Աշխարհահռչակ Յօրինող Փենտերեցքիի Հրաժեշտը

Դասական երաժշտութեան մէջ, մեծ հռչակ սփռած էր լեհ Քրիշթոֆ Փենտերեցքին, որուն մեծ մայրը՝ Ստեփանուհին Իսֆահանէն ժամանած հայորդի մըն էր։ Մանուկ հասակին, Փենտերեցքի ամէն կիրակի մեծ հօր հետ կը յաճախէր իր ծննդավայր Քրաքովի հայոց եկեղեցին։

Ծնած 1933-ին, Փենտերեցքի մահացաւ Մարտ 29-ին, յետ երկարատեւ հիւանդութեան։ 2013-ին, Փենտերեցքի այցելած էր Հայաստան եւ անձամբ ներկայ եղած «Փենտերեցքիի օրերը Հայաստանի մէջ» ձեռնարկներու շարքին։ Նշենք, որ գրեթէ մէկ շաբթուայ տեւողութիւն ունեցող այս հանդիսութիւններուն, Երեւանի «ֆիլհարմոնիք»-ը ղեկավարութեամբ նոյնինքն Փենտերեցքիին, նուագած էր ջութակի եւ նուագախումբի համար գրուած «Քոնչերթօ  Տօփիօ» ստեղծագործութիւնը: Ձեռնարկներու շարքի աւարտին, «Մոսկուա» շարժապատկերի սրահին մէջ,  Փենտերեցքիին կեանքին եւ գործունէութեան մասին պատմող «Լաբիւրինթոսի արահետներով» ժապաւէնը ցուցադրուած էր։

Սեպտեմբեր 2015-ին, Մոնրէալի մէջ, Հայոց Ցեղասպանութեան 100-ամեակին առիթով, տեղւոյն «սիմֆոնիք» նուագախումբին հետ հանդէս եկաւ Փենտերեցքի, որ անձնամբ ղեկավարելով երգչախումբը, ունկնդիրներուն ներկայացուց Մեծ Եղեռնի զոհերուն յիշատակին նուիրուած «Սաղմոս Գ.» ստեղծագործութիւնը։

Իսկ Պոսթընի մէջ, 2013-ին նշուած էր իր 80-ամեակը, որուն ընթացքին մաէսթրօ Շարլ Տիւթուայի ղեկավարութեամբ ներկայացուեցաւ երեք թաւջութակներու համար պատրաստուած, իր գործերէն՝ «Քոնչերթօ Կրոսօ թիւ 1»-՝ ը, մասնակցութեամբ հանրածանօթ թաւջութակահարներ՝ Կօթիէ Քափիւսոնի,  Տանիէլ Միւլըր-Շօթի եւ Արթօ Նորասի:

Քրիշթոֆ Փենտերեցքի բազմիցս մեծարուած էր Լեհաստանի, Հայաստանի եւ այլ երկիրներու մէջ։

Be the first to comment

Leave a Reply

Your email address will not be published.


*