«ՄԵԶ ԲԱՆ ՉԻ ԿՊԻ ….»

Լուսանկար՝ Ֆոթօլուր

Ա. Ա.

Եթէ վարակաբաններուն եւ առողջապահութեան մարզի պատասխանատուներուն մտավախութիւնները իրականութիւն դառնան, ութ յունիսին Հայաստանի մէջ պսակաձեւ ժահրով վարակուած անձերուն թիւը պիտի հասնի տասներկու հազարի, ինչ որ ահաւոր կացութիւն մը պիտի ստեղծէ՝ Հայաստանի հիւանդանոցային ցանցին համար, որովհետեւ պարզապէս կարողութիւնը չունի բժշկական հոգատարութիւն ցուցաբերելու միաժամանակ մեծ թիւով ծանր եւ ծայրայեղ ծանր պարագաներու։ Այսինքն՝ շատ հաւանաբար կրկնուի Իտալիոյ եւ Սպանիոյ սենարիոները, երբ եւրոպական բժշկական եւ հիւանդանոցային համակարգերու տէր երկու երկիրներուն մէջ ալ վարակուած ծայրայեղ ծանր պարագաները պարզապէս մնացին իրենց մահճակալներուն մէջ՝ մահը դիմակալելով։
Հայաստանի պարետատան կողմէ սահմանուած կանոններուն գործադրութեամբ՝ երկուշաբթի, տասնութ մայիսին Հայաստանի տարածքին վերաբացուեցան տնտեսութիւնները,առեւտուրի մեծ կեդրոնները, ճաշարանները, գինետուները, սրահներն ու լողաւազանները։ աշխատանքի վերադարձաւ այնքան կենսական հանրային փոխադրամիջոցները եւ Երեւանի քաղաքապետարանը նոյնիսկ վերաբացաւ մարաքաղաքին մէջ գործող մանկապարտէզները, որովհետեւ աւելի քան 11 հազար աշխատող ծնողներ մանկապարտէզներու վերաբացումը պահանջած էին։
Այս բոլորը առաջին ակնարկով կրնան ձգել այն տպաւորութիւնը, թէ Հայաստանի մէջ համաճարակային իրավիճակը հակակշիռի տակ է, եւ վերացուած են սահմանափակումները։
Սակայն վարակումներու օրական կշռոյթը բնաւ լաւատեսութիւն չի ներշնչեր, թէ թիւի, թէ վերաբերումի եւ թէ ալ պսակաձեւ ժահրին նկատմամբ հայաստանեան հասարակութեան մօտ ստեղծուած տարօրինակ տեսութիւններու իմաստով։ Թերեւս աշխարհի վրայ Հայաստանը այն փոքրաթիւ երկիրներէն է, ուր մարդիկ իսկապէս համոզուած են, որ պսակաձեւ ժահր չկայ, եւ թէ կատարուածը դաւադրութիւն մըն է, որ իրականութեան հետ ոչ մէկ առնչութիւն ունի։Նորագոյն տուեալներուն համաձայն, Հայաստանի մէջ վարակուածներուն թիւը 5271 է, իսկ ամէնէն նշանակալիցը այն է, որ առողջապահութեան նախարարութիւնը սկսած է չյայտարարել, թէ քանի պարագայի վիճակը ծայրայեղ ծանր է, կամ քանի վարակուած շնչառական սարքի միջոցով կը շնչէ։
«Մենք աղբերներ ենք, հետեւաբար զիրար չենք վարակեր», «Մենք Գաւառից ենք, քորոնան մեզ չի կպի», «Սուտ է։Նման վիրիւս չկայ», «Չեմ հաւատում», «Մեր շրջապատին մէջ վարակուածներ չկան։Ամէն ինչ սուտ է»։Նման տեսակէտներ եւ գաղափարներ այսօր Հայաստանի մէջ այնքան տարածուած են, որ առողջապահութեան նախարար Արսէն Թորոսեանը մղեցին յայտարարելու, որ ստիպուած պիտի ըլլան ընկերային հաղորդակցութեան միջոցներու վրայ նմանօրինակ տեսակէտներ գրառողներուն անձնական տուեալները իրաւապահ մարմիններուն փոխանցելու, որպէսզի հետաքննութիւն բացուի, իմանալու համար, թէ ով կը կանգնի այս քարոզչական վտանգաւոր արշաւին ետին։
Անշուշտ ոչ բոլորը նման դաւադրական եւ անհիմն գաղափարներու կը հաւատայ։ Մանաւանդ անոնք, որոնք իրազէկ են հիւանդանոցներու խիստ հոգատարութեան բաժանմունքներու մէջ իրենց կեանքին համար պայքարող վարակուած անձերու մղած մահու եւ կենաց պայքարէն։Իրազէկ են նաեւ ամբողջ աշխարհը տակնուվրայ ըրած համաճարակին վտանգին տարողութենէն եւ առ այդ պատասխանատուութեան ամբողջական գիտակցութեամբ կը ջանան գործադրել պարետատան սահմանած կանոնները, վարակումներու ահաւոր շղթան կոտրելու եւ վարակին առաւել տարածումը կասեցնելու համար։
Սակայն մտածելակերպի, ապրելակերպի եւ սովորութիւններու պատճառով Հայաստանի մէջ կայ նաեւ համաճարակին դէմ պայքարին մէջ անհատին դերը անտեսող վտանգաւոր իրավիճակ մը, երբ մարդիկ տակաւին բազմամարդ յուղարկաւորութիւններու ներկայ կ՛ըլլան, իրարու հետ կ՛ողջագուրուին, իրարու ձեռք կը սեղմեն, սրահներու մէջ կողք կողքի նստելով կը խօսակցին։ Վերաբերումներ, որոնք վարակումներու պատճառ կ՛ըլլան։ Այս իմաստով ալ բաւական մտահոգիչ էր Տաւուշի մարզի գործարաններէն մէկուն եօթը աշխատաւորներուն վարակումը, որուն մասին երէկ յայտարարուեցաւ։Այն պահուն, երբ պարետատան կանոնները պէտք է հարիւր առ հարիւր գործադրուած ըլլային գործարաններուն եւ բոլոր փակ վայրերուն մէջ։
Միշտ չէ, որ պատերազմները վտանգ են պետութեան մը։Վտանգ է նաեւ սխալ մտայնութիւնը, հաւաքական յամառութիւնը, սնապաշտութիւնն ու դաւադրական եւ տարօրինակ տեսութիւններու հաւատալով՝ համաճարակի մը գոյութիւնը չընդունելու անմտութիւնը։

 

1 Comment

  1. «Կորոնավիրիւսը ո՞ւմ շունն ա», – Նիկոլ Փաշինեան:
    Վարչապետը եւ իր անձնակազմը եթէ այս մօտեցումը ունին, ի՞նչ սպասել խեղճ ժողովուրդէն:

Leave a Reply

Your email address will not be published.


*