Նոր Պաշտօն Եւ Պարտականութիւն

ՀԱՅՐԵՆԻՔ

Խմբագրական

Մայիսեան փառատօնը շարունակուեցաւ Արցախի աննման մայրաքաղաք Շուշիի մէջ, նորընտիր նախագահ Արայիկ Յարութիւնեանի պաշտօնի ստանձնման եւ երդման արարողութեամբ։

Երկու շաբաթ առաջ, այս գեղեցիկ եւ պատմակերտ բերդաքաղաքին ազատագրումը նշուած էր։ Մայիս 21-ին, տեղւոյն մշակոյթի եւ երիտասարդութեան կեդրոնի դահլիճին մէջ տեղի ունեցաւ այս արարողութիւնն ու Ազգային Ժողովի յատուկ նիստը։ Միակ պալատով Ազգային Ժողով մը, որ կազմուեցաւ համամասնական ընտրակարգի հիման վրայ:

Պաշտօնի ստանձնման յայտագիրը, բնականաբար, արտասովոր չէր։ Արարողութիւնը կատարուեցաւ ըստ դիւանակարգի (փրոթոքոլ) եւ այդպէս ալ պիտի շարունակուին աշխատանքները, որոնց կարեւորագոյն, չըսելու համար՝ առիւծի բաժինը, հիմնահարցի գծով կատարուելիք գործունէութիւնն է, թէ՛ ռազմական եւ թէ՛ քաղաքական (յատկապէս արտաքին յարաբերական) բնագաւառներէն ներս։

Նորընտիր նախագահն ու Արթիւր Յարութիւնեանի նորակազմ Ազգային Ժողովը անյապաղ գործ ունին կատարելիք, յատկապէս այն պատճառով, որ 1998-ին Հայաստան դարձաւ բանակցութիւններուն Արցախի հանրապետութեան շահերը ներկայացնող միակ կողմը, երբ Ատրպէյճան մերժեց բանակցութիւններու ծիրին մէջ ուղղակի երկխօսութիւն հաստատել։

Այս գոյավիճակով, Արցախի հանրապետութիւնը պետութեան մը բոլոր իրաւական առանձնայատկութիւնները ունի, բայց քաղաքական բեմահարթակէն ներս կը տուժէ` միջազգային ճանաչման բացակայութեան պատճառով:  Արցախցիին եւ յատկապէս ղեկավարութեան համար յստակօրէն կը նշուի հայկական կողմի հիմնական տեսլականը, մանաւանդ որ անգամ մը եւս պէտք է նշել, որ Հայաստանն է Արցախի անվտանգութեան եւ անկախութեան երաշխաւորը։

Ստեղծուած այս կացութեան իբրեւ հետեւանք, նոր նախագահին եւ իր ղեկավարութեան տակ գտնուող քաղաքական կառոյցին համար առաջնահերթութիւն մըն է Հայաստանի եւ Արցախի միջեւ ռազմաքաղաքական համագործակցութեան պայմանագրի կնքումը, սակայն միշտ ալ ահազանգելով եւ չմոռնալով Արցախի մասնակցութիւնը որպէս լիիրաւ մասնակցող կողմ։

Սպասելով միջազգային քաղաքական ճանաչման, Արցախի հանրապետութիւնը մեծ ակնկալիքներ ունի արդէն իսկ ստեղծուած արտաքին յարաբերութիւններէն, որոնք իրենց ապակեդրոնացած համագործակցութեամբ, կը դիւրացնեն ապագայի ստեղծուլիք արտաքին յարաբերական կառոյցը:

Անհրաժեշտ է նաեւ, համահայկական մակարդակով,  մշակել եւ ընդունիլ արեան գնով պահած ու պաշտպանած իր սուրբ հողին կարգաւորման միասնական հայեցակարգը։

Դեռ աւելին, վերարժեւորելով ժողովրդավարական սկզբունքներու արմատաւորումը եւ հանրային վստահութեան ձեւաւորման ուղղութեամբ տարուող աշխատանքները, նորընտիր նախագահն ու Ազգային Ժողովը պարտաւոր են անաչառ գտնուիլ՝ վերամշակելու, մօտէն ուսումնասիրելու եւ ձեւաւորելու գործադիր եւ օրէնսդիր իշխանութիւնները։

Քաղաքական պրիսմակէն դուրս գալով, հարկ է, որ Արցախի հանրապետութիւնը յատուկ կարեւորութիւն ընծայէ իր գիւղատնտեսութեան, հանքերու  շահագործման, վերանորոգուող ուժանիւթի զարգացման, մշակութային զբօսաշրջութեան եւ բնապահպանական մարզերուն: Եւ այս գծով, կառավարութիւնը պէտք է քաջալերէ տնտեսական անձնական նախաձեռնութիւնները` դիւրացնելով փոքր վարկեր տրամադրելու գործընթացը:

Հուսկ, տեղին է կրկնութեան գնով ըսել, թէ երկրի անվտանգութիւնը, անհրաժեշտ բարեփոխումները, ընկերային արդարութիւնը, տնտեսական զարգացումն ու օրէնքի գերակայութեան ապահովումը առաջնահերթ եւ անծայրածիր աշխատանքներ են:

Be the first to comment

Leave a Reply

Your email address will not be published.


*