ՓԱՇԻՆԵԱՆ – ԾԱՌՈՒԿԵԱՆ ՊԱՅՔԱՐԸ՝ ՔԱՂԱՔԱԿԱՆ ՏԱԳՆԱՊԻ ՄԸ ՅՈՐՁԱՆՈՒՏԻՆ ՄԷՋ

0 0
Read Time:2 Minute, 40 Second

Ա.Ա.

Հայաստանի մէջ քաղաքական լարուածութիւնը ակնյայտ է՝ իշխանութիւններուն եւ Ազգային Ժողովին մէջ ընդդիմադիր մեծագոյն կուսակցութեան՝ Բարգաւաճ Հայաստանի միջեւ։ Այս ծիրին մէջ է, որ քաղաքական գնահատականներ կը տրուին նախորդ օրերուն համացանցին վրայ յայտնուած՝ Բարգաւաճ Հայաստանի ղեկավար Գագիկ Ծառուկեանի առնչուած նիւթերուն հրապարակումներուն։
Ըստ Բարգաւաճ Հայաստան խմբակցութեան պատգամաւոր Արման Աբովեանի, իշխանութիւնները քարոզչական արշաւ մը սկսած են Բարգաւաճ Հայաստան կուսակցութեան ղեկավար Գագիկ Ծառուկեանի դէմ՝ քառասուն տարուան վաղեմութիւն ունեցող պատմութիւններուն նոր երանգներ տալով։
Երկու օր առաջ համացանցին վրայ յայտնուեցան Գագիկ Ծառուկեանի մասնակցութեամբ 1979-ին պատահած խմբային բռնաբարութեան եւ աւազակութեան գործով դատական վճիռին լուսանկարները։Ապա որոշ կայքէջեր հրապարակեցին ամբողջ դատավճիռը, ուր մանրամասն կը հաղորդուի կատարուած բռնաբարութեան եւ գողlութեան պատմութիւնը եւ վճիռը, թէ 23 տարեկան Գագիկ Ծառուկեան միւս երեք ամբաստանեալներուն հետ եօթը տարի բանտարկութեան դատապարտուած է, գողութեան եւ խմբային բռնաբարութեան եւ գողութեան յանցանքներով։ Ան իր բանտարկութեան պատիժը կատարած է ուղղիչ համայնքի մը մէջ։
Աբովեան նշեց, որ անձնական եւ քաղաքական հարթութիւնները իրարու խառնելով՝ իշխանութիւնները փաստեցին, որ չեն տիրապետեր ո՛չ անձնական եւ ո՛չ ալ քաղաքական յարաբերութիւններուն կանոններուն։ «Այսօր իշխանութիւնները լծուած են Բարգաւաճ Հայաստանի դէմ պայքարին՝ անտեսելով Հայաստանի դիմագրաւած բոլոր խնդիրները։Իշխանութիւնները հատած են բարոյականութեան բոլոր սահմանները», ըսաւ ան։
Գագիկ Ծառուկեանի բանբեր Իվետա Տոնոյեան, իր կարգին, նշեց ,որ նշեալ գործով վճռաբեկ ատեանը արդարացուցած էր Գագիկ Ծառուկեանը։Ան նաեւ դիմատետրի իր էջին վրայ հրապարակեց վճռաբեկ ատեանին որոշման լուսանկարը,հարց տալով, որ ինչու այս մասին ոչ մէկ խօսք կայ։Ի դէպ Հայաստանի անկախացումէն ետք կատարուած արդարացման վճիռը արձակած է Նիկոլ Փաշինեանի գաղափարակից Սասուն Խաչատրեանի հայրը՝ Հայաստանի Հանրապետութեան վճռաբեկ ատեանի քրէական գործերով պալատի այդ օրերու նախագահ Մհեր Խաչատրեան։
Համացանցին վրայ Ծառուկեանի քառասուն տարուան վաղեմութիւն ունեցող դատական գործին ամբողջ թղթածրարին յայտնուելէն օրեր առաջ, Ծառուկեան Բարգաւաճ Հայաստան կուսակցութեան քաղաքական խորհուրդին նիստին ընթացքին յայտարարած էր, որ կառավարութեան հարիւր առ հարիւրը պէտք է փոխուի։Այս յայտարարութեամբ, ըստ էութեան Բարգաւաճ Հայաստան կը պահանջէր Նիկոլ Փաշինեանի հրաժարականը։ Աբովեան վերահաստատեց Ծառուկեանի յայտարարութիւնը։«Փաշինեանի կառավարութիւնը չէ յաջողած դիմակալել բոլոր իրավիճակները եւ խնդիրները՝ հետեւաբար կառավարութիւնը պէտք է հրաժարի», շեշտեց ան։
Մինչ այդ հաղորդուեցաւ, որ Ծառուկեան արդէն իսկ սկսած է քաղաքական ուժերու հետ իր հանդիպումներուն։ Սակայն ոչ մէկ տեղեկութիւն կայ, թէ ո՞ր կուսակցութիւններուն ղեկավարութիւններուն հետ կը կատարուին տեսակցութիւնները։
Ամենայնդէպս պէտք է նշել, որ Փաշինեան- Ծառուկեան խուլ պայքարը եւ տարակարծութիւնները տարբեր առիթներով շեշտադրուեցան, թէ՛ Ազգային Ժողովին մէջ եւ թէ՛ Ծառուկեանի ղեկավարած ձեռնարկութիւններուն աշխատանքներուն դիմաց խոչընդոտներ ստեղծելու միջոցով, որոնց հակադարձութիւնը յաճախ եղաւ Բարգաւաճ Հայաստան խմբակցութեան անդամներուն կողմէ բուռն քննադատութիւններով՝ ուղղուած իշխանական մեծամասնութեան։
Տրամաբանօրէն Գագիկ Ծառուկեանի 23 տարեկան եղած ժամանակ դատական գործին ամբողջ թղթածրարին հրապարակումը՝ Ծառուկեանի կողմէ կառավարութեան հասցէին ուղղուած սուր քննադատութենէն ետք, այնքան ալ անմեղ արարք մը չէ եւ բաւական յստակ է, թէ որոնք կրնան գտնուիլ այս հրապարակումներուն ետին։Ամենայնդէպս, այս մեթոտը նորութիւն մը չէ՝ իշխող մեծամասնութեան համար, որովհետեւ նախապէս ալ այլոց պարագային նոյն ձեւին դիմուած է, անցեալի հարցերու հրատարակմամբ «սեւացնելու» քաղաքականութեան մը ծիրին մէջ։
Հարցը այս մօտեցման մէջ չէ։
Խնդիրը այն է, որ երբ Հայաստան ենթակայ է համաճարակային սուր տագնապի մը, խախուտ համակարգերով, կործանման եզրին յայտնուած ելեւմտական եւ տնտեսական տագնապներով, առողջապահական համակարգի ամբողջական փլուզման վտանգով, եւ այլ տեսակի ընկերատնտեսական խնդիրներով եւ հարցերով, նման մօտեցում՝ իշխանութիւններուն կողմէ, իրականութիւնները չտեսնելու ձեւացման, ինքնին ամբողջ տագնապի մը էութիւնը ջուրին երեսը կը հանէ եւ կը մղէ հարց տալու, թէ ի վերջոյ Հայաստանեան քաղաքական կեանքը՝ իր ելեւմտական, տնտեսական, ապահովական, ընկերային, առողջապահական եւ այլ մարզերով, դէպի ուր կ՛ընթանայ։
Իսկ պատասխանները արդէն իսկ բաւական մտահոգիչ իրականութիւններու անդրադարձման ենթահողեր կը ստեղծեն։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Ճեմարանի 90-ամեակ.- ԼՈՒՍԻՆ ՄԱԼԻՔԵԱՆ … ԱՆԶՈՒԳԱԿԱՆ ՏԻՊԱՐԸ
Next post ՄԱՀԱԶԴ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles