ՀԱՄԱՃԱՐԱԿԷՆ ԱՆԴԻՆ… 

0 0
Read Time:2 Minute, 20 Second

Ա.Ա.

Վարակաբաններ եւ համաճարակաբաններ հարիւր առ հարիւր համամիտ են, որ այնքան ատեն, որ ազդու պատուաստ մը գոյութիւն չունի, պսակաձեւ ժահրը անդամալուծուած պիտի պահէ համաշխարհային տնտեսութիւնը, բնական կեանքի պայմաններէ զրկելով ամբողջ մարդկութիւնը։ Եւ ամէնէն լաւատեսական մօտեցմամբ՝ ազդու պատուաստ մը կրնայ գտնուիլ տասներկուքէն մինչեւ 18 ամիս ետք։ Այսինքն՝ մինչ այդ արդէն իսկ խարխլող համաշխարհային տնտեսական- ելեւմտական համակարգը առաւել հարուածներու ենթակայ պիտի ըլլայ, որովհետեւ արտադրութեան մարզը եթէ ոչ ամբողջապէս, իր աշխատանքը բնաւ բնական կերպով պիտի չկարենայ կատարել, մանաւանդ որ գալ աշնան եւ ձմրան համաճարակի աւելի ծանր ալիքներ կրնան հարուածել ամբողջ աշխարհը։
Այս իրողութիւնը ի մտի ունենալով, մենք լուսարձակի տակ բերենք մեր իրականութեան մէջ դրական շարք մը երեւոյթներ, որոնք համաճարակին այս ծանր օրերուն յոյս կը ներշնչեն եւ կորով ու տրամադրութիւն կը բարձրացնեն։
Եւ անմիջապէս պէտք է հաստատել, որ համահայկական մեր կազմակերպութիւնները՝ Հ.Յ.Դ.-էն, մինչեւ Հ.Մ.Ը.Մ. եւ անշուշտ Հ.Օ.Մ. , ճիգերու առաւելագոյն լարումով կը գործեն այն գաղութներուն մէջ, ուր չկայ պետական օժանդակութեան համակարգ, չեն գործեր պետական մակարդակի վրայ քաղաքացիներու հասնելու գործակալութիւններ եւ սպասարկութիւններ․․․եւ ուր մարդիկ, այս պարագային մեծաթիւ հայորդիներ պարզապէս ձգուած են իրենց բախտին, աշխատանքէ զրկուելէ ետք՝ չափազանց նեղ կացութեան մատնուելով։
Համագաղութային մակարդակի վրայ նման օժանդակութիւններու համակարգման եւ աշխատանքներու դասաւորման, նպաստներու համար մեծահոգի ազգայիններու հետ կապի, ապա գործնական աշխատանքի կազմակերպման համադրումը այս օրերուն իսկապէս մեծ յոյս կը ներշնչէ, թէ գաղութներու մէջ, որքան ալ մեծ ըլլան մարտահրաւէրները, տագնապին շատ արագ հակազդելու եւ զայն կարելիութիւններու ամբողջական լարմամբ դիմակալելու կամքն ու հետեւողականութիւնը մեր առաջնորդող կազմակերպութիւններուն համար բնազդային է։
Տեղ մը աւելի քան 750 ընտանիքի օրուան ճաշ, ուրիշ տեղ մը՝ առիթներու լաւապէս օգտագործմամբ, որեւէ բնոյթի օժանդակութիւն, այլ տեղ մը՝ բժշկական խնամքի եւ դեղօրայքի ձրի հայթայթում։ Տակաւին՝ տարբեր տեսակի ծառայութիւններու մատուցում, օրական դրութեամբ, հասնելով եւ օգնութեան ձեռք երկարելով անոր, որ կարիքը ունի խնամքի, հոգատարութեան, խորհրդատուութեան, քաջալերանքի եւ նեցուկի։
Նման աշխատանք անշուշտ որ բնաւ հեզասահ չ՛ընթանար։Կան արգելքներ, յաճախ կը ստեղծուին թիւրիմացութիւններ, ոմանք կը գանգատին, ուրիշներ չեն գոհանար։բայց ի վերջոյ, երբ օրինակի համար Հ․Օ․Մ․-ի նման մեծ կազմակերպութիւն մը, իր աշխատանքները համակարգելով համահայկական լայնածիր ցանց եւ կազմակերպական կուռ ներկայութիւն եղող կազմակերպութիւններու հետ, իր աշխատանքներուն կորիզին կը վերածէ նման ծանր օրերու հայորդիներու օգնութեան հասնելու առաքելութիւնը, իսկապէս մեծ յոյսեր կը ներշնչէ, որ ազգային մակարդակի վրայ, ամուր են հիմերը եւ բնաւ պէտք չէ վհատիլ։ Իսկ երբ տուեալ գաղութին մէջ ուժերու ամբողջական լարումով կը գործէ համաճարակին պատճառով ստեղծուած յատուկ Շտապ մը, ապա մարդիկ առաւել կը համոզուին, որ պատերազմի, տնտեսական տագնապի թէ համաճարակի օրերուն, տէր ու տիրական ունին։
Համաճարակները ոչ կատակ են, ոչ ալ հոլիվուտեան ժապաւէն մը։ Իրական, տագնապեցնող, վհատեցնելու չափ ճնշող ահաւոր հարուածներ են, զորս դիմագրաւելու համար պետութիւններ իրենց բոլոր միջոցները եւ կարելիութիւնները կը ներդրեն եւ զօրաշարժի կ՛ենթարկեն։
Աշխարհասփիւռ հայութիւնը, մանաւանդ այն գաղութները, որոնք պետական ոչ այնքան կազմակերպուած համակարգերու մէջ կ՛ապրին, ունին համահայկական կազմակերպութիւնները եւ անոնց շարքերուն մէջ գործող հազարաւոր կամաւոր զինուորագրեալները։ Ասիկա ալ հարստութիւն մըն է, մանաւանդ երբ հեռաւոր ափերէ օգնութեան ձեռքեր կ՛երկարին։
Վարձքը կատար բոլորին։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ՏԷ՞Ր ԵՆՔ ՄԵՐ ԻՆՔՆՈՒԹԵԱՆ ԿՌՈՒԱՆ ՍԱՀՄԱՆԴՐՈՒԹԵԱՄԲ ՃԱՆՉՑՈՒԱԾ ՊԵՏԱԿԱՆ ԼԵԶՈՒԻՆ՝ ՀԱՅԵՐԷՆԻՆ
Next post ՄԵՐ ՕՐԵՐՈՒ ԺՈՂՈՎՐԴԱՎԱՐՈՒԹԻՒՆԸ 1 .-  ԻՐԱԿԱՆՈՒԹԻՒՆ ԵՒ ԽԵՂԱԹԻՒՐՈՒՄ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles