ՀԱՍԱՆՈՎԵԱՆ ՅԱՆԿԵՐԳՆԵՐԷՆ ՄԻՆՉԵՒ ԼԱՒՐՈՎԵԱՆ ՊՆԴՈՒՄՆԵՐԸ

0 0
Read Time:2 Minute, 8 Second

Ա.Ա.
Արցախեան տագնապին բանակցային հոլովոյթին կապուած՝ ատրպէյճանական վերջին յայտարարութիւնները, թէ քննարկման առարկայ է փուլային լուծման փաթէթը, շատ արագ իրենց ռազմաճակատային արտայայտութիւնները ունեցան, երբ Ատրպէյճանի պաշտպանութեան նախարար Զաքիր Հասանով Մայիս 4-ին, Արցախի եւ Ատրպէյճանի միջեւ ճակատային դիրքերը այցելեց եւ յայտարարեց, որ էապէս բարձրացած է պատերազմին հաւանականութիւնը՝ հայկական կողմին սադրիչ գործողութիւններուն պատճառով։
Պէտք է նշել ,որ երբ Ատրպէյճանի պաշտպանութեան նախարարը կը խօսի «հայկական կողմին սադրիչ գործողութիւններու»-ն մասին, վստահաբար ի մտի ունի օրեր առաջ արցախեան ուժերուն կողմէ ատրպէյճանական տրոնին ջախջախումը, որ միակ օրինակը չէ այն հարուածներուն, որոնք տրուեցան հայկական պաշտպանական դիրքերուն վրայ աչալրջօրէն հսկող հայկական ուժերուն կողմէ։
Սադրիչ գործողութիւններու մասին ճակատային դիրքերու վրայ յայտարարութիւններ կատարելու Հասանովի այս ոճը նորութիւն մը չէ։ Ամէն անգամ որ ատրպէյճանական բանակին ոգեւորութեան կարիքը զգացուի, յանկարծ պաշտպանութեան նախարարը կը յայտնուի առաջնային գիծին վրայ, ռազմաշունչ յայտարարութիւններ կը կատարէ, կը խօսի պատերազմը վերսկսելու եւ այսպէս կոչուած «ատրպէյճանական տարածքները» ազատագրելու մասին, եւ իր առաքելութիւնը կատարած մէկու մը հոգեկան բաւարարութեամբ Պաքու կը վերադառնայ։
Արցախեան տագնապին բանակցային հոլովոյթին մէջ ներկայ իրավիճակին մէջ չկան կտրուկ փոփոխութիւններու առաջնորդող տուեալներ, մինչ կողմերը առաւելաբար կը շեշտեն ու կը խօսին դասական կեցուածքներու մասին։ Մինչ ատրպէյճանական յանկերգը կը վերաբերի Ատրպէյճանի հողային ամբողջականութեան եւ «միջազգայնօրէն» ճանչցուած պետական սահմաններու վերականգնման, հայկական կողմը կը նշէ փոխադարձ զիջումներու հիմամբ լուծման մը կարեւորութիւնը, ուր Արցախի ապահովութեան երաշխաւորութիւնը նկատի պէտք է առնուի, իբրեւ առաջնահերթութիւն, որուն զուգահեռ պէտք է ընդհանուր լուծման կէտերը քննարկուին։ Այսինքն՝ փուլային լուծման փաթէթը հայկական կողմէն մերժելի է։
Գէթ այսպէս է իրավիճակը՝ հայկական տեսանկիւնէն։ Մէկէ աւելի առիթներով՝ վերջին օրերուն Հայաստանի արտաքին գործոց նախարարութիւնը, իր ղեկավարին եւ բանբերին միջոցով ասիկա յստակացուց, որովհետեւ Մոսկուա- Պաքու առանցքին վրայ վերջին շրջանին ակնյայտ է կեցուածքներու որոշակի նոյնութիւն մը, ինչ կը վերաբերի ատրպէյճանամէտ լուծման մը տարբերակի ծանուցման ճիգերու, որոնք Ռուսիոյ արտաքին գործոց նախարար Սերգէյ Լաւրովի հրապարակուեցան՝ հայկական կողմը մղելով, որ հակադարձէ եւ հերքէ, թէ նման փուլային լուծման փաթէթ քննարկման առարկայ է։
Հակառակ անոր որ Լաւրովի այս պնդումները կարելի է տեղաւորել Երեւանի հետ ոչ այնքան բացայայտ լարուածութեան մը դրսեւորումները, Արցախեան տագնապին առնչուած նման կեցուածք, այդ ալ երբ կը հրապարակուի ԵԱՀԿ Մինսքի խումբի համանախագահ, եւ տագնապին մէջ առանցքային դերակատարութիւն ունենալու կոչուած Ռուսիոյ արտաքին գործոց նախարարին կողմէ, որոշ հարցադրումներու եւ մտահոգիչ դիտարկումներու դուռ կը բանայ, թէ իսկապէս Մոսկուայի քուլիսներուն մէջ ինչպիսի բանակցութիւններ, խորհրդակցութիւններ, խօսակցութիւններ թէ սակարկութիւններ կը կատարուին, որ Լաւրով տարիէ մը ի վեր առիթ չի փախցներ յայտարարելու փուլային լուծման փաթէթի մը քննարկման մասին, մինչ Երեւան կ՛աճապարէ հերքելու, իսկ Պաքու կը ձայնակցի Ռուսիոյ դիւանագիտութեան պետին։
Մինչ այդ ուշադրութենէ չի վրիպիր նաեւ Երեւանի իշխանութիւններուն խուսափումը՝ Մոսկուայէն պաշտօնական բացատրութիւն պահանջելէ, թէ երբ իսկապէս բանակցային սեղանին վրայ չկայ փուլային լուծման փաթէթ մը՝ առ ի քննարկում, ապա ինչու Լաւրով առիթ չի փախցներ նման փաթէթի մը մասին խօսելու համար։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՊԱՏԿԵՐՆԵՐ՝ ԵՐԵՒԱՆԵԱՆ ԱՌՕՐԵԱՅԷՆ
Next post Հ.Յ.Դ. Հայաստանի Գերագոյն Մարմինի  Ուղերձը` Շուշիի Ազատագրութեան 28-Ամեակին Առիթով

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles