ԸՍՏ ԿԵԴՐՈՆԱԿԱՆՑԻԻՆ՝ ԱԶԳԻ ՓՐԿՈՒԹԻՒՆԸ ԲԵՒԵՌՆԵՐՈՒ ՍԱՌՑԱԿՈՅՏԵՐԷՆ ՊԻՏԻ ԳԱՅ …

0 0
Read Time:1 Minute, 52 Second

 

            Յունիսի կիրակի: Արմենակ եւ Էլպիս եկեղեցի չգացին եւ մեր տունը եկան, երեք ամսուան տնարգելութեան աւարտը տօնելու: Թզենիին սաղարթներու ներքեւ սեղան դրինք: Էլպիս եւ Մակարուհի խոհանոցով զբաղեցան եւ Կեդրոնականցին ապագայատես միտքեր պարզեց:

            – Մակա՛րս, բնապահպանութեան տեսանկիւնէ պէտք է դիտենք մեր հայրենիքի եւ ազգի խնդիրները: Ըստ գիտական նոր ուսումնասիրութիւններու, ովկիանոսներու ջուրը քառասուն տոկոս աւելի արագ կը տաքնայ, քան ինչ որ հինգ տարի առաջ ըսած է Մ.Ա.Կ.-ը: Մեր արտադրած ջերմութիւնը մթնոլորտին մէջ կը մնայ եւ անոր 90 տոկոսը ովկիանոսը կը ծծէ:

            – Լաւ է,- ըսի,- մարդիկ քիչ մը աւելի կը զբօսնուն ծովափին, ջուրը տաք կ’ըլլայ:

            – Ովկիանոսը կ’արգիլէ մոլորակի փուռի վերածումը: Բայց կը հալին նաեւ բեւեռներու սառցակոյտերը, որ աղէտ է:

            – Արմենա՛կ, յոռետես մի՛ ըլլար:

            – Այս ընթացքով հալած սառցակոյտերով եւ ովկիանոսի տաքցած ջուրի ծաւալի ընդլայնումով, ծովեզերեայ ընդարձակ շրջաններ ջրամոյն պիտի ըլլան: Նիւ Եորքի, Մարսիլիայի, Պէյրութի եւ այլ ծովեզերեայ քաղաքներու հայերն ալ ապաստան պիտի փնտռեն: Հայաստան վտանգուած չէ: Մեր քաղաքները եւ գիւղերը ծովու մակերեսէն շատ բարձր են: Հայերը հայրենիք կու գան: Աղէտ-հրաշքով տեղի կ’ունենայ հայրենադարձութիւն:

            – Կը կարծե՞ս, որ կու գան:

            – Մակա՛րս, երկիրներու տարածքը պիտի նեղնայ, եւ մարդիկ ելք պիտի փնտռեն: Հայը գործնապաշտ է: Անբաղձալիէն խուսափելու համար, շատեր այժմէն իսկ կրնան նախատեսութիւններ ընել իրենց եւ իրենց զաւակներուն, թոռներուն եւ ծոռներուն համար:

            – Ըսել կ’ուզես, որ Հայաստան Նոյեան Տապանի պէս ջուրերէն վեր պիտի մնայ եւ մեր փրկութեան լաստը պիտի ըլլայ:

            – Ճիշդ այդպէս, Մակա՛րս:

            – Ուրեմն ի՞նչ պէտք է ընեն ազգի մեծերը:

            – Ծրագրեն գալիքը: Ովկիանոսի ջուրին ջերմացումը եւ մակերեսին բարձրացումը Հայաստանի եւ հայութեան փրկութեան եւ միացման ոսկի առիթը կ’ըլլայ: Քանի դեռ բոլորովին համաշխարհային ազգ չենք, աղօթենք, որ ովկիանոսին ջուրերը շատ տաքնան եւ շուտ բարձրանան: Ինչ որ մենք չենք յաջողած ընել, միացնել ազգը եւ Հայաստանը բնակեցնել, հալած սառցակոյտերը եւ տաքցող ովկիանոսը պիտի ընեն:

            – Ուրեմն:

            Պահ մը լռելէ ետք, քաղաքական գիտուն վերլուծաբան Կեդրոնականցին եզրակացուց.

            – Պարզ: Փոխանակ քաղաքականութիւն խաղալու, օդերեւութաբանական եւ բնապահպանական լուրերուն հետեւինք: Չարենցի պատգամը պէտք է վերստին գրել եւ ըսել. «Ո՜վ հայ ժողովուրդ, քո ապագայի փրկութիւնդ պիտի գայ բեւեռներու հալող սառցակոյտերէն, ովկիանոսներու տաքցած ջուրերէն եւ ջրամոյն ցամաքներէն»:

            Երբ առանձին մնացի, մտածեցի, որ այնքա՜ն խոստումներ լսած ենք եւ անոնց հաւատացած: Ինչո՞ւ չլսենք Կեդրոնականցին: Գոնէ ան հարազատ է, օտար չէ, շահախնդրուած չէ: Եւ անոր նոր Պատգամով առաջորդուինք ու առաջնորդենք:

            Միայն թէ շուտ հալին սառցակոյտերը

 

Մակար ի Գաղիա, 15 յունիս 2020

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Գագիկ Ծառուկեանը Զրկուեցաւ Անձեռնմխելիութենէ
Next post Ճեմարանի 90-ամեակ.- ԲԱՐՁՐ ՏԵՂԸ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles