէին միաժամանակ։ Իսկ թէ ինչու Ծառուկեանի դէմ մեղադրանքին կապուած զարգացումները այսքան արագ ընթացք ունեցան եւ հասան մինչեւ խորհրդարանական անձեռնմխելիութեան վերացման եւ կալանաւորման միջնորդութեան, կասկածները առաւել կը շեշտադրեն, թէ պատահածը քաղաքական վրէժխնդրութեան մը բաղադրիչները կը պարունակէ , եւ միայն զուտ դատաիրաւական հոլովոյթ մը չէ։
Հայաստանի մէջ արձանագրուած նորագոյն զարգացումները նաեւ մեծ հարցականներ կը գծեն երկրին արդարադատութեան համակարգին շուրջ, մանաւանդ առաջնորդուելով ընդհանուր դատախազին անցեալի վարքագիծէն, երբ ան նախկին իշխանութիւններուն օրերուն պատգամաւոր Նիկոլ Փաշինեանը նախ խորհրդարանական անձեռնմխելիութենէ զրկելու միջնորդութեամբ Ազգային Ժողով ներկայացաւ, ապա այդ օրերու փոխ վարչապետին միջամտութեամբ յետս կոչեց միջնորդութիւնը։ Նոյն ընդհանուր դատախազը հիմա Վարչապետ Նիկոլ Փաշինեանի կառավարութեան օրով ընդդիմադիր ամէնէն մեծ պատգամաւորական խմբակցութեան ղեկավարը խորհրդարանական անձեռնմխելիութենէ զրկելու միջնորդութիւն կատարեց։
Զարգացումներու եւ իրադրութիւններու շղթային օղակներու ագուցմամբ հայաստանեան քաղաքական կեանքին պատկերը առաւել քան յստակ կը դառնայ եւ որ բնաւ յուսալից չէ։

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Զօրակցի՛նք Լիբանանահայ գաղութին
Next post Լիբանանահայութիւնը Դատական Հարց Յարուցեց

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles