ՏՈՄՍ.- ԱՊՐԻԼ ՄԷԿԻ ԿԱՏԱԿ ՉԿԱՐԾԷ՜Ք…

0 0
Read Time:1 Minute, 54 Second

Ս. ՄԱՀՍԷՐԷՃԵԱՆ

1 Ապրիլ 2020

Հէ՜յ, ժողովուրդ, Միացեալ Նահանգներու նախագահն ու իր իմաստուն գործակիցները գտած են պսակաձեւ ժահրին դէմ պայքարի նորագոյն հնարքը. որոշած են ծովուժի կարողութիւնները լծել… թմրեցուցիչի մագսանենգութեամբ զբաղողներուն դէմ, «թնդանօթները» ուղղել Վենեզուելլայի նախագահին ու նման անբաղձալիներու, որովհետեւ անոնք գործ-բան ձգած՝ կ’աշխատին թմրեցուցիչ հասցնել Միացեալ Նահանգներ…:

Չորեքշաբթի, 1 Ապրիլի յետմիջօրէին, նախագահը, շուրջ հաւաքած պաշտպանութեան, արդարութեան նախարարներն ու ծովուժի հրամանատար մը, վարակին մասին ամենօրեայ դարձած իր մամլոյ ասուլիսին պահուն տուաւ այս աւետիս, յայտարարելով, որ թմրեցուցիչի մաքսանենգերուն թոյլ պիտի չտրուի նուաճել Միացեալ Նահանգները: (Ան հաւանաբար մոռցած է, որ հիմա, թմրեցուցիչի վաճառքը ազատ է քիչ մը ամէն տեղ, ճամբաներուն վրայ իսկ մեծ ու փոքր ցուցատախտակներ զետեղուած են, թէ ինչպէ՞ս կարելի է ունենալ թմրեցուցիչ: Կամ արդեօք այս վարակին տարածումէն առաջ, մաքսանենգութեան դէմ պայքար չէ՞ր տարուեր…):

Խնդա՞լ թէ լալ: Մարդիկ ամէն վայրկեան պետական պատասխանատուներէն որոշումներ կը սպասեն՝ վարակին դէմ կտրուկ միջոցներ որդեգրելու, հիւանդանոցներուն տագնապը թեթեւցնելու, կարիքաւորներուն հասնելու ձեւեր գտնելու մասին (կարգ մը երկիրներու մէջ, բանակն ու ոստիկան ուժերը նման մարդասիրական առաքելութեան լծուած են), մինչդեռ ահա կ’ըսուի, որ զինուժը շատ աւելի… առաջնահերթ գործի պիտի լծուի:

Աւելորդ է հարց տալը, թէ նման քայլով, որո՞ւն հացին ի՞նչ իւղ կ’ուզեն քսել, այսինքն, ստեղծուած կացութիւնը շահագործելու պաշտօնական արտօնութիւն տալ զինական մարզի վարիչներուն: Մէյ մը Օպամային, ուրիշ օր մը Չինաստանին, հիմա ալ թմրեցուցիչի վաճառականներուն դէմ մեղադրանքներ շռայլելը արդեօք միակ միջո՞ցն է ապիկարութիւն եւ թերացում ծածկելու…

Կամ… արդեօք պէ՞տք է մխիթարուիլ, որ Ռուսիոյ նախագահը օդանաւ մը լեցուն դիմակ, ձեռնոց եւ այլ բժշկական-առողջապահական պիտոյքներ նուէր ղրկեր է Միացեալ Նահանգներ, անուղղակիօրէն ապացուցելով, որ ինչպիսի անկարող համբակներու ձեռքին է երկրին ղեկը…: Յետոյ, պէ՞տք է զարմանալ, որ վարակը յաղթարշաւի ելած է Միացեալ Նահանգներու մէջ, ետին ձգած է Չինաստա՛նն ալ, Իտալիա՛ն ալ, Սպանիա՛ն ալ եւ դեռ՝ շատ ու շատ երկիրներ: Այո՜. Միացեալ Նահանգները դարձեալ մեծ է, բայց ի՞նչ գետնի վրայ, յառաջացումը՝ ի՞նչ ուղղութեամբ: Իսկ այս բոլորէն ետք, կ’արժէ՞ մխիթարուիլ, որ անատակութեան մէջ, այս հզօ՜ր երկրին վարիչները առանց մրցակիցի չեն, կամ կան ստեղծուած ահաւոր բացը հակակռշելու ճիգ ընող քաղաքապետներ, նահանգապետներ, գիտակ մարդիք:

Լրատու աղբիւրները բոլորովին անմեղ չեն: Անոնք յանդգնութիւնը չունին իրենց նկարիչներուն ոսպնեակներն ու թղթակիցները հեռացնելու այն սրահէն կամ ամպիոնէն, ուր նախագահն ու իրեն նման «գիտուններ» կը սկսին խօսիլ իրենց «սքանչելի՜ ու անզուգական գործերուն» մասին:

(Պիտի հրճուի՞ք, եթէ մէկը ձեզի ըսէ, որ եղածէ ապրիլմէկեան կատակ մըն էր):

 

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post ԸՆԿԵՐ ՍԵՐՈԲ ՂԱԶՈՒՐԵԱՆԻՆ ՀՐԱԺԵՇՏԸ
Next post Պռոշեանի Գիւղապետ Հրաչ Մուրատեանի Սպանութեան 7-րդ Տարելից

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Your email address will not be published. Required fields are marked *

Social profiles