Եղբայր Սթիւ Իսկէնտէրեանի Հրաժեշտը

Եղբայր Սթիւ Իսկէնտէրեանը մեզմէ հեռացաւ Մարտ 29-ին, Ֆլորիտայի մէջ:
Ան իր գործունէութեամբ եղած էր օրինակելի Հ.Մ.Ը.Մ.-ական եւ այդպէս ալ պիտի յիշուի մեր բոլորին կողմէ։
Ստեփան Սթիւ Իսկէնտէրեանը ծնած է Յունուարի 26, 1971-ին, Պէյրութ (Լիբանան): Յովհաննէս եւ Սեդա Իսկէնտէրեաններու որդին եւ եղբայրը՝ Շանթ Իսկէնտէրեանին: Սթիւն ու իր հարազատները տեղափոխուեցան Թորոնթօ (Գանատա) 1985-ին, երբ ան հազիւ 14 տարեկան էր: Հոն շուտով միացաւ Հ.Մ.Ը.Մ-ին, իսկ աւելի ուշ միացաւ Հ․Յ․Դ․-ի շարքերուն: 18 տարեկանին, ան կազմեց իր առաջին նուագախումբը՝ «Սասուն», որ ելոյթներ ունեցաւ Թորոնթոյի Հայ Կեդրոնի, Հայ Կաթողիկէ եկեղեցիի, Քեմպրիճի եւ Համիլթըն կեդրոններուն մէջ: 1997-ին, Հարաւային Ֆլորիտայի Հ.Մ.Ը.Մ.-ի պարահանդէսին ան հանդիպեցսւ իր ապագայ կողակիցին՝ Շաքէ Խաչիկեանին: Անոնք յետագային բախտաւորուեցան երկու սիրուն դուստրերով՝ Թաթիանա եւ Նայիրի: Աւելի ուշ, ան կազմեց իր երկրորդ նուագախումբը՝ «Արարատ», Շահան Գրիգորեանի (Տիթրոյթ) հետ: Պոսթընի Հ.Մ.Ը.Մ.ի մասնաճիւղի ձեռնարկի ելոյթը հանդիսացաւ իր երաժշտական ասպարէզի նոր սլացքը: Յաջորդող տարիներուն, ան ելոյթ ունեցաւ Պրազիլի, Ֆրանսայի մէջ, նաեւ Հ.Մ.Ը.Մ.ի Նաւասարդեան խաղերուն եւ Հայկական Մշակութային Կեդրոնի եւ Հ.Օ.Մ.-ի համաշխարհային նաւապտոյտներուն:
Հոգեկան մեծ բաւարարութիւն կը ստանար, երբ ան կ’երգէր անթիւ հայկական հարսանիքներու ժամանակ՝ տեսնելով, որ երկու հայորդիներ սիրով օճախ կը կազմեն: Երբ զինք բեմահարթակի վրայ տեսնէիք, ինքնաբերաբար պիտի անդրադառնայիք որ ան հարազատօրէն կը պատկանէր բեմին:
Եղբայր Սթիւը կիսեց իր սէրն ու հաւատքը հայ գաղութի հանդէպ`իր կատարած նուիրումով: Եղբայր Սթիւի սէրը իր ընտանիքին եւ հայկական մշակոյթի հանդէպ յաւիտեան դրօշմուած պիտի մնայ:
Հողը թեթեւ գայ, մեր սիրելի Եղբայր Սթիւ:

Be the first to comment

Leave a Reply

Your email address will not be published.


*