Պսակաձեւ Ժահրը Անդամալուծեց Աշխարհը

Ովկիանիայէն Լատին Ամերիկա․․․ամէնուրէք անդամալուծուած է կեանքը։ Արգիլուած են հաւաքներն ու խճողումները։ Ամեիրկահայ զանազն գաղութներ կը գտնուին միեւնոյն իրավիճակին մէջ։ Իսկ Հայաստանի մէջ, երբ այս շաբթուան մեր թիւը տպարան կը ղրկէինք, վարակուածներուն թիւը կը թակէր ութսունը։

Հայաստանի կառավարութեան Մարտ 6-ի արտակարգ նիստին, որ վարեց Հայաստանի վարչապետ Նիկոլ Փաշինեան, ընդունուեցաւ օրակարգին վրայ ներառուած որոշման նախագիծը` «Հայաստանի Հանրապետութեան մէջ արտակարգ դրութիւն յայտարարելու մասին»:

Կառավարութեան որոշումով, Հայաստանի Հանրապետութեան ամբողջ տարածքին կ՛արգիլուին հաւաքներն ու գործադուլերը, կը դադրեցուին պետական, համայնքային եւ ոչ պետական հանրակրթական, նախնական մասնագիտական, միջին մասնագիտական եւ բարձրագոյն ուսումնական հաստատութիւններուն մէջ, արտադպրոցական դաստիարակութիւն իրականացնող կազմակերպութիւններուն, ինչպէս նաեւ Հայաստանի մէջ գործող միջազգային ուսումնական հաստատութիւններուն մէջ ուսումնական գործընթացը, բացի հեռավար ուսուցումէն: Նաեւ, Ապրիլ 5-ին նախատեսուած սահմանադրական փոփոխութիւններու հանրաքուէն պիտի յետաձգուի:

Նշենք, թէ Հայաստանի Հ․Յ․Դ․ Գերագոյն Մարմինն ալ այս գծով յայտարարութիւն մը լոյս ընծայած էր։

Հայաստանի նախագահ Արմէն Սարգսեան ողջունեց այս որոշումը արտակարգ դրութիւն յայտարարելու վերաբերեալ` զայն նկատելով Հայաստանի համար շատ լուրջ մարտահրաւէր:

Դիտել տալով, որ այս մարտահրաւէրը միայն Հայաստանինը չէ, այլ համայն աշխարհինը` նախագահը անդրադարձաւ «Քորոնա»-ի դէմ պայքարի հիմնական սկզբունքներուն.

«Սկզբունքներէն առաջինը` կառավարութիւնը, մեզմէ իւրաքանչիւրը, պետութիւնը պէտք է ունենայ յստակ ռազմավարութիւն, թէ ինչպէ՛ս պիտի պայքարի ժահրին դէմ, պետական կառոյցները, գործարարները, հասարակական կազմակերպութիւնները իրենց ծրագիրը պէտք է ունենան:

Երկրորդ շատ կարեւոր սկզբունքը հետեւեալն է` մենք բոլորս պէտք է ըլլանք կազմակերպուած եւ կարգապահ, շատ աւելին, քան եղած ենք մինչեւ այսօր: Պայքարի հիմնական ձեւը կազմակերպուած, կարգապահ յարաբերութիւններն են: Քանի որ չկայ դեղ, որ կարելի է օգտագործել, շատ յստակ պայքարի ձեւ կայ` նուազագոյնի բերել մարդկային յարաբերութիւնները, ուղղակի կապերը: Ժահրային հիւանդութիւնները յաղթահարելի են ժամանակի մէջ, տարածութեան մէջ: Վստահաբար, այդ մարտահրաւէրը վտանգաւոր է: Այսօր ես, մասնաւորապէս, շատ անհանգիստ եմ մեր տարեց հայրենակիցներու առողջութեան համար, քանի որ անոնք խոցելի են, եւ նաեւ անոնց համար, որոնք այս կամ այն պատճառով առողջական խնդիրներ ունին:  Սակայն, կը կրկնեմ. յաղթահարելու համար պէտք է ե՛ւ յստակ ռազմավարութիւն, ե՛ւ յստակ կազմակերպուածութիւն, ե՛ւ կարգապահութիւն: Մանաւանդ հիմա յայտարարուած է արտակարգ դրութիւն: Հետեւաբար, կան կանոններ, որոնց պէտք է ենթարկուիլ, եւ կանոններ, որոնք պէտք է պահպանել` նախ եւ առաջ, ձեր սեփական առողջութեան համար, ձեր հարազատներու եւ մեր ամբողջ հասարակութեան, ժողովուրդին առողջութեան համար:

Եւ վերջապէս երրորդը, որ կը կարծեմ շատ պարզ է եւ խորիմաստ. անիկա կը կոչուի պատասխանատուութիւն, պատասխանատուութիւն բոլորիս համար: Ըլլալ պատասխանատու` սկսեալ հանրապետութեան նախագահէն, կառավարութենէն, Ազգային ժողովէն, հասարակական կազմակերպութիւններէն մինչեւ քաղաքական կազմակերպութիւններ, գործարարներ, տնտեսութիւն վարող անձեր, մեզմէ իւրաքանչիւրը… Ժամանակն է, որ մենք ո՛չ միայն ուշադրութեամբ հետեւինք «Քորոնա» ժահրի դէմ պայքարին, այլեւ վերլուծենք համաշխարհային ընթացքը», յայտնեց ան:

Նախագահը յիշեց, որ այս մասին զրուցած է նաեւ Առողջապահութեան համաշխարհային կազմակերպութեան ընդհանուր տնօրէնին հետ: Եզրափակելով` նախագահ Արմէն Սարգսեան առողջութիւն, հանգստութիւն, վստահութիւն մաղթեց բոլորին եւ յատուկ շնորհակալութիւն` առողջապահութեան ոլորտի աշխատողներուն, բժիշկներուն, հիւանդապահներուն, առողջապահութեան կազմակերպիչներուն, որոնք կը կատարեն պետական, ազգային եւ մարդկային պարտաւորութիւն:

Be the first to comment

Leave a Reply

Your email address will not be published.


*