Արեւելեան Միացեալ Նահանգներու Հայ Օգնութեան Միութիւնը 25 Հազար տոլար կը նուիրէ Լիբանանահայութեան

Արեւելեան Միացեալ Նահանգներու Հայ Օգնութեան Միութիւնը յատուկ հաղորդագրութեամբ մը կը տեղեկացնէ, թէ  25 հազար տոլար կը նուիրէ Հ.Օ.Մ.-ի կեդրոնական վարչութեան՝ ի պատասխան Լիբանանի տնտեսական տագնապին ու քաղաքական անկայուն իրավիճակին, որ ահաւոր կերպով կ՛ազդէ Լիբանանահայութեան վրայ։
Տարուան սկիզբը, շարունակուող քաղաքական եւ տնտեսական տագնապը շարունակեց ազդել Լիբանանի հայ համայնքին վրայ, Հ.Օ.Մ.-ը կոչ ուղղեց սփիւռքահայութեան օգնել իրենց հայրենակիցներուն, որոնք դժուարութեամբ կ՚ապահովէին իրենց ապրուստը: Լիբանանի Հայ Օգնութեան Միութիւնը  նախաձեռնեց 3 ծրագիրներ՝ պնակ մը կերակուր, գոյատեւման պիտոյքներ եւ յոյսի արկղ: Այս Ծրագիրներու ճամբով կարելի պիտի ըլլար ապահովել սնունդ, մթերային ապրանքներ, դեղորայք եւ այլ հիմնական կարիքներ:
Կոչին յաջորդող ամիսներուն պսակաձեւ ժահրը շատ աւելի վատթարացուց Լիբանանի տնտեսական վիճակը։ Հ.Օ.Մ.-ի արեւելեան շրջանի մասնաճիւղերը ստիպուած էին յետաձգել իրենց դրամահաւաքի ձեռնարկները, հետեւելով այս ժահրի ստեղծած իրավիճակին: Սակայն, անոնք կրցան նուիրատութիւններ հաւաքել գաղութի անդամներէն Լիբանանի հայրենակիցներուն օգնելու համար:

«Լիբանանը մեր սփիւռքի սիւնն է եւ մենք հպարտ ենք, որ մեր մասնաճիւղերն ու նուիրատուները անգամ մը եւս ընդառաջեցին մեր կոչին: Մեր մասնաճիւղերու եւ գաղութներու անդամներուն առատաձեռնութիւնը յաւելեալ ուժ կու տայ, որպէսզի շարունակեն Հ.Օ.Մ.-ի մարդասիրական առաքելութիւնը», ըսաւ Հ.Օ.Մ.-ի արեւելեան շրջանի Վարչութեան ատենապետուհի՝ Անի Աթթար։
Հ.Օ.Մ.-ի Արեւելեան Ամերիկայի շրջանը պիտի շարունակէ հաւաքել նուիրատութիւններ Լիբանանի հայ համայնքին օգնելու համար։ Կը խնդրուի նուիրատուներէն, որ շարունակեն աջակցիլ այս մարդասիրական աշխատանքին` առցանց նուիրատութիւն կատարելով:

Be the first to comment

Leave a Reply

Your email address will not be published.


*