ԺԱՀՐԷՆ ԵՏՔ՝ ՄԱՐԴԿԱՅԻՆ ԻՆՉՊԻՍԻ ԸՆԿԵՐՈՒԹԻՒՆ ՄԸ

0 0
Read Time:2 Minute, 16 Second

Ա.Ա.

Պսակաձեւ ժահրին առաջին աշխարհաճարակէն ետք մարդկային ինչպիսի ընկերութիւն մը պիտի վերադառնայ «բնականոն» կեանքի մը առօրեային։Այս հարցումը ներկայիս բաւական մելան կը հոսեցնէ՝ ընկերաբաններու, հոգեբաններու, քաղաքական թէ տնտեսական իրադարձութիւնները խորապէս ուսումնասիրող մասնագէտներու , ու նաեւ՝ կրօնական շրջանակներու կողմէ, վերլուծումներու եւ նախատեսութիւններու ամբողջ համակարգ մը գրեթէ ամէնօրեայ դրութեամբ հասանելի դարձնելով։
Իսկապէս աննախադէպ այս աշխարհաճարակին պատճառած հոգեցնցումները եթէ ի մտի ունենանք, առաջին հարցումներէն մին, որ կը ծագի, կը վերաբերի վերադարձ դէպի բնականոն առօրեայէն ետք ստեղծուելիք իրավիճակներու։մարդկային ընկերութիւնները, կառավարութիւնները, պետութիւնները, տնտեսական միջազգային համակարգը, կրթական, ակադեմական, արուեստի,մարզական աշխարհը եւ նման բազմաթիւ ծիրեր եւ մարզեր, նոյն ձեւո՞վ պիտի վերաբերին եւ վարուին, ինչպէս էր աշխարհաճարակէն առաջ։ Թէ՞ էական փոփոխութիւններու ենթարկուած ընկերութիւն մըն է, որ կեանքի պիտի վերադառնայ՝ առօրեայ իր յարաբերութիւններուն մէջ նոր արժեչափերով, պատկերացումներով եւ ակնկալութիւններով։
Արձանագրենք։
Առաջին։Պատերազմները, տնտեսական տագնապները, նոյնիսկ բնական աղէտները այս տարողութեամբ թերեւս չեն ցնցած աշխարհը, ինչ որ ներկայիս Պսակաձեւ Ժահրը կը կատարէ։ Հիմերէն ստացան հարուածները բոլոր մարզերը։Քաղաքական, տնտեսական, ընկերային, առեւտրական, ու մանաւանդ առողջապահական համակարգը, շատ արագ վերածուեցաւ անզօր եւ ապազինուած ճակատի մը, ուր խուճապէն աւելի անզօրութեան զգետնող զգացումներն է, որ տիրական է։Երբ կարողութենէն վեր հիւանդներու հոսք կը կատարուի, անզօրութեան եւ անկարելիութիւններու մատնուիլը բաւական է, որպէսզի բժշկական համակարգը՝ իր բաղկացուցիչ տարրերով, անճրկի եւ ճակատամարտեր կորսնցելու դառն փորձառութիւնը ապրի։
Երկրորդ։Ինքնամեկուսանալէն այլընտրանք չունենալու մարդոց կացութիւնը առաջին շրջանին չնկալուեցաւ իբրեւ բաւական լուրջ հետեւանքներու առաջնորդող իրավիճակ մը։ Սակայն օրերու եւ շաբաթներու հետ, մարդիկ իրապէս սկսան անդրադառնալ, որ ինկած են բաւական տհաճ եւ ծանր կացութեան մը մէջ։ «Մինչեւ երբ այսպէս» հարցումն ալ երբ յստակ ժամկէտով պատասխան մը չունի, մեկուսացման, Ֆիզիքական հեռաւորութիւններ պահելու հարկադրանքէն այլընտրանք չունեցող մարդը անճրկեցաւ եւ անդրադարձաւ իր անզօրութեան։ Դուրս գալ չկայ, պտոյտի երթալ կարելի չէ, բարեկամներու այցելել արգիլուած է, ընկերային հաւաքոյթ, մարզական թէ արուեստի միջոցառում անցեալին կը պատկանին։ Վերջապէս բնականոն կեանք մը ապրելու բոլոր տուեալներէն զուրկ մարդը ոչ միայն անճրկած է, այլ անորոշութեան պատճառած հոգեբանական ցնցումներու ենթակայ ըլլալով՝ կորսնցուցած է ինքնավստահութիւնը։ Իսկ իր սեփական ճակատագիրը տնօրինելու եւ իր անձնական կեանքին առնչուած որոշումներ կայացնելու բնական իրաւունքի յանկարծակի չքացումը հոգեբանական շատ բարդ իրավիճակներ ստեղծած է։
Աշխարհաճարակը կասեցնելու եւ այս ժահրին դէմ պատուաստ մը գտնելու մարաթոն մրցումին ազդանշանը տրուած է եւ ամբողջ աշխարհը շունչը բռնած՝ կը հետեւի լուրերուն, գէթ յոյսի նշոյլ մը, դրական լուր մը իմանալու եւ գօտեպնդուելու համար։
Մինչ այդ հարցումը կը շարունակէ ինքզինք պարտադրել։Իսկապէս, Աշխարհաճարակէն ետք՝ մարդկային ինչպիսի ընկերութեան մը ականատես պիտի ըլլայ աշխարհը։ Յանձնառու եւ գիտակի՞ց, թէ գալիք ժամանակաշրջաններուն պէտք է առաւել ու աւելի նախապատրաստուած ըլլալ։ Իրազեկ եւ ըմբռնա՞ծ, թէ կարելի չէ անասնական աշխարհը բզքտել, չարաչար շահագործել եւ անոր կենսաբազմազանութեան դրոյթները քանդել անխնայօրէն։ Թէ՞ հազիւ որ կեանքը իր բնական հունին վերադառնայ, դարձեալ պիտի իյնայ ինքնամոռացութեան մէջ ու շարունակէ աշխարհաճարակէն առաջ իր վերաբերումը, վարուելակերպն ու անպատասխանատուութեան տարբեր տեսակի դրսեւորումները։
Վստահաբար յետ աշխարհաճարակ աշխարհը այն պիտի չըլլայ, ինչ որ էր նախքան աշխարհաճարակը։ Ասիկա չէ խնդիրը։ Էականը մարդուն վերաբերումն է՝ իր տարբեր երանգներով։

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Հ․Յ․Դ․ Երիտասարդականի Եւ «Նիկոլ Աղբալեան» Ուսանողական Միութեան Կոչը՝ Ապրիլ 23-24-ին Մոմեր Վառելու
Next post ԺԱՆՏԱԽՏԷՆ ՄԻՆՉԵՒ ՔՈՐՈՆԱԺԱՀՐԸ

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles