ԿԵԴՐՈՆԱԿԱՆՑԻՆ ՉԻ ԾԱԼԵՐ ԱՐԺԷՔՆԵՐԸ ԵՒ ԱՆՈՆՑ ՎՐԱՅ ՉԻ ՆՍՏԻՐ

0 0
Read Time:1 Minute, 13 Second

 

            Արմենակ բանտարկուած է տան չորս պատերու ետին: Առաջ մարդ կը տեսնէր, կը լսէր եւ կ’ընդվզէր: Հիմա հեռատեսիլ եւ համացանց փոխարինած են իր շրջապատը, անոնց մէջ կը գտնէ ընդվզումի պատճառները:

            Այսօր հեռաձայնեց, կռահեցի, որ հայաստանեան լուրեր ունէր: Ե՞րբ չկան անոնք: Նոյնիսկ՝ Ազգային Ժողովին մէջ ըմբշամարտի տեսարաններ: Ըմբիշ ախոյեաններ ունինք:

            – Մակա՛ր, քեզմէ խնդրած էի, որ ինծի համար գտնես նորահայերէնի բառարան մը, որպէսզի լսածս եւ կարդացածս կիսատ-պռատ չհասկնամ, տգէտ չմնամ:

            – Այդպէս բառարան դեռ չկայ, եթէ կ’ուզես անպայման ամէն բան հասկնալ, ռուսերէն պէտք է սորվիս:

            – Բայց ես կ’ուզեմ հասկնալ Հայաստանի Ազգային Ժողովի պատգամաւորի խօսքը: Ան պատասխանատու է տնտեսութեան, քաղաքականութեան, լեզուին եւ մշակոյթին: Եթէ կը խօսի, կը խօսի որ զինք հասկնան:

            – Ան կը խօսի զինք հասկցողներուն: Դուն ցանկի վրայ չես: Ըսէ՛, կրկին ի՞նչ պատահած է:

            – Պատգամաւորի մը գրութեան մէջ գտայ զայրոյթով ըսուած հետեւեալ բառերը: Իր խօսքը վերաբերելու է Երեւանի քաղաքապետին: Կ’ենթադրեմ, որ ան կը հասկնայ ըսուածը, բայց ես ալ մարդ եմ եւ հայ, ես ալ կ’ուզեմ հասկնալ:

            – Պիտի ըսե՞ս այդ բառերը:

            – Արտագրած եմ, կարդամ. թրենդի, , դրուժիննիկներով, սեքընդ հենդ, իդիոտիզմը… Անգլերէնը հայերէնի սեքը՞նդ հենդ, թէ՞ ֆիրսդ հենդ տեսակն է, եւ իդիոտիզմը ինչպէ՞ս ախտորոշել: Կա՞յ ջերմաչափ մը՝ որ հեռուէն ճշդէ իդիոտիզմը

            – Արմենա՛կ, այս ցաւերովդ Հայաստան չերթաս, քեզ բանտ կը դնեն, որպէս հին պատմութեան զոմբի:

            – Այսպէս վարուելով, կատակ համարելով լեզուական հարա-քիրին, մեղսակից եղանք լեզուի այլասերման: Ըսենք՝ ազգի այլասերման: Ցտեսութիւն:

            Կը յուսամ, որ Արմենակ չվշտացաւ եւ զիս չի զրկեր իր բարեկամութենէն:

 

Մակար ի Գաղիա, 9 մայիս 2020

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Հ.Յ.Դ. Երիտասարդականի Եւ Ուսանողականի Օգնութիւնը՝ Արագածոտնի Մարզի Ընտանիքներուն
Next post ՆՇՄԱՐ.- ԾԱՓԵՆՔ… ՁԵՌՆՈՑՈՎ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles